ۇياڭدىق پەن ۇيالشاقتىق قىز بالاعا ءمىن بە؟
مەن جوعارعى قاباتتا جاتىرمىن. تومەنگى ورىندا ومىراۋى اشىق-شاشىق، اق كىرگەن شاشى جالبىراعان، ءجۇزىن ءاجىم باسقان، تىرتيتىپ شالبار كيگەن قازاق كەمپىر جاتقان ەدى. كەنەت تەلەفونى شىر ەتە قالدى. سول-اق ەكەن، اجەمىز «كاك سپالا ۆنۋچەنكا، پو كۋشالا، قارنىڭ اشىپ قالماسىن. حولوديلنيكتە ۆسە ەست» دەپ قازاقشا-ورىسشا سارناي جونەلسىن. ورىسشاسى باسىم. قازاقشاسى قويىرتپاق.
سىزگە وتىرىك، ماعان شىن، تۇپ-تۋرا ءبىر ساعات سويلەستى. جۇرت دەمالىپ جاتىر-اۋ دەگەن جوق. كۇن شامامەن ەكىندىگە اۋعان شاق. اجە مەن نەمەرەنىڭ ءسوزىن تىڭداپ جاتىپ: «ءاي، مىنا تۇرىمىزبەن ۇلت بولىپ ۇيىسۋىمىز قيىن-اۋ. نەمەرە ءۇشىن اجە تاربيەسى ماڭىزدى. اجە - التىن دىڭگەك قوي، شىركىن! ابايدى زەرە اجەسى، شوقاندى ايعانىم اجەسى ۇلتتىق بولمىسقا بەيىمدەدى. ۇلتتىق رۋح ايدىنىنا شومىلدىردى. ءتىلدىڭ مايەگىن ىشكىزدى. سونىڭ اسەرىنەن قوس پەرزەنت تە قازاقتى ءسۇيۋدى، قازاققا قىزمەت ەتۋدى بويلارىنا ءسىڭىردى. بۇگىنگى اجەنىڭ سيقى مىناۋ بولسا، جەتىسكەن ەكەنبىز!» - دەپ، تەرەڭ ويعا باتتىم.
بايقاپ كەلەمىن، كەمپىردىڭ قازاقشاسى ءتاپ-ءتاۋىر. كوكشەتاۋ جاقتان ەكەنىن تۇسكى شاي ۇستىندە ايتقان. سول جاقتا ءبىر اۋىلدا مۇعالىم بولىپتى. ورىس ءتىلى مەن ادەبيەتى مامانى. قازىر زەينەتكەر. جاسى پرەزيدەنت توقايەۆپەن شامالاس.
كەشكى اس ۇستىندە «ءوزىڭىز پەداگوگ ەكەنسىز. قازاقشاڭىز دا جاپ-جاقسى. نەمەرەڭىزبەن نەگە قازاق تىلىندە سويلەسپەيسىز؟ قازاقتىڭ ءتىلىن ءسىز بەن ءبىز قورعاماساق، قولداماساق، ول كىمگە كەرەك؟» - دەپ ءبىراز ءپالساپا ايتىپ تاستادىم.
اجەم ساسار ەمەس، ماعان قاباعىن ءتۇيىپ ءبىر قاراپ الدى دا: «قاراعىم، اقىلىڭ وزىڭە. قازاقشاڭ كىمگە كەرەك سەنىڭ؟ قازاقشا وقىعاندا قايدا بارادى؟ بىرىنشىدەن، نەمەرەم قىز بالا. وقۋى وتە جاقسى. اعىلشىنشا دا سويلەيدى. العاشىندا قازاق مەكتەبىنە بەرگەنبىز ونى. ساباعى ناشارلاپ، ۇياڭ بولىپ كەتتى. شۋسترايا قىز ەدى، سىزىلىپ قالدى. كەيىن قۇرىسىن دەپ ورىس مەكتەبىنە اۋىستىردىق. ءسويتىپ، كوزىمىز اشىلدى. ورىسشا وقىعان بالا جەردە قالمايدى ەشقاشان. قىز بالا ءتىپتى دە. ارينە، قازاقشا سويلەيدى. وعان شەكتەۋ قويمايمىز»، - دەپ قاراپ تۇر اجەم.
نە دەيىن، داۋلاسقان جوقپىن. ءتىلىمدى تىستەپ وتىرىپ قالدىم. نە دەگەن تۇسىنىك؟ ۇياڭدىق پەن ۇيالشاقتىق تا قىز بالاعا ءمىن بولعانى ما؟ وسى ءبىر ۇلى قاسيەتتىڭ قىز بالالاردىڭ بويىنان جوعالىپ بارا جاتقانى قاسىرەت ەمەس پە قايتا؟ قايدا بارامىز، اعايىن؟!
