جىلاپ وتىرعان بالاعا ايتۋعا بولمايتىن سوزدەر
ءتىپتى، كەيدە «باس كيىمىڭدى كيىپ ال» دەگەن ءسوزدىڭ وزىنە «كيمەيمىن» دەپ جىلاي سالادى. اتا-انا بالاسىنىڭ مۇنداي رەاكسياسىنا قالاي اسەر بەرۋى كەرەك؟
ادەتتە، مەكتەپ جاسىنا دەيىنگى بالالارعا ءوز ەموتسيالارىن باقىلاۋدا ۇستاۋ قيىن. ولار سىزگە اسا ماڭىزدى ەمەس كورىنگەن نارسەلەردىڭ بارىنە قاتتى رەاكتسيا ءبىلدىرۋى مۇمكىن. مۇنداي كەزدە، اسىرەسە، ول قوعامدىق جەردە ايقايلاپ، جىلاسا، اتا- انا نە ىستەرىن بىلمەي كەتەدى. بۇل كەزدە كوپشىلىك اتا- انا ايتاتىن سوزدەر جاعدايدى ودان سايىن ۋشىقتىرىپ جىبەرەدى. ءسىز دە بۇل قاتەلىكتى جىبەرمەس ءۇشىن بالا جىلاعاندا ايتۋعا بولمايتىن سوزدەردى ۇسىنامىز.
«ايقايلاي بەرمە، ايتپەسە، كورسەتەمىن!»
بالا جىلاۋىنىڭ ارتىندا شىنايى سەبەپ تۇر. ول سىزگە تۇسىنىكسىز بولسا دا، ونىڭ ەركەلىگىن كوتەرۋگە كۇش قالماسا دا، بالانى جازالايتىنىڭىزدى ايتىپ، قورقىتۋدىڭ قاجەتى جوق. قورقىتۋ جاعدايدى ۋشىقتىرادى جانە اتا-انا مەن بالا قاتىناسىنا جاعىمسىز اسەر ەتەدى. بالا مۇنداي رەاكسيانى قولداۋ كورسەتۋدەن باس تارتۋ دەپ قابىلداپ، ۋاقىت وتە اتا-اناسىنا سەنۋدەن قالادى.
اشۋ ۇستىندە ونى قورقىتۋدىڭ ورنىنا بالامەن كوپ ادام جوق تىنىش جەرگە كەتىپ قالۋعا تىرىسىڭىز. تىنىش جەردە ونىمەن سويلەسىڭىز، ونىڭ بۇل ارەكەتىنىڭ سەبەبىن انىقتاۋعا تىرىسىڭىز.
«ادام وسىعان دا جىلاي ما؟!»
ەرەسەك پەن بالانىڭ الەمگە كوزقاراسى مۇلدەم باسقا، سوندىقتان بالانىڭ سەزىمدەرىن وزىڭىزدىكىمەن سالىستىرۋ قاتە. ونىڭ ۇستىنە ءسىز ونىڭ سەزىمىن قۇنسىزداندىرىپ تۇرسىز. بۇل ارەكەتىڭىزدىڭ سەبەبىنەن بالانىڭ وزىنە سەنىمدىلىگى تومەندەۋى مۇمكىن. كەيىن ول ءوز ۋايىمىمەن سىزبەن بولىسپەس بۇرىن ءوز سەزىمدەرىنە كۇمانمەن قارايتىن بولادى.
بالاعا ءوز سەزىمدەرىن كورسەتۋگە مۇمىندىك بەرىڭىز. ول سىزدەن تۇسىنىستىكتى جانە قولداۋدى قاجەت ەتەتىنىن ۇمىتپاڭىز. ارينە، بۇل سىزدەن سابىرلىق پەن كۇشتى قاجەت ەتەدى، ءبىراق ناتيجەسىندە بالا ءوز ەموتسيالارىن باسقارۋدى جانە ولاردىڭ پايدا بولۋ سەبەپتەرىن انىقتاۋدى ۇيرەنەدى.
«جىلاۋىقسىڭ عوي!»
ءازىل - ءجيى قيىن ساتتەن شىعۋعا كومەكتەسەتىن پايدالى سەزىم. ءبىراق ونىڭ ءوز ورنى بار. بالا شىنىمەن دە رەنجىگەندىكتەن جىلاۋى مۇمكىن، ول بۇل سەزىمىن اتا-اناسىنا جىلاۋ ارقىلى جەتكىزگىسى كەلەدى. ال ەگەر ءسىز مۇنداي ۋاقىتتا قالجىڭداساڭىز، بۇل ونىڭ سەزىمدەرىنىڭ ماڭىزى جوق ەكەنىن ايتۋمەن بىردەي.
بالا بۇل ارەكەتىمەن سىزگە نە جەتكىزگىسى كەلەتىنىنە اسا ءمان بەرىڭىز. قورىقسا - قورعاڭىز، اۋىرىپ تۇرسا - اياڭىز، رەنجىسە - قايعىسىنا ورتاقتاسىڭىز. بالا جىلاپ، ءوز-وزىنە كەلگەندە بالامەن بىرگە كۇلكىلى بىردەڭە ايتىپ، قالجىڭداسۋعا بولادى.
«ساعان نە ىستەرىمدى بىلمەيمىن...»
بۇل سوزىڭىزبەن ءسىز بالاعا بۇل جاعدايدا دارمەنسىز ەكەنىڭىزدى كورسەتەسىز. ەرەسەك ادام بالانىڭ كوز الدىندا - قاۋىپسىزدىك تىرەگى. ءوزىڭىزدى بالانىڭ ورنىنا قويىپ كورىڭىزشى؟ ءسىزدىڭ بولعان جاعدايعا بايلانىستى قاتتى كوڭىلىڭىز ءتۇستى، ەڭ جاقىن ادامىڭىزدان قولداۋ كۇتەسىز. ال ول بولسا، سىزدەن جانە ءسىزدىڭ قيىنشىلىقتارىڭىزدان باسىن الا قاشتى. وتباسىدا ءوزىن ءقاۋىپسىز سەزىنىپ وسكەن بالا ەرەسەك ومىردە ءوز- وزىنە سەنىمدى ءارى سابىرلى بولادى.
massaget.kz
