استانادا كۇيشىلەر اللەياسى اشىلدى
جاڭا اللەيا ابىلايحان داڭعىلى مەن كۇيشى دينا كوشەسىنىڭ قيىلىسىندا، الماتى اۋدانىنىڭ اۋماعىندا ورنالاسقان.
جينالعاندار اۋەلى «كۇي اناسى» اتانعان دينا نۇرپەيىسوۆانىڭ ەسكەرتكىشىنە گۇل شوقتارىن قويىپ، كۇيشىگە قۇرمەت كورسەتتى.
قازاقستاننىڭ ەڭبەك سىڭىرگەن قايراتكەرى، پروفەسسور، كۇيشى ۇستاز ورىنباي دۇيسەن مەن الماتى اۋدانىنىڭ اكىمى ماقسات سامات ۇلى«كۇيشىلەر اللەياسىنىڭ» لەنتاسىن سالتاناتتى تۇردە قيدى.
«ۇلتىمىزدىڭ كۇي ونەرىنىڭ ساڭلاقتارىنا ارنايى اللەيا اشىلعالى تۇر. بۇل ۇلى دالا وركەنيەتىنە، قازاقتىڭ رۋحاني كەمەلدىگىنە قويىلعان ەسكەرتكىش دەپ باعالاۋعا دا بولادى. كۇيدىڭ اتاۋىنان- اق قاي زاماننىڭ زارى مەن مۇڭى، قۋانىشى ەكەنىڭ بىردەن اڭعارۋعا بولادى. قازاق تاريحىندا قورقىت بابا، كەتبۇعا، سارىسالتان اسانقايعى مەن قازتۋعان سياقتى ۇلى كۇيشىلەردىڭ ۇلى مۇراسى حالىق ساناسىنان وشكەن جوق. قازاق كۇيشىلەرى مەن كومپوزيتورلاردىڭ اتى گرانيت تاسقا قاشالىپ جازىلۋى باياعى كوكتۇرىكتەردىڭ زامانىن ەسكە تۇسىرەدى. كۇلتەگىن مەن بىلگە قاعان جازۋلارى تاسقا قاشالىپ كۇنى بۇگىنگە دەيىن جەتتى. كوكتۇرىكتەردىڭ بىتىك تاسقا جازعان اماناتى قايتا جالعاسىن تاپقانداي. حالىق جادىنان شىقپايتىن 101 ادامنىڭ ەسىمى تاسقا عانا ەمەس، ۇلتىنىڭ جۇرەگىندە جازىلدى دەپ قاراۋىمىز كەرەك»، - دەدى جيىندا ءسوز العان «كۇي اناسى» رەسپۋبليكالىق قورى جانىنداعى اقساقالدار القاسىنىڭ مۇشەسى ءۋاليحان قاليجان.
اللەيانىڭ كىرەبەرىسىنە، ورتاسىنا - قازاق حالقىنىڭ شاڭىراعى، ەكى جاعىنا - ينستاللياتسيالىق ۇلگىدە مىستان قۇيىلىپ جاسالعان دومبىرا مەن قوبىز ورناتىلعان.
سونىمەن بىرگە، الماتى وبلىسى قورداي ەلدى مەكەنىنەن جەتكىزىلگەن، كولەمى 3x2 مەترلىك ءمارمار تاسقا ونەرىمەن كەڭىنەن تانىمال 101 كۇيشىنىڭ اتى قاشالىپ جازىلدى.
قازاقستاننىڭ مادەنيەت قايراتكەرى، ديريجەر، كومپوزيتور نۇرلان بەكەنوۆتىڭ جەتەكشىلىگىمەن ەلۋگە جۋىق جاس كۇيشىدەن قۇرالعان ۇلتتىق اسپاپتار وركەسترى، «ارقا اۋەندەرى» ۇلتتىق انسامبلى سول جەردە كۇي ويناپ، كەلۋشىلەردىڭ كوڭىلىنەن شىعا ءبىلدى.
بەلگى تاستى جاساعان ءمۇسىنشى جالىن باۋرقان، ال يدەيا اۆتورى - پروفەسسور تولەگەن قۋانىشەۆ.
