قاڭتار وقيعاسى: ءماجىلىس راقىمشىلىق تۋرالى قۇجاتتى ماقۇلدادى
«كوپشىلىگىمىز قاڭتار، اقپان ايلارىندا تەرگەۋ يزولياتورلارىنا بارىپ، ۇستالعاندارمەن كەزدەستىك، تەرگەۋشىلەر مەن ۇستالعانداردىڭ تۋىستارى، قوعام بەلسەندىلەرى اراسىندا كەرى بايلانىس ۇيىمداستىردىق. ءبىز سونىڭ ىشىندەگى جاستاردىڭ نەگىزگى بولىگى قىلمىسكەرلەردىڭ، تارتىپسىزدىكتەردى ۇيىمداستىرۋشىلاردىڭ قولشوقپارى بولعانىنا كوز جەتكىزە الدىق. ولار قاتتى وكىنىپ، ءوز كىناسىن مويىندادى. ايتا كەتۋ كەرەك، العاشقى كۇندەردەن باستاپ پرەزيدەنتىمىز وسى قايعىلى وقيعالاردى ۇيىمداستىرۋشىلاردىڭ ايتقانىنا ەرىپ، تۋرا جولدان تايعاندارعا اياۋشىلىق تانىتۋعا شاقىردى. مەملەكەت اۋىر قىلمىس جاساماعان قاتىسۋشىلار ءۇشىن جازانى جەڭىلدەتتى. بۇگىنگى تاڭدا 1060 ادام سوتتالدى، ولاردىڭ تەك 106 سى ناقتى باس بوستاندىعىنان ايىرىلدى»، - دەدى ءماجىلىس دەپۋتاتتى گۇلنار بيجانوۆا.
ونىڭ ايتۋىنشا، قاڭتار ايىندا زارداپ شەككەندەرگە كەلتىرىلگەن زالال وتەلىپ جاتىر، الەۋمەتتىك، قارجىلىق جانە وزگە دە كومەك كورسەتىلىپ وتىر.
«بۇل جۇمىسقا «قازاقستان حالقىنا» قورى دا قاتىسىپ جاتىر. ءبىز، پارلامەنت دەپۋتاتتارى ۇندەۋدى قولداپ، كونستيتۋتسيالىق وكىلەتتىكتەرگە سۇيەنە وتىرىپ، وسى زاڭ جوباسىندا قۇقىق بۇزۋشىلىقتار مەن قىلمىستار جاساعان قاڭتار وقيعالارىنا قاتىسۋشىلارعا قاتىستى راقىمشىلىق جاساۋ تۋرالى مەملەكەت باسشىسىنىڭ باستاماسىن ىسكە اسىرۋدى ۇسىنامىز»، - دەدى دەپۋتات.
زاڭ جوباسىنىڭ نەگىزگى ەرەجەلەرىنە توقتالساق، ونىڭ اياسىندا راقىمشىلىققا ىلىككەن ازاماتتار توبى انىقتالدى. ول ءۇشىن ناقتى ۋاقىت ارالىعى بەلگىلەندى. بۇل تۇرعىدا 4-7- قاڭتار ارالىعى قامتىلدى.
«قىلمىستىق كودەكستىڭ ءاربىر ادام بويىنشا ناقتى باپتارىن كورسەتە وتىرىپ، وسى وقيعالارعا قاتىستى بارلىق ىسكە تالداۋ جاسالدى. قۇجاتتا قىلمىستىق تەرىس قىلىقتار مەن اۋىرلىعى از ورتاشا قىلمىستار ءۇشىن جازادان بوساتۋ ەسكەرىلگەن. اۋىر جانە اسا اۋىر قىلمىستار جاساعاندارعا مەرزىمدەردى قىسقارتۋ كوزدەلگەن. اۋىر قىلمىستار ءۇشىن سوت تاعايىنداعان مەرزىمنىڭ تورتتەن ءۇش بولىگى، ال اسا اۋىر قىلمىستارعا مەرزىمنىڭ جارتىسى قىسقارادى»، - دەدى ول.
بۇل رەتتە، ەگەر سوتتالعانداردىڭ «راقىمشىلىق جاساۋ تۋرالى» زاڭ قولدانىسقا ەنگىزىلگەن كۇنگە جازاسىن وتەۋ مەرزىمى ءبىر جىلدان از بولسا، نەگىزگى جازا ونىڭ بۇكىل وتەلمەگەن مەرزىمىنە قىسقارتىلادى.
سونىمەن قاتار، تەرروريستەر، ەكسترەميستەر، رەتسيديۆيستەر، تارتىپسىزدىكتەردى ۇيىمداستىرۋشىلار جانە ازاپتاۋلار جاساعان ادامدارعا راقىمشىلىق جاسالمايدى. بۇل تۋرالى پرەزيدەنت ناقتى ايتقان بولاتىن.
«الدىن الا جاسالعان ەسەپتەۋ بويىنشا وسى كەزەڭدە راقىمشىلىق 1,5 مىڭعا جۋىق ادامعا جاسالادى. زاڭ جوباسىن ىسكە اسىرۋ قوسىمشا قارجىلىق شىعىنداردى قاجەت ەتپەيدى جانە تەرىس ەكونوميكالىق، الەۋمەتتىك جانە قۇقىقتىق سالدارعا اكەپ سوقپايدى»، - دەدى گۇلنار بيجانوۆا.
