فرانسياداعى قالا مەرىنىڭ ورىنباسارى: مەن تاعدىر تالكەگىمەن ءوز اتاجۇرتىنان الاستالعان قازاقتىڭ ۇرپاعىمىن

فرانسيادا 2020-جىلى 28-ماۋسىمدا وتكەن جەرگىلىكتى سايلاۋدا يەشىمنىڭ پارتياسى جەڭىسكە جەتكەن. ول سايلاۋدا %50 ارتىق داۋىس جيناعان. ەندى يەشىم 2026-جىلعا دەيىن اكىمنىڭ ورىنباسارى قىزمەتىن اتقارادى.

يەشىم - فرانسيا قازاق مادەنيەت قوعامى ءتوراعاسى ماحمۇت ساۆاش اۋكەي ۇلىنىڭ قىزى، سونىمەن قاتار، زۋقا باتىردىڭ شوبەرەسى ەكەن.

سول فرانسيانىڭ كرەي قالاسىنىڭ ورىنباسار مەرى، قازاق قىزى يەشىم ماقمۇد قىزى ساۆاشپەن سۇحبات الۋدىڭ ءساتى تۇسكەن ەدى.

- ساۆاش يەشىم، ءسىزدىڭ ەسىم-سويىڭىز قازاق، تۇرىك، فرانسۋز ءتىلدى مەديادا ءجيى ايتىلدى. بۇگىنگىدەي الماعايىپ تۇستا قازاق قىزىنىڭ فرانسيا سەكىلدى الىپ ەلدىڭ ساياسات ساحناسىنا كورىنىس بەرۋى قازاق قانداستارى ءۇشىن ماقتانىش سەزىمىن ۇيالاتتى. ءسىز مۇنى قالاي قابىلدادىڭىز؟

- بىرىنشىدەن، ماعان وسىنداي قامقورلىق كورسەتكەنى ءۇشىن بارشا قازاق حالقىنا العىس ايتامىن. مەنىڭ پاريج ايماعىنىڭ كرەي قالاسىنىڭ ورىنباسار مەرى بولىپ سايلانۋىما بايلانىستى قازاقستاننىڭ بۇقارالىق اقپارات قۇرالدارىندا شىعۋىم كۇتپەگەن جاعداي ءارى قۇرمەت بولدى. بۇل مەنى تاڭ قالدىردى ءارى ماقتانىش جانە تۋعان حالقىما دەگەن ماحابباتىمدى تىپتەن كۇشەيتە ءتۇستى.

- سايلانعان اۋماق، قازىرگى قىزمەتىڭىز تۋرالى تارقاتىپ ايتساڭىز؟

- 2014 -جىلى مەن قالالىق كەڭەسكە حالىقارالىق قاتىناستار جونىندەگى كەڭەسشى بولىپ سايلاندىم. 2020 -جىلعى ماۋسىمداعى سايلاۋدا جەڭىسكە جەتكەن سوڭ مەنى مەردىڭ مادەنيەت جونىندەگى ورىنباسارى ەتىپ سايلادى. سونىمەن قاتار، مەن مادەنيەتكە جانە وعان قاتىستى بارلىق ماسەلەلەرگە جاۋاپ بەرەمىن.

- ءسىزدىڭ ساياساتقا بەت بۇرۋىڭىزدىڭ سەبەبى مەن قۇپياسى نەدە؟ مۇنداي تاڭداۋ نەدەن تۋىندادى؟

- مەن 18 جاسىمنان باستاپ ساياساتقا جانە ونىڭ بارلىق ماسەلەلەرىنە قىزىعا باستادىم. مەن 19 جاسىمدا جاستار كەڭەسىنە سايلاندىم جانە جاستارعا ارنالعان جوبالار جاساپ، ولاردىڭ ورىندالاتىندىعىن كورۋ مەن ءۇشىن امبيتسيا بولدى. جاستار بولاشاقتى بەينەلەيدى، ولارعا قۇرالدار مەن قاجەتتى كۇش بەرۋ ەرتەڭگى الەمدى قۇرۋ ءۇشىن قاجەت. بيىلعى جەرگىلىكتى سايلاۋ الەمدە قالىپتاسقان جاعدايعا (ىندەتكە) بايلانىستى ۇزاققا سوزىلىپ كەتتى. سايلاۋدىڭ ءبىرىنشى تۋرى 15-ناۋرىزدا وتسە دە، كاراتين بوگەت بولدى، ەكىنشى ساتىسىنا 28-شىلدەدە كەزەك كەلدى.

- ەستۋىمىزشە، اتالارىڭىز بۇلاناي تاۋ سىلەمدەرىن كوكتەي ءوتىپ، انادولىدان قونىس تاپقان قاسىرەتتى كوشتىڭ ساپىندا بولعان ەكەن؟ ءوز جۇرتىڭىز، ناعاشى جۇرتىڭىز تۋرالى ءوز اۋزىڭىزدان تارقاتىپ ايتىپ بەرسەڭىز؟

- مەنىڭ شىققان جۇرتىم - التايدان، ⅩⅨ عاسىردىڭ سوڭىندا قازاقستاننىڭ زايسان وڭىرىنەن شىڭجانعا قونىس اۋدارعان كەرەي تايپاسىنىڭ ادامدارى. ءوز جۇرتىم - 12 اتا اباي كەرەيدىڭ ءبىرى قاراقاس رۋى، التايدا وسكەن ىرگەلى ەل. بۇل رۋدان ەل باسقارعان اقتەكە، حالەل بي، قاپتاعاي، ارقالىق، قابي، قۇرمان، سايىپ، راحات، بۇركىتباي سياقتى جەر قورعاعان باتىرلار، باقسى وقىمىستىلار كوپ شىققان. وسىدان ەكى جىل بۇرىن قاراقاستار جينالىپ، زايساندا قاپتاعاي باتىر بابامىزعا اس بەردى، انادولىدا دا جالعاستى. بۇل ىستە يلياس ساقا مەن سەرىك سياقتى جاندار ۇلكەن قولداۋ كورسەتتى. ىستانبۇلدىڭ زەيتىنبۇرنى اۋدانى اكىمىنىڭ ورىنباسارى بولعان يلياس ساقا كوكەمنىڭ جولىمەن ءجۇرىپ كەلەمىن.

ارعى اتام ساتىپالدى جەڭسىكباي ۇلى اتاقتى زۇقا باتىر اۋلەتىمەن ەتەنە بايلانىستا بولعان. ەل باسىنا كۇن تۋعان زاماندا ءۇي ءىشى ءبىر جاقتا، ءوزى ءبىر جاقتا قالعان. بالالارى گيمالاي اسقان كوشپەن تۇركياعا جەتكەن. اتام ءاۋتاي، اعاسى راحىمبەردى، ءىنىسى ءشاپي انادولىعا جەتكەن. راقىمبەردى اتام 40 جىلدان كەيىن اكەسىنە بارىپ جولىعا الدى. ول اتامنىڭ ۇلى يسا قالقان كوپ جىل فرانسيادا تۇرعان كاسىپكەر، قازىر ىستانبۇلداعى قوجا اقىمەت ياساۋي قورىن باسقارادى.

ءوز اجەم مالاقاي ايگىلى وسپان باتىردىڭ تۋىسى، توقساندى القىمدادى، ءىزمىر تاراپىندا ساليحلى اۋدانىندا تۇرادى.

ناعاشى جاعىنان مەن ايگىلى زۋقاقاجى ءسابيت ۇلىنىڭ تىكەلەي جيەنشارىمىن، ياعني شوبەرە جيەنىمىن. ونىڭ اكەسى دە ۋفادا وقىعان وقىمىستى. بارشا قازاققا ءمالىم، ناعاشىلارىم دا زايسان وڭىرىنەن 1891 -جىلدارى ارعى بەتكە اۋعان. ءدىن تاراتقان قاجى بابام ⅩⅩ عاسىردىڭ باسىندا مانج-سين، كەيىن گوميندان ەزگىسىنە دەسپوتتىق ۇستەمدىككە قارسى تۇردى جانە قانداستارىن ءوز قاراماعىنا قورعاۋىنا الدى. قاپىدا قازا بولعان سوڭ ۇلكەن ۇلى سولتانشارىپ ەلدى باسقاردى، كوشتىڭ باسشىلارىنىڭ ءبىرى رەتىندە قاراماعىنداعى ەلىن انادولىعا الىپ ءوتتى. زۋقانىڭ بەسىنشى ۇلى ءشامي - تۋعان مەنىڭ ناعاشى اتام. ⅩⅨ عاسىردا ىستانبۇلداعى ەسكى قوناق ءۇي مۇراعاتىنان زۇقا اتامنىڭ فوتوسۋرەتىن تاۋىپ العاندا تانىپ كۋالاندىرعان، ارتىنان توي جاساعان دا ءشامي اتام. ناعاشى اپام قابيرا ساعىنعان قىزى ىستانبۇلدا، جاسى 90-عا كەلدى. ۆەنادا تۇراتىن ناعاشىم قىزىرحان چولپان اتاجۇرتقا ءجيى قاتىناپ تۇرادى، سىيلاساتىن جەكجاتتارى دا كوپ. ءدۇيىم قازاققا جاقسى تانىس «قاراجورعانى» قايتا اكەلگەن، مەشىت تۇرعىزعان ارىستان قاجى شادەت ۇلى، ەۋروپا قازاق مادەنيەتى قوعامىن كوپ جىل باسقارعان، دۇنيەجۇزى قازاقتارى قاۋىمداستىعىنىڭ ءتورالقا مۇشەسى بولعان ءابدىراحمان جالەل ۇلى - مەنىڭ ناعاشىلارىم.

دەمەك، مەنىڭ اتالارىم مەن اپالارىم اسا كورنەكتى تۇقىمنان، ەل مەن جەر ءۇشىن كۇرەسكەن كۇرەسكەر جاندار.

- قازاق وقىرماندارى ءوزىڭىزدىڭ وسكەن ورتاڭىز تۋرالى بىلگىسى كەلەدى؟

- مەن - تاعدىر تالكەگىمەن ءوز اتاجۇرتىنان الاستالعان قازاقتىڭ ۇرپاعىمىن. اتالارىم ⅩⅩ عاسىردىڭ ورتاسىندا انادولى جەرىنە قونىستانعان. ءوزىم فرانسيادا دۇنيەگە كەلدىم، بالالىق شاعىم پاريج ايماعىندا ءوتتى.

مەنىڭ 13 جاسىمدا كرەيلگە كوشىپ كەلدىك. ليتسەيدى بىتىرگەن سوڭ تەحنولوگيا ينستۋتىندا جەرگىلىكتى ءوزىن-ءوزى باسقارۋ ماماندىعى بويىنشا باكالاۆر دارەجەسىن، كەيىن ۇلتتىق جوعارى بىلىكتىلىك جانە ءبىلىم بەرۋ

ينستيتۋتىندا (Institut National Supérieur du Professorat et de l’education) ءبىلىم ماگيسترى دارەجەسىن تامامدادىم.

- يسلامدىق- تۇركىلىك وركەنيەت پەن ەۋروپالىق- حريستياندىق وركەنيەت ۇيلەسىمى ءسىزدىڭ بويىڭىزدان قالاي كورىنىس تاپتى؟

- مەنىڭ ءدىنىم نەمەسە شىققان تەگىم ەشقاشان ەشنارسەگە كەدەرگى كەلتىرگەن ەمەس. كەرىسىنشە، ءوزىمنىڭ ارتىقشىلىق تۇستارىمدى ماقساتتارىم ءۇشىن پايدالانۋعا تىرىسامىن. فرانسيادا ارتۇرلىلىكتى ۇسىنۋدىڭ ناقتى الەۋەتى بار، ويتكەنى ارتۇرلىلىك - بۇل اكتيۆ، ياعني بەلسەندىلىك بولىپ تابىلادى. فرانسيا - زايىرلى ەل، سوندىقتان ەشقاشان ءوز ءدىنىمدى ۇستانۋعا نەمەسە ءوزىمنىڭ ستاندارتتارىم بويىنشا ءومىر سۇرۋگە قاتىستى پروبلەما بولعان ەمەس.

- قازاق ۇرپاعى رەتىندە سىزگە قازاق ءتىلى، قازاق مادەنيەتى نە بەردى؟ قازاق ءداستۇر سالتى، مەنتاليتەتى تۋرالى پايىم، كوزقاراسىڭىز قالاي؟

- وتباسىمىزدا قازاق مادەنيەتىنە، ءان-كۇيىنە ەرەكشە قىزىعۋشىلىق بار. تۇتىنۋ بۇيىمدارىن بارىنشا قازاقى ستيلدە بولۋىن قالايمىز. تۇركياداعى تۋىسقاندارىمىز، قوس اجەمنىڭ سونداي-اق ارتتاعى ەلدەن كەلگەن اعايىندار سىيلاعان بۇيىمدار ەرەكشە قاستەرلى. تىلدىك ورتا بولماعان سوڭ ونى يگەرۋ وتە قيىن بولاتىنىن بىلەسىزدەر. اكەم ماقمۇد كوپ جىل كاسىپكەرلىكپەن شۇعىلداندى، قازىر پاريجدەگى قازاق مادەنيەت ورتالىعىنىڭ جەتەكشىسى. انام ءامينا قولى بوس ۋاقىتتا قازاقشا ۇيرەنەم دەۋشىلەرگە ءتىل ۇيرەتۋمەن اينالىسادى. ارتىمنان ەرگەن ياسين ەسىمدى ءىنىم، ديلارا ەسىمدى ءسىڭلىم بار، ءسىڭلىم ۋنيۆەرسيتەتتە وقيدى، ءىنىم ماماندىعى بويىنشا ەڭبەك ەتەدى.

- ەڭبەك جولىڭىز قايدان باستالدى؟ ساياساتقا اياق باسۋىڭىزدىڭ باستى سەبەبى نەدە؟

- جەرگىلىكتى باسقارۋ ماماندىعىن العاننان كەيىن، قالا ومىرىمەن بايلانىستى بارلىق نارسەنى جاقسى ءتۇسىنۋ ءۇشىن بىلىكتىلىگىمدى ۇشتاعىم كەلدى. سودان كەيىن مەن وقىتۋشىلىق بويىنشا ماگيستراتۋرانى ءبىتىردىم، مۇعالىم رەتىندە كونكۋرسقا ءتۇستىم. مەنىڭ دە مۇعالىم بولعانىما 3 جىل تولدى.

- ساياساتتا تاڭداعان باعىتىڭىزعا قىسقاشا توقتالساڭىز؟

- مەنىڭ ساياسي تاڭداۋىما قاتىستى دەسەڭىز، 2014 -جىلى سوتسياليستىك پارتياعا مۇشەلىككە كىردىم. سوتسياليستىك بولۋ - الەمگە بۇرىنعىداي قاناعاتتانىپ قانا قويماي، قوعامدى وزگەرتكىڭىز كەلەدى. سوتسياليستىك يدەيا ادىلەتسىزدىككە قارسى كوتەرىلىستەن دە، جاقسى ءومىر ءۇشىن كۇرەسكە دە بايلانىستى. سوتسياليستىك ءىس- ارەكەتتىڭ ماقساتى - ادامنىڭ تولىق ەمانسيپاتسياسى.

- بۇل جولعى جەتىستىڭىزگە جەتۋ جولىندا قانداي ارەكەت جاسادىڭىز؟ وزگەشە باعدارلاما ۇسىندىڭىز با؟

- مەن ەكى سايلاۋ ناۋقانى كەزىندە، ەڭ باستىسى، كرەيل حالقىمەن جاقىن بولۋدى ماقسات ەتىپ ۇستاندىم. مەن وسى قالادا وسكەندىكتەن ءبىرشاما ادامدى جاقسى تانيمىن، بىلەمىن. مەن ءارقاشان تۋىنداعان ماسەلەلەر ورتاسىندا ءجۇردىم جانە ءاردايىم اتالمىش قالانىڭ ازاماتتارىممەن تىعىز بايلانىستا بولدىم.

ەكىنشى جاعىنان، مەن ساياساتقا جاڭا تىنىس، سەرپىن بەرگىم كەلدى. مەن ءوز جوبالارىمنان جاستاردىڭ ءوزىن- ءوزى تاني بىلگەنىن، قاجەت دۇنيەلەردى بىلگەنىن قالايمىن. مەن ارىپتەستەرىممەن بىرلەسە وتىرىپ 2020 -جىلعا ارنالعان بىرنەشە جۇمىس باعىتىن ۇسىندىق. وندا جاستارعا وقۋدى الاڭسىز جالعاستىرۋعا، اكادەميالىق قولداۋ كۋرستارىنان وتۋگە، تەك ەليتا توپقا عانا ەمەس، بارلىعىنا دا مادەنيەتتى قول جەتىمدى ەتۋگە مۇمكىندىك بەرۋدىڭ جولىن ىزدەدىك… مەن ايەلدەردى قولداۋ، ولاردىڭ دامۋىنا جانە ءومىر سۇرۋىنە كومەكتەسۋ ءۇشىن كۇرەس جۇرگىزەمىن. دەمەك، بەلسەندى، الەۋمەتتىك جانە اسسوتسياتيۆتى ورتادا ءومىر ماندىرەك بولا تۇسەدى بارلىعى گۇلدەيدى. ايتىلعانداردىڭ ءبارى ماعان ءوز ازاماتتارىمنىڭ قولداۋىنا يە بولۋعا مۇمكىندىك بەردى.

- جاڭا قىزمەتىڭىزگە كىرىسكەلى قانداي قيىندىقتار، اۋىرتپالىقتارمەن بەتپە-بەت كەلۋگە تۋرا كەلدى؟

- مەن قىزمەت بابىندا قيىندىقتارعا ءجيى كەزدەسكەن ەمەسپىن. مەن مۇعالىم رەتىندە، بەلسەندى ايەل رەتىندە، انا رەتىندە جانە ساياساتكەر رەتىندە جۇمىسىمدى بىرىكتىرۋ ءۇشىن ۇلكەن ۇيىمشىلدىق پەن ءتارتىپتى قاجەت دەگەندى بەرىك ۇستانۋعا تىرىسامىن. مەن ءار كۇنىمدى جوسپارلاۋىم كەرەك، يمپروۆيزاتسياعا ورىن جوق. الايدا، مەنىڭ ءومىر ءسۇرۋ ىرعاعىم مەنى قۋانتادى جانە قازىرگىدەي بولعانىنا وكىنبەيمىن.

ءبىراق مەن ەشقاشان جوبانى تەز اياقتاماۋدىڭ تاڭدانىسى تۋرالى ايتا الامىن. فرانسيادا جوبالار وتە باياۋ قارقىنمەن جۇرىلەدى. جوبا جۇزەگە اسۋى ءۇشىن بىرنەشە اي نەمەسە بىرنەشە جىل جۇمىس قاجەت. الايدا، مەن وسى 6 جىلدىق مانداتىم كەزىندە ەشنارسەگە وكىنبەۋ جانە ءوزىمنىڭ اياقتالعان جۇمىسىممەن ماقتانباۋ ءۇشىن بار مادەنيەت سالاسىنا بار كۇشىمدى سالعىم كەلەدى.

