اتىراۋدا ءبىر كۇندە ەكى جۇكتى ايەل اۋرۋحانادا قايتىس بولدى

بۇل تۋرالى وبلىستىق دەنساۋلىق ساقتاۋ باسقارماسىنىڭ باسشىسى اسحان بايدۋاليەۆ ارنايى وتكىزىلگەن وتىرىستا ءمالىم ەتتى.

«اتىراۋ وبلىسىندا 12- قازاندا ەكى انا ءولىمى تىركەلدى. ونىڭ ءبىرى - اتىراۋ وبلىستىق اۋرۋحاناسىندا، ەكىنشىسى - ماقات اۋدانىندا. بۇكىل رەانيماتسيالىق ءىس-شاراعا قاراماستان دارىگەرلەر جۇكتى ايەلدەردى قۇتقارىپ قالا المادى»، - دەدى اسحان بايدۋااليەۆ.

وبلىستىق دەنساۋلىق ساقتاۋ باسقارماسى باسشىسىنىڭ ورىنباسارى جانار سادۋوۆانىڭ ايتۋىنشا، كوز جۇمعان جۇكتى ايەلدىڭ ءبىرى – 33، ەكىنشىسى - 34 جاستا.

ەكەۋىنىڭ دە ارتىندا بالالارى قالدى. ەكەۋى دە ماقات اۋدانىنىڭ تۇرعىندارى بولعان.

«ەكى ءولىم دە جۇكتى ايەلدەردىڭ دەنساۋلىعى ناشارلاۋىنان بولعان. جۇكتى ايەلدەردىڭ ءولىمىنىڭ بولجامدى سەبەبى رەتىندە سەپتيكالىق شوك، ۆيرۋستىق-باكتەريالىق گەنەزيس، سەپتيكالىق پنيەۆمونيا بولۋى مۇمكىن ەكەنى قاراستىرىلىپ وتىر. تۇپكىلىكتى سەبەپتەر قىزمەتتىك تەكسەرۋ، پاتولوگيا-اناتوميالىق اۋتوپسيا ناتيجەسىنەن كەيىن ناقتىلانادى»، - دەدى جانار سادۋوۆا.

باسقارما باسشىسىنىڭ دەرەگىنە سۇيەنسەك، بىلتىر اتىراۋ وبلىسىندا 21 جۇكتى ايەل كوز جۇمعان. ونىڭ ىشىندە 16 ايەل كوروناۆيرۋس ينفەكسياسىنان قايتىس بولعان.

ال، بيىلعى 9 ايدا 5 انا ءولىمى تىركەلگەن. ال، 1- قازاندا ءبىر، 12- قازاندا ەكى جۇكتى ايەل قايتىس بولعانى تىركەلىپ وتىر.

ەسكە سالا كەتەلىك، بۇعان دەيىن اتىراۋ اۋرۋحاناسىندا تۇسىك تاستاعان ايەل قايتىس بولعانىن جازعان ەدىك.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى