ءبىر جىلدا بالىق باعاسى قانشا پايىز قىمباتتادى
رەسۋرستىڭ جازۋىنشا، ءبىر جىلدىڭ ىشىندە ەلدەگى بالىق باعاسى 15 پايىز قىمباتتاعان.
«قاڭتار-تامىز ارالىعىندا ەلدە 30,9 مىڭ توننا بالىق ءوندىرىلدى. بۇل بىلتىرعىدان 15,5 پايىز كوپ. «حابار 24» ارناسىنىڭ مالىمەتى بويىنشا، قىزىلوردا وبلىسىندا 15 مىڭ تونناعا جۋىق ءونىم شىعاراتىن 10 بالىق زاۋىتى بار. 2022-جىلدىڭ 8 ايىندا ەلدە باسقا تاسىلمەن دايىندالعان نەمەسە كونسەرۆىلەنگەن بالىقتىڭ، ۋىلدىرىقتىڭ جانە ونىڭ الماستىرعىشتارىنىڭ تەك 6,6 مىڭ تونناسى ءوندىرىلدى. بۇل بىلتىرعىعا قاراعاندا بىردەن 29,7 پايىز از. وسى سەگمەنتتەگى ءونىمنىڭ ۇشتەن بىرىنەن استامى تۇركىستان وبلىسىنا تيەسىلى بولدى: 2,4 مىڭ توننا (43,9+ پايىز). ودان كەيىنگى ورىنداردا باتىس قازاقستان (1,8 مىڭ توننا) مەن شىعىس قازاقستان (561 توننا) وبلىستارى تۇر. قاڭتار-شىلدە ايلارىنىڭ قورىتىندىسى بويىنشا جەرگىلىكتى كومپانيالار وڭدەلگەن جانە كونسەرۆىلەنگەن بالىقتارعا، شايان تارىزدىلەر مەن مولليۋسكالارعا دەگەن سۇرانىستى 53,1 پايىز قامتاماسىز ەتكەن. ەلگە 28,7 مىڭ توننا ءونىم يمپورتتالدى. بۇل بىلتىرعىمەن سالىستىرعاندا 1,8 پايىز كوپ»، - دەپ جازادى Energyprom.
رەسۋرستىڭ مالىمەتىنە قاراعاندا، قولدا بار بالىق ونىمدەرىنىڭ 20,4 پايىز ەكسپورتقا كەتكەن، ول - 12,4 مىڭ توننا. بۇل بىلتىردان 9,3 پايىز ارتىق.
«ىشكى نارىقتا 48,7 مىڭ توننا بالىق ساتىلدى. بۇل تۇرعىدا ءبىر جىلدىق كورسەتكىش وزگەرگەن جوق. قىركۇيەك ايىنىڭ قورىتىندىسى بويىنشا، جاس بالىقتىڭ باعاسى 15 پايىز، مۇزداتىلعان بالىق 15,1 پايىز، ارشىلعان مۇزداتىلعان اسشايان 26,4 پايىز قىمباتتادى. وڭىرلەر اراسىندا بالىق باعاسى پاۆلودار (44,7 پايىز)، قوستاناي (24,7 پايىز) جانە ماڭعىستاۋ (24 پايىز) وبلىستارىندا تىركەلگەن. مۇزداتىلعان بالىق باعاسى ماڭعىستاۋ (43,4 پايىز)، جەتىسۋ (35,2 پايىز) جانە اتىراۋ (29,6 پايىز) وبلىستارىندا ايتارلىقتاي ءوستى. تازارتىلعان مۇزداتىلعان اسشايان باعاسى ماڭعىستاۋ (2,5 ەسە)، اقتوبە (49,4 پايىز) جانە اقمولا (36,4 پايىز) وبلىستارىندا قىمباتتادى»، - دەلىنگەن ساراپتامادا.
