اقتاۋلىق ەگىز قاسىم مەن جومارتتى جۇرت «پرەزيدەنت» دەپ اتايدى
قاسىم مەن جومارت - ءۇيدىڭ ۇلكەنى، 2009-جىلى دۇنيەگە كەلگەن. قاسىم 3,2 كەلى سالماقپەن ءبىرىنشى تۋعان. جومارت ساناۋلى سەكۋندتارعا كىشىرەك، ونىڭ سالماعى 2,8 كەلى بولىپتى. ارتتارىنان ەرگەن ىڭكار مەن كاۋسار ەسىمدى قارىنداستارى بار. ەگىزدەردىڭ ەسىمىن ناعىز اتقامىنەر ازاماتتار بولسىن دەگەن ىرىممەن اجەسى قويىپتى.
«سول جىلدارى قاسىم-جومارت توقايەۆ ەل بولاشاعى ءۇشىن ماڭىزدى لاۋازىمداردا قىزمەت اتقاردى. بىرنەشە ءتىلدى بىلەدى، ديپلومات، بىلىكتى ساياساتكەر، مەملەكەتشىل ازامات. تۋعان ايلارى دا ءبىر. تۇڭعىش نەمەرەلەرىم 22- مامىردا دۇنيەگە كەلگەندە بىردەن «قاسىم-جومارتتاي بولسىن» دەپ تىلەدىم. «جاقسى ءسوز - جارىم ىرىس» دەگەن، بۇگىندە قوس قۇلىنشاعىم مەملەكەت باسشىسىنا ۇقساپ ءوسىپ كەلەدى»، - دەيدى ءزۇلفيا جولداسوۆا.
ەگىزدەر كىشكەنتايىنان زەرەكتىگىمەن كوزگە تۇسكەن. قازىر اقتاۋداعى 11№ مامانداندىرىلعان فيزيكا-ماتەماتيكالىق ليتسەيىنىڭ 8-سىنىبىندا وقيدى. قازاق، ورىس جانە اعىلشىن تىلدەرىندە ەركىن سويلەيدى. ەكەۋى دە ماتەماتيكانى جاقسى كورەدى، ەسەپ-قيساپقا جۇيرىك. سوزگە دە شەشەن بولعىلارى كەلەدى. ول ءۇشىن كوركەم ادەبيەتتى، تاريحتى قىزىعا وقىپ، جاڭالىقتاردان ءاردايىم حاباردار بولىپ جۇرەدى. سپورتتان دا قۇر الاقان ەمەس، بوكسپەن اينالىسادى. ارماندارى دا ءبىر - بولاشاقتا ديپلومات بولۋ جانە پرەزيدەنت قاسىم-جومارت توقايەۆپەن كەزدەسۋ.
بالالارىنىڭ ۇنەمى ىزدەنىستە جۇرەتىنىن، بىلىمگە قۇشتارلىعىن اكەسى ولاردىڭ ءوز ەسىمدەرىنىڭ جاۋاپكەرشىلىگىن سەزىنەتىندىگىندە دەپ ەسەپتەيدى.
«بالالار ءاردايىم ىزدەنىستە جۇرەدى. ءتۇرلى ءبىلىم جارىستارىنا، وليمپيادالارعا قاتىسىپ، جۇلدەلى ورىنداردى يەلەنىپ ءجۇر. مىنەزدەرى دە وتە بايسالدى، كوممۋنيكاتيۆتى، بويلارىندا ديپلوماتتىڭ قاسيەتتەرى بار. قاسىم-جومارت توقايەۆتى ۇلگى تۇتادى، ول تەلەديداردان سويلەگەندە ءار سوزىنە ءمان بەرىپ تىڭداۋعا تىرىسادى. كوپ ءتىل ءبىلۋ ماقساتىندا قوسىمشا ۇيىرمەلەرگە قاتىسىپ، اعىلشىن ءتىلىن جەتىك مەڭگەرىپ ءجۇر. الداعى ۋاقىتتا فرانسۋز، قىتاي تىلدەرىن ۇيرەنگىلەرى كەلەدى»، - دەيدى ەرلان ماۋلەنوۆ.
وقي وتىرىڭىز، ەلىمىزدە قازاقستان ەسىمدى 32 ادام تۇرادى. سونداي-اق، 86 تەڭگە، 26 استانا، 67 ەلباسى بار. ءبىر ادامنىڭ اتى تاۋەلسىزدىك بولسا، تاعى 1 تۇرعىننىڭ ەسىمى - اتازاڭ جانە 1 قىزدىڭ اتى - ارۋ-استانا. ال، بيىلعى ورازا ايىندا دۇنيەگە كەلگەن ۇلدارعا رامازان (1085)، قىزدارعا مەدينا (430) ەسىمى ەڭ كوپ قويىلعان.
