سولتۇستىك قازاقستاندا بويجەتكەن سينتەتيكالىق ەسىرتكىمەن ۇستالدى

بۇل تۋرالى قازاقپارات polisia.kz سايتىنا سىلتەمە جاساپ حابارلايدى.

بويجەتكەن پەتروپاۆلدا جالدامالى پاتەرلەردە تۇرىپ كەلگەن. ءتارتىپ ساقشىلارىنا ونىڭ ەسىرتكىنى بەلگىلى ورىندارعا جاسىرىپ، سودان پايدا تاۋىپ جۇرگەنى جايىندا اقپارات كەلىپ تۇسكەن.

جەدەل-ىزدەستىرۋ ءىس-شارالارى ناتيجەسىندە ول ۇستالدى. بويجەتكەننەن ۇنتاق تەكتەس زات سالىنعان پوليمەرلىك پاكەت الىندى. ساراپتاما ول زاتتىڭ سالماعى 49 گرام بولاتىن سينتەتيكالىق ەسىرتكى - مەفەدرون ەكەنىن كورسەتتى، بۇل اسا ءىرى كولەمگە جاتادى. بۇل 500 گە جۋىق ادامدى ناشاقورلىقتىڭ تورىنا تۇسىرۋگە جەتكىلىكتى مولشەر.

اتالعان فاكتى ق ر قىلمىستىق كودەكسىنىڭ 297-بابى 3-بولىگى «ەسىرتكى، پسيحوتروپتىق زاتتاردى، سول تەكتەستەردى وتكىزۋ ماقساتىندا زاڭسىز دايىنداۋ، قايتا وڭدەۋ، يەمدەنۋ، ساقتاۋ، تاسىمالداۋ، جونەلتۋ نە وتكىزۋ» بويىنشا سوتقا دەيىنگى تەرگەپ-تەكسەرۋدىڭ ءبىرىڭعاي تىزىلىمىنە ەنگىزىلدى.

«ۇستالعان بويجەتكەن قاماۋعا الىندى. جالپى جىل باسىنان وبلىستا ەسىرتكىنى ساتۋعا قاتىستى 49 دەرەك تىركەلدى. زاڭسىز اينالىمنان 383 كەلى ءتۇرلى ەسىرتكى الىندى، ونىڭ ىشىندە 1,548 كەلى سينتەتيكالىق ەسىرتكى»، - دەيدى س ق و پوليتسيا دەپارتامەنتى ەسىرتكى قىلمىسىنا قارسى ءىس-قيمىل باسقارماسى باستىعى يۆان تەرزيدي.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى