كانن كينوفەستيۆالىنىڭ جابىلۋ كۇنىندە قازاقستاندىق «اناشىم، مەن ءتىرىمىن» فيلمى كورسەتىلەدى

وسىلايشا ءازيز زايروۆ پەن مۇحامەد مامىروۆتىڭ فيلمى 16 - قازاندا، كانن فەستيۆالى جابىلاتىن كۇنى كورسەتىلەدى، دەپ حابارلايدى قازاقپارات.

سپيكەردىڭ ايتۋىنشا، سوڭعى ءۇش جىلدا بۇل - كانن كينوفەستيۆالىندە ۇسىنىلعان تۇڭعىش قازاقستاندىق فيلم.

«ءبىز كانن كينوفەستيۆالى تۋرالى ءبىلىپ، ءوتىنىم بەرەيىك دەپ شەشتىك. ءبىراز ۋاقىتتان كەيىن پوشتاعا ىرىكتەۋدەن ءوتتى، فيلم فەستيۆالدە كورسەتىلەدى دەگەن حات كەلدى. ولار قاجەتتى ماتەريالداردى، فرانسۋز تىلىندە سۋبتيتر دايىنداۋدى سۇرادى»، - دەدى فيلمنىڭ باس پروديۋسەرى ءازيز زايروۆ.

فيلمنىڭ رەجيسسەرلەرى جانە سەناريشىلەرى - ءازيز زايروۆ پەن مۇحامەد مامىربەكوۆ. باستى رولدەردە - سۇلتاننا شەڭگەل، ادەل ماحمۇتوۆا، ءىلياس اۋتوۆ، اسلانبي مەدەۋلوۆ. قويۋشى رەجيسسەرلەر - مۇحامەد مامىربەكوۆ، ءازيز زايروۆ. قويۋشى- وپەراتور - قازبەك ءامىرجانوۆ. كوركەمدىك جەتەكشىسى - الەكسەي فيليمونوۆ. كومپوزيتور - اسەل وماروۆا. دىبىس رەجيسسەرى - يليا كوروبەينيكوۆ.

«بۇعان دەيىن دوسىم مۇحامەد مامىربەكوۆ ەكەۋمىز «بولۋ نەمەسە بولماۋ»، «قىز بەن تەڭىز» فيلمدەرىن تۇسىردىك. ودان كەيىن «اناشىم، مەن ءتىرىمىن» فيلمى شىقتى.

بۇل تۋىندىلاردى «شەكسىز مۇمكىندىكتەر» الەۋمەتتىك تريلوگياسىنا بىرىكتىردىك. ءبىرىنشى فيلم - اكتەر بولۋدى ارماندايتىن سال اۋرۋىنا شالدىققان جىگىت تۋرالى. ول ءوز ارمانىن گاملەت مونولوگى ارقىلى جۇزەگە اسىرادى. بۇل فيلم جەكە قاراجاتقا تۇسىرىلگەن. سودان كەيىن مەملەكەتتىڭ قولداۋىمەن «قىز بەن تەڭىز» ءفيلمى ءتۇسىرىلدى. ونداعى باستى كەيىپكەر دە تسەرەبرالدى سال اۋرۋىنا شالدىققان قىز. بۇل فيلمدەر جۇلدەلەر مەن ماراپاتتارعا يە بولدى، سونىڭ ىشىندە «قىز بەن تەڭىز» فيلمى ءۇشىن ءبىز مەملەكەت باسشىسى قاسىم-جومارت توقايەۆتىڭ قولىنان سىيلىق الدىق»، - دەپ ءبولىستى رەجيسسەر.

«اناشىم، مەن ءتىرىمىن» - كامەلەتكە تولماعاندار ءىسى جونىندەگى ينسپەكتور ايەل تۋرالى الەۋمەتتىك دراما. پوليتسيا قىزمەتكەرى ساۋلە ىسقاقوۆانىڭ قىزى بالالار ۇيىندەگى بالاعا عاشىق بولعانى ساۋلە مەن ونىڭ كۇيەۋى اراسىندا جانجالعا سەبەپ بولادى. ءبىراق، ءبىر كۇنى قىزى قاتەرلى ىسىككە شالدىعادى...

«بۇل فيلم بارشا انالارعا ارنالعان ءانۇران تارىزدەس. ونكولوگيا ماسەلەسىن دە اشىپ كورسەتكىمىز كەلدى. فيلمدى بارىنشا قىزىقتى، تەرەڭ جانە فيلوسوفيالىق ەتىپ ءتۇسىرۋ ءۇشىن جان-ءتانىمىزدى سالۋعا تىرىستىق. جاۋاپكەرشىلىك جۇگىن ارقالاعان انالاردىڭ وقيعالارىن بايانداماق بولدىق. ونكولوگيا - بۇل اۋرۋ جانە انالاردىڭ يىعىنا تۇسەتىن اۋىر پروبلەمالار مەتافوراسى. شەكسىز ماحابباتىنىڭ ارقاسىندا انالار قيىندىقتاردى جەڭىپ، كۇتپەگەن ەرلىكتەر جاساي الادى. بۇل - انا ماحابباتىنىڭ قۇدىرەتى تۋرالى فيلم. ءتۇسىرىلىم الاڭىندا جاس وسپىرىمدەر مەن ەرەسەك اكتەرلەردەن بارىن سالۋ تالاپ ەتىلدى. باستى رولدەردىڭ ءبىرىن قاتەرلى ىسىككە شالدىققان قىز ويناعان. كاستينگ كەزىندە ول 13 جاستا ەدى. ول كۇردەلى، ەموتسيونالدى، پسيحولوگيالىق سەناريدى وقىپ، ءوز رولىندە ءومىر سۇرۋگە ءماجبۇر بولدى. قاتەرلى ىسىك - كەز كەلگەن بالانىڭ باسىنا تۇسە الاتىن اۋرۋ. انالارعا ارناپ فيلم ءتۇسىرۋدى كوپتەن بەرى ارمانداعانبىز. مەن بالالار ۇيىندە ءوستىم. مەنىڭ انام بولعان ەمەس، ونىڭ نە ەكەنىن بىلمەيمىن. ءبىراق مەن بارلىق انالارعا ءارقاشان قۇرمەتپەن قارايمىن، ولاردىڭ بالالارى ءۇشىن، ولاردىڭ تاربيەسى، دامۋى ءۇشىن قالاي كۇرەسەتىنىن كورەمىن. قۇداي ساقتاسىن، بالاسى اۋىرىپ قالسا، اناسى بالاسىن امان الىپ قالۋ ءۇشىن بارىن بەرەدى»، - دەيدى ءازيز زايروۆ.

25 - قازاندا ءازيز قازىر ەم الىپ جۇرگەن ءۇندىستاننان ەلگە قايتىپ ورالادى. كەلگەن سوڭ، فيلمنىڭ باس پروديۋسەرى تۋىندىنى قازاق كورەرمەنى نازارىنا ۇسىنعىسى كەلەدى.

«ءبىزدىڭ كورەرمەندەر بۇل فيلمدى كورۋى ءتيىس. بۇل ءىرى قالالار عانا ەمەس، بارلىق ايماقتارداعى كورەرمەندەرگە قاتىستى. ءبىز فيلمنىڭ قازاق تىلىندەگى تاماشا نۇسقاسىن دايىندادىق، سونىمەن قاتار، ول سوقىر جانە ناشار كورەتىن كورەرمەندەرگە دە لايىقتالعان. بارلىعىنا ارنالعان كينو. ونى ءبارى كورۋى كەرەك»، - دەپ قوستى ءازيز زايروۆ.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى