استانادا كىشكەنتاي قىزىن ەلدىڭ كوزىنشە ۇرىپ-سوققان ايەل جازالانادى

بۇگىن الەۋمەتتىك جەلىدە كىشكەنتاي قىزدىڭ باسىن ماشيناعا سوققان ايەلدىڭ ۆيدەوسى تارادى.

اۋەلى ايەل «ماما، مەن جۇمىس ىستەيمىن» دەپ شىرقىراپ جىلاعان جالاڭاياق قىزدى سۇيرەپ كولىككە مىنگىزەدى. سوسىن كولىكتەن شىعارىپ، قىزدىڭ باسىن جانىندا تۇرعان كولىككە سوقتى.

وسىعان قاتىستى استانا قالاسى بويىنشا بالا قۇقىعىن قورعاۋشى ومبۋدسمەن ءاسيما بيمەندينا تۇسىنىك بەردى.

«الەۋمەتتىك جەلىنى مونيتورينگتەۋ كەزىندە بەيمالىم ايەلدىڭ كامەلەتكە تولماعان قىز بالاعا قول جۇمساعانى ءتۇسىپ قالعان ۆيدەو تابىلدى. تەكسەرۋدەن كەيىن بۇلار 52 جاستاعى ايەل مەن ونىڭ 10 جاسار قىزى ەكەنى بەلگىلى بولدى. وقيعانىڭ سەبەبى - قىز جاتتىعىپ جاتقان جەرىنەن ۇيىنە كەتكىسى كەلمەگەن» دەلىنگەن ۋاكىل ۇسىنعان مالىمەتتە.

قالالىق پوليتسيا دەپارتامەنتىنىڭ اقپاراتىنا قاراعاندا بۇل ءىس الماتى اۋداندىق پوليتسيا بولىمىندە اكىمشىلىك قۇقىق بۇزۋ كودەكسىنىڭ 127-بابىمەن تىركەلگەن.

اتالعان باپ اياسىندا 10 نەمەسە 15 ا ە ك كولەمىندە ايىپپۇل سالۋ نەمەسە بەس تاۋلىككە قاماۋ جازاسى قاراستىرىلعان.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى