باۋىرىنا سالۋ: اتا-اجەسى اسىراپ العان بالالار پروبلەماسى جايلى فيلم ءتۇسىرىلدى - فوتو
«باۋىرىنا سالۋ» فيلمى اجەسىنىڭ قولىندا وسكەن جەتكىنشەكتىڭ وقيعاسىن باياندايدى.
اجەسى قايتىس بولعاننان كەيىن ول ءوزىنىڭ اتا-اناسىنا ورالۋعا جانە وعان بوتەن ادامدارمەن جاڭا ورتادا قارىم-قاتىناس قۇرۋعا ءماجبۇر بولادى.
«بۇل - ءىشىنارا مەنىڭ جەكە ومىرىمنەن الىنعان وقيعا. مەن دە اجەمنىڭ قولىندا ءوستىم، مەنى تاربيەلەگەن سول كىسى. وسى ماسەلەنى ءجىتى زەرتتەدىم. مۇنداعى باستى نارسە - اتا-انا مەن بالانىڭ قارىم-قاتىناسى. اتا-اجەسىنىڭ قولىندا وسكەن كەز كەلگەن بالا ءوز اتا-اناسىن «اكە» نە «انا» دەپ اتامايدى. نەگە ولاي؟ ءار سونداي بالانىڭ ىشىندە «مەنى تاستاپ كەتكەن» دەگەن رەنىش بار. فيلمنىڭ دراماتۋرگياسى، ەسكى وتباسىنان ايىرىلعاننان كەيىن ءالى دە جاڭا وتباسى تابۋ مۇمكىندىگى بار ەكەنىن كورەرمەنگە جەتكىزۋ»، - دەيدى رەجيسسەر.
جەتكىنشەكتىڭ ءرولىن ەرسۇلتان ەرمانوۆ سومداپ شىقتى. بۇل - ونىڭ كينوداعى دەبيۋتى.
جاس ءارتىس 2000 بالا قاتىسقان كەڭ اۋقىمدى ونلاين كاستينگتەن وتكەن. ونىڭ اكەسىنىڭ رولىندە كاسىبي اكتەر ايدوس اۋەسبايەۆ وينايدى.
كۋچينچيرەكوۆتىڭ ءوزى بۇل جوبادا رەجيسسەر، سەناريست جانە پروديۋسەر رەتىندە جۇمىس ىستەدى. ءتۇسىرىلىم وتكەن جىلدىڭ جازىندا ءوتتى.
نەگىزگى لوكاتسيالار - الماتى وبلىسىنداعى قۇيعان جانە تۇيىق اۋىلدارى. قويۋشى-وپەراتورى جاناربەك ەلەۋبەك.
اۆتورلار فيلمنىڭ تۇساۋكەسەرىن ءىرى حالىقارالىق كينوفەستيۆالدەردە وتكىزىپ، وتاندىق پروكاتقا كەلەسى جىلى شىعۋدى جوسپارلاپ وتىر. رەجيسسەردىڭ ايتۋىنشا، بۇل تۋىندى - قازاق حالقىنىڭ سالت- داستۇرىنە دەگەن قۇرمەت.
«بۇل كارتينا بارىنە قىزىق. تۇساۋكەسەرى كاننىدا بولسا ەكەن دەيمىن، ونى فرانسۋزدارمەن تالقىلاپ جاتىرمىز. سينگاپۋردان پروديۋسەرلەر حابارلاستى، گەرمانيادان جازدى، ءبىزدىڭ سالتىمىزدىڭ بىرەگەيلىگى مەن تاريحىمىز بارىنە قىزىقتى. وزدەرى سولاي ايتادى. ءار ۇلتتىڭ سالت-داستۇرلەرى بار، ءبىراق ۋاقىت ەتە كەلە ولار وزگەرىسكە ۇشىراپ، كەيبىرى ءتىپتى جوعالىپ كەتكەن، ۋاقىت ءبارىن وزگەرتتى. ال ءبىزدىڭ بۇل سالتىمىز ساقتالىپ قالدى. قازىر بالالار ءالى دە اتا-اجەسىنىڭ قولىندا وسەدى. مىسالى مەنىڭ كورشىلەرىم استاناعا جۇمىسقا كەتىپ، بالالارىن اتا-انالارىنا قالدىردى. بالالارىن اتاسى مەن اجەسىنە تاربيەلەۋگە بەرەتىن وتە باي ادامدار دا بار. بۇل ءداستۇردىڭ وسى كۇنگە دەيىن ساقتالۋى تاڭقالارلىق»، - دەيدى كۋچينچيرەكوۆ.
«باۋىرىنا سالۋ» فيلمى ق ر مادەنيەت جانە سپورت مينيسترلىگىنىڭ تاپسىرىسى بويىنشا ۇلتتىق كينونى قولداۋ مەملەكەتتىك ورتالىعىنىڭ كومەگىمەن تۇسىرىلگەن.