- جاس ساياساتكەر رەتىندە ەۋرو- وداقتىڭ بولاشاعى، جالپى باتىس الەمىنىڭ، سونىڭ ءىشىن دە فرانسيانىڭ الداعى ونجىلدىقتاعى ساياسي، ەكونوميكالىق، ينتەگراتسيالىق جاي- كۇيىن قالاي ەلەستەتەسىز؟

- ەۋروپانىڭ ارى قاراي باياندى، باقۋاتتى ءومىر ءسۇرۋى ءۇشىن ول ناقتى ەۋروپالىق ساياساتتىڭ جاساۋ، قالىپتاستىرۋ باعىتىندا جۇمىس ىستەۋى كەرەك. ەۋروپالىقتار ەۋروپالىق ساياساتقا قىزىعۋشىلىق تانىتۋى كەرەك، سەبەبى بۇل ۇلتتىق ساياساتتان جوعارى تۇرسا دۇرىس. ءبىراق، وكىنىشكە وراي، ەۋروپالىق ازاماتتار ۇدايى لايىقتى وكىلدەر مەن پارلامەنت دەپۋتاتتارىنتاڭداي الادى دەي المايمىن.

ەۋروپا ازاماتتاردى وداقتىڭ نەگىزگى قامقورشىسىنا اينالدىرا الاتىن الەۋمەتتىك كەلىسىمشارتتى تاڭداۋى كەرەك. ەۋروپا الەمدىك COVID ەپيدەمياسىنا بايلانىستى وتە قيىن كەزەڭدەردى باستان وتكەرىپ جاتىر. سوندىقتان ەۋروپا باسقا دا قيىندىقتارعا دايىندالۋى كەرەك. بۇل دەگەنىمىز بولاشاق ءۇشىن تۇراقتى، تاپجىلمايتىن جۇمىس ورىندارىن قۇرۋعا كەپىلدىك بەرەتىن بىلىكتى زەرتتەۋلەردى، ەكولوگيالىق وتپەلى كەزەڭدى قولداۋدى جانە بولاشاقتاعى وندىرىستەردى پارمەندى قولداۋدى قاجەت ەتەدى.

- بولاشاقتاعى جوسپارلارىڭىزبەن بولىسسەڭىز؟

- مەنىڭ بولاشاققا جوسپارلارىم وتە قاراپايىم. مەن ءوز قالامنىڭ تۇرعىندارىنىڭ تالاپتارىن جۇزەگە اسىرا وتىرىپ، ولاردىڭ كرەيلدە ءومىر سۇرەتىندىكتەرىن ماقتان ەتكىم كەلەدى. قالا كەلبەتىن ارتتىرعىم كەلەدى جانە سول ارقىلى جاستاردىڭ سول جەردە ءوز باقىتتارىن تابۋىنا مۇمكىندىك جاساۋ. سونداي-اق ادامدارعا تولىققاندى دامۋعا مۇمكىندىك بەرەتىن مادەنيەتكە، بىلىمگە جانە وقۋعا قول جەتكىزۋدى قالايمىن.

- فرانسياداعى قازاق نەمەسە تۇرىك دياسپوراسىمەن بايلانىسىڭىز بار با؟

- فرانسياداعى تۇرىك دياسپوراسى ەۋروپانىڭ باسقا ەلدەرىمەن سالىستىرعاندا ونشا كوپ دەۋگە كەلمەيدى. دەگەنمەن مەن ءۇشىن ءتىل، ءدىل جاعىنان جانىما جاقىن كەلەتىن تۇرىك ءتىلى مەن مادەنيەتى مەن ءۇشىن دە مادەني- كوممۋنيكاتيۆتى كەڭىستىك دەسەم بولادى. وتباسىمىزبەن فرانسياداعى قازاق، تۇركى دياسپوراسىنىڭ ءتۇرلى شارالارىنا بەلسەندى ارالاسىپ تۇرامىز. اكەم ماقمۇت جوعارىدا ايتقانىمداي، مادەني ورتالىققا ءتوراعالىق ەتەدى. انام امينە قازاق ءتىلىن ۇيرەنەم دەۋشىلەرگە ءتىل كۋرسىن جۇرگىزىپ تۇرادى. قازاق قىزى رەتىندە انا ءتىلىن يگەرۋ مەنىڭ ءبىر مىندەتىم رەتىندە جوسپارىمدا تۇر. وسى جولعى سايلاۋدا كىمسىڭ؟ دەگەن ساۋالدان كەيىن، ەڭ باستىسى اتاجۇرتىمدا وسىنداي ەرەكشە قولداۋعا يە بولۋىم ماعان ۇلكەن مىندەت جۇكتەدى. مەن قازاقشا ۇيرەنەم دەپ ماقسات ەتىپ قويدىم. قازاقستاننىڭ ءبىر قالاسىمەن كرەيلدى باۋىرلاس قالا ەتسەم دەگەن ۇسىنىس جاساماق ويدامىن. وسىلاي ءوزىمنىڭ كىم ەكەنىمدى اتاجۇرتىمدى، ونىڭ مادەنيەتى مەن جەتىستىگىن تانىتۋ، ناسيحاتتاۋ ارقىلى تانىتسام دەگەن جوسپارىم بار.

- قازاقستاندا بولدىڭىز با؟ قازاق جاستارىمەن، قانداستارمەن بايلانىسىڭىز قانشالىقتى؟

- قازىرگى عالامدانۋ زامانىندا نيەتتەس، مۇددەلەس دوستار تابۋدىڭ جولى وڭاي. وكىنىشكە وراي، قازاقستاندا ءالى بولا المادىم. 2016 -جىلى ناعاشى بابام، التاي قازاقتارىنىڭ ۇلت ازاتتىق قوزعالىسىنىڭ ءىرى تۇلعاسى زۇقا اتامنىڭ الماتىدا وتكەن تويىنا اتا-اناممەن ەرىپ بارۋ ويىمدا بولىپ ەدى، ۋاقىت مۇمكىندىك بەرمەدى. قازاق قانداستارمەن بايلانىسىم بارشىلىق، ءازىر كوبىنە ۆيرتۋالدىق سيپاتتا. ءساتىن سالعاندا اتاجۇرتقا بارىپ، توپىراعىنا اۋناپ قايتۋ جوسپارىمدا بار.

- اتاجۇرتقا تىلەگىڭىز

- ارينە، مەنىڭ اتا- بابالارىم حالقىنىڭ بولاشاعى ءۇشىن جان بەرگەن، ازاتتىقتى اڭساپ بۇلاناي- گيمالاي جوتالارىن كوكتەپ وتكەندەر. سوندىقتان دا ازاتتىق، ەركىندىك دەگەن مەن ءۇشىن دە اسا قاستەرلى ۇعىم. ايتارىم قازاق ەلىنىڭ بولاشاعى باياندى بولسا ەكەن دەپ تىلەيمىن. تۋعان حالقىمنىڭ مارتەبەسى اسقاق، ادامدارى باقىتتى، باقۋاتتى، سالاماتتى بولۋىن تىلەيمىن. بۇعان ءاربىر ازامات، جاستار ءوزىنىڭ شاما- شارقىنشا ۇلەستەرىن قوسسا، ءار اۋىل، قالا وزدەرىنە قولايلى ءبىلىم، ىسكەرلىك، مادەني، يمانى ورتاسىن قالىپتاستىرۋعا اتسالىسۋىن قالار ەدىم. بۇل ءاربىر جانعا ادامي ءارى ازاماتتىق پارىز دەپ سانايمىن

- ۋاقىت ءبولىپ، سۇقبات بەرگەنىڭىزگە راحمەت! سىزگە ومىردە، ساياساتتى ارمانداعان ويلارىڭىزعا جەتە بەرۋگە تىلەكتەسپىز!

- ارنايى كوڭىل بولگەندەرىڭىز ءۇشىن العىس ايتامىن!

سۇقباتتاسقان باباقۇمار حينايات

(2021 –جىل)

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى