پاۆلودارلىقتارعا ۇسىنىلعان كورمەدە ماحامبەتتىڭ رەسەيدە ساقتالعان دومبىراسى بار

كورمەگە الماتى قالاسىندا ورنالاسقان ىقىلاس اتىنداعى حالىق مۋزىكالىق اسپاپتار مۋزەيىنىڭ اسپاپتارى قويىلعان. پاۆلودارداعى مايرا شامسۋتدينوۆا اتىنداعى ءان- ونەر شىعارماشىلىعى مۇراجاي ءۇيىنىڭ باسشىسى ەرلان راقىموۆتىڭ ايتۋىنشا، بۇل - ىقىلاس مۋزەيىنىڭ وبلىستارعا جاساپ وتىرعان العاشقى ساپارى.

«2017 -جىلدان بەرى وسى كورمەنى پاۆلودارعا اكەلۋدى ماقسات ەتكەنمىن. سونىڭ ءساتى بيىل ءتۇسىپ، شاقىرتىپ وتىرمىن. بۇل كونە اسپاپتاردى ساقتايتىن مۋزەي بولعاندىقتان، ساپارعا كوپ شىعا قويمايدى. ماقساتىمىز - سولتۇستىك وڭىردە، پاۆلودار قالاسىندا سول قازاقتىڭ كونە اسپاپتارىن كورسەتۋ، حالىققا تانىتۋ، ناسيحاتتاۋ. وعان قوسا، بيىل پوتانين مۋزەيىنىڭ 80 جىلدىعى، ءارى بيىل رەسپۋبليكا كۇنى مەرەكەسى قايتا جاڭعىرىپ جاتىر. سول مەرەكە قارساڭىندا حالىققا كورسەتەيىك دەپ شاقىرتتىق»، - دەدى ەرلان راقىموۆ.

كورمەدە اقان سەرىنىڭ، ءبىرجان سالدىڭ، قامار قاسىموۆتىڭ دومبىرالارىنىڭ ءتۇپنۇسقالارى بار.

سونىمەن قاتار، قۇندى جادىگەرلەردىڭ ءبىرى - اقىن، وتارشىلدىققا قارسى كوتەرىلىس باسشىسى، بوكەي ورداسىندا دۇنيەگە كەلگەن ماحامبەت وتەمىس ۇلىنىڭ دومبىراسى. ءبىراق، كورمەدە دومبىرانىڭ كوشىرمەسى قويىلعانىن اتاپ ءوتۋ كەرەك. اسپاپتىڭ شەبەرى جانە جاسالعان ۋاقىتى بەلگىسىز. ول اعاش پەن جىبەك جىپتەن جاسالعان.

ەرلان راقىموۆ بۇل دومبىرانىڭ مۋزەيگە جەتۋ جولى دا وڭاي بولماعانىن ايتىپ بەردى. ماحامبەتتىڭ اسپابى - 13 پەرنەلى، جۇمىر شاناقتى دومبىرا. ول ۇرپاعى، مۋزىكانت ارىستان باتالوۆتىڭ قولىندا بولعان.

«31 -جىلى ارىستان كوز جۇمعاندا اعاسى قاتەپ قىزىلورداعا الىپ كەتكەن. 1933 -جىلى بەلگىلى كۇيشى سەيتەك وراز ۇلى دومبىرانى ىزدەپ قىزىلورداعا بارادى. دومبىرانى 2 كۇن شەرتىپ، اسپاپتى وزىنە سىيعا سۇراعانمەن، الا المايدى. قاتەپ قايتقان سوڭ تۋىسى قاجەتتە قالادى. 1934 -جىلى ول كوز جۇمىپ، اناسى رەسەيگە كوشكەندە وزىمەن بىرگە الىپ كەتكەن. رەسەيدە اسپاپ ەلەۋ دەگەن قارتتىڭ ۇيىندە ساقتالعان. 74 -جىلى ونىڭ ۇلى مۇستافا يسماعۇلوۆتىڭ قولىنا وتەدى. 85 -جىلى اسپاپتىڭ بەت تاقتايىنا رەستاۆراتسيا جاسالىپ، تاريحي قۇندىلىق رەتىندە الماتىداعى ىقىلاس مۋزەيىنە اكەلىپ تاپسىرىلعان»، - دەدى ەرلان راقىموۆ.

مۇندا قازاقتىڭ ۇلتتىق كونە اسپاپتارىنىڭ ءار تۇرىنەن ءبىر- ءبىرى داناسى، بارلىعى 30 دان استام اسپاپ جەتكىزىلگەن. ونىڭ ىشىندە پاۆلودار وڭىرىندە كوپ كەزدەسە بەرمەيتىن اسپاپتار بار.

«كورمەنىڭ قۇنى بىلەتىن ادامعا وتە جوعارى. بۇل اسپاپتار باسقا وڭىرلەرگە كوپ شىعارىلا بەرمەيدى. وعان قوسا، تاريحي تۇلعالاردىڭ اسپاپتارىنىڭ ءتۇپنۇسقاسىن اكەلۋ - جاڭالىق. دايىن اكەلىپ قويعان نارسەنى جۇرتشىلىق كەلىپ كورسە دەيمىن. مۇنداي تاماشا مۇمكىندىكتى جىبەرىپ الۋعا بولمايدى»، - دەيدى ەرلان راقىموۆ.

ايتا كەتەيىك، كۇيشى، قوبىزشى ىقىلاس دۇكەن ۇلىنىڭ اتىنداعى مۋزەي - 1981 -جىلى ورتالىق ازيا بويىنشا تەك مۋزىكالىق اسپاپتارعا ارنالىپ قۇرىلعان العاشقى مۋزەيلەردىڭ ءبىرى. ءارى قازىرگى ۋاقىتتا قازاقستان بويىنشا بىرەگەي مۋزەي بولىپ سانالادى. مۋزەي 9 زالدان تۇرادى. بەسەۋى قازاق ۇلتتىق اسپاپتارىنا ارنالسا، تورتەۋى الەم حالىقتارىنىڭ مۋزىكالىق اسپاپتارىنا ارنالعان. 50-گە جۋىق ەلدىڭ اسپاپتارى بار.

فوتو: pavlodarnews.kz

رەداكتور

گۇلنۇر عازيز قىزى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى