ازەربايجاندى وداقتاسىمىز، ستراتەگيالىق سەرىكتەسىمىز دەپ ەسەپتەيمىز - توقايەۆ
پرەزيدەنت ءوزىنىڭ جۋىردا باكۋگە جاساعان ساپارى قازاق-ازەربايجان قارىم-قاتىناسىن جاڭا دەڭگەيگە كوتەرگەنىن اتاپ ءوتتى، دەپ حابارلايدى قازاقپارات اقورداعا سىلتەمە جاساپ.
- ەلىمىزگە كەلىپ، سامميتكە قاتىسقانىڭىز ءۇشىن العىس ايتامىن. ەكىجاقتى قارىم-قاتىناسقا ارنايى توقتالعىم كەلەدى. باكۋگە ساپارىم كەزىندە كورسەتكەن قوناقجايلىعىڭىزعا ريزاشىلىعىمدى بىلدىرەمىن. ءبىزدىڭ كەلىسسوزدەرىمىز تابىستى بولدى جانە شەت مەملەكەتتەردەگى ساياسي جانە ەكونوميكالىق توپتاردىڭ نازارىن اۋداردى. ءبىز ازەربايجاندى وداقتاسىمىز، ستراتەگيالىق سەرىكتەسىمىز دەپ ەسەپتەيمىز. ءارقاشان وسى باعىتتى ۇستانامىز، - دەدى قاسىم-جومارت توقايەۆ.
قازاقستان مەن ازەربايجان پرەزيدەنتتەرى قول جەتكىزىلگەن ۋاعدالاستىقتاردى ساپالى جۇزەگە اسىرۋ ءۇشىن بارلىق قاجەتتى شارالاردى قابىلداۋ جونىندە ۇكىمەتتەرگە تاپسىرما بەرىلگەنىن اتاپ ءوتتى.
- ازەربايجان ءوز ايماعىندا عانا ەمەس، كەڭ گەوگرافيالىق اۋقىمدا دا ماڭىزدى ءرول اتقارادى. قازىر كۇن تارتىبىندە «ورتا ءدالىزدى» دامىتۋ ماسەلەسى تۇر. ءبىز دە وسى فورماتتاعى جۇمىستاردى جالعاستىرۋعا مۇددەلىمىز، - دەدى مەملەكەت باسشىسى.
سونىمەن قاتار پرەزيدەنتتەر ەكى ەلدىڭ مادەني-گۋمانيتارلىق سالاداعى ءوزارا تابىستى ءىس-ارەكەتىن، ونىڭ ىشىندە قازاقستان مەن ازەربايجاننىڭ تاريحي جانە مادەني قۇندىلىقتارىن ىلگەرىلەتۋگە باعىتتالعان ءبىرقاتار بىرلەسكەن جوبانىڭ جۇزەگە اسىرىلۋىن جوعارى باعالادى.
- ءبىز ازەربايجاننىڭ كورنەكتى مەملەكەت قايراتكەرى گەيدار اليەۆ اتىنداعى كوشەنى اۋىستىرۋ تۋرالى ايتتىق. ەلوردامىزدا وعان لايىقتى ورىن بار دەپ سانايمىن. مۇنداي ورىن تابىلدى. مەن ونى ماقۇلدادىم. ەندىگى ماسەلە ۋاقىتتىڭ ەنشىسىندە، - دەدى قازاقستان پرەزيدەنتى.
يلحام اليەۆ ا و س ش ك سامميتىنە شاقىرعانى جانە قازاق حالقىنىڭ ءداستۇرلى قوناقجايلىعى ءۇشىن قاسىم-جومارت توقايەۆقا العىسىن ايتتى.
- باۋىرلاس قازاقستانعا كەلگەنىمە وتە قۋانىشتىمىن. سونداي-اق وتكىزىلگەن سامميتتىڭ وڭ ناتيجەلەرىمەن قۇتتىقتاعىم كەلەدى. بۇل قازاقستاننىڭ حالىقارالىق ارەناداعى ءرولى مەن بەدەلى جوعارى ەكەنىن كورسەتەدى. ەڭ الدىمەن، گەيدار ءالي ۇلى اليەۆتى ەسكە الىپ، قۇرمەت كورسەتكەنىڭىز ءۇشىن العىس ايتقىم كەلەدى. ءسىزدىڭ ساپارىڭىزدان بەرى ءبىز جاقسى جەتىستىكتەر مەن ناتيجەلەرگە قول جەتكىزدىك، - دەدى ازەربايجان پرەزيدەنتى.
سونىمەن قاتار كەزدەسۋ بارىسىندا مەملەكەتتەر باسشىلارى ەكىجاقتى ىنتىماقتاستىقتىڭ باسىم باعىتتارى مەن حالىقارالىق كۇن تارتىبىندەگى وزەكتى ماسەلەلەردى تالقىلادى.
