استانادا دراما تەاترلاردىڭ رەسپۋبليكالىق فەستيۆالى باستالدى

بيىل تەاتر فەستيۆالى كورنەكتى تەاتر جانە كينو اكتريساسى، قازاقستاننىڭ مەملەكەتتىك سىيلىعىنىڭ لاۋرەاتى، ك س ر و حالىق ءارتىسى شولپان جانداربەكوۆانىڭ 100 جىلدىق مەرەيتويىنا ارنالىپ وتىر.

«شولپان جانداربەكوۆا ۇلتتىق تەاتر جانە كينو ونەرى تاريحىندا وشپەس ءىز قالدىرعان ەرەكشە تۇلعا. «اباي جولى»، «دالا ءۇنى»، «ماحاببات تۋرالى پوەما» جانە باسقا دا فيلمدەردە ويناعان. سونداي- اق تەاتر ساحناسىندا 200 دەن استام وبرازدى سومداعان ءارتىس. ت. جۇرگەنوۆ اتىنداعى ونەر اكادەمياسىندا ۇستازدىق ەتىپ، ارتىستەردىڭ الىپ شوعىرىن تاربيەلەپ شىعاردى»، - دەدى ق ر مادەنيەت جانە سپورت ءمينيسترى داۋرەن ابايەۆ فەستيۆالدىڭ اشىلۋ سالتاناتىندا.

بۇگىن باستالعان فەستيۆالگە ەل وڭىرلەرىنەن 10 دراما تەاتر قاتىسىپ جاتىر. مادەني شارا 23 -قازانعا دەيىن جالعاسادى.

«بۇگىنگى فەستيۆال ەلىمىزدەگى ەڭ اۋقىمدى مادەني جوبالاردىڭ ءبىرى. تالاي تالانتقا تۇعىر بولعان وسىناۋ تەاتر جارمەڭكەسىن كورەرمەندەر اسىعا كۇتەدى. جاس رەجيسسەرلەر مەن اكتەرلەر كاسىبي شىڭدالىپ، ال اعا بۋىن ءوز تاجىريبەسىن ورتاعا سالاتىن فەستيۆال. بارلىق قاتىسۋشىلارعا ساتتىلىك تىلەيمىن. شىعارماشىلىقتى شىڭداپ، وي، تاجىريبە الماساتىن ايتۋلى تەاتر فەستيۆالى مەرەكەسىن اشىق دەپ جاريالايمىن. سۇيىكتى كورەرمەندى ساحنا سيقىرىنا بولەي بەرىڭىزدەر»، - دەدى مينيستر.

سونداي- اق اتالعان شارا اياسىندا شولپان جانداربەكوۆانىڭ شىعارماشىلىعىنا ارنالعان دوڭگەلەك ۇستەل وتىرىسى ۇيىمداستىرىلىپ، ونەر جۇلدىزىنىڭ ومىرىنەن سىر شەرتەتىن ەرعازى تولەۋدىڭ «شولپان جۇلدىز» اتتى كىتابىنىڭ تۇساۋكەسەرى ءوتتى.

سالتاناتتى كەش سوڭىندا جينالعان قاۋىم ق. قۋانىشبايەۆ اتىنداعى مەملەكەتتىك اكادەميالىق قازاق مۋزىكالىق دراما تەاترىنىڭ «التايدان اۋعان ەل» اتتى قويىلىمىن تاماشالادى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى