الماتى تۇرعىنى اكىمنەن قالا ىشىندەگى كولىك بازارىن سىرتقا كوشىرۋدى سۇرادى
اۋەزوۆ اۋدانىنىڭ تۇرعىندارىمەن كەزدەسۋ بارىسىندا قالا تۇرعىنى Car City اۆتوبازارىنا قالا مەن وبلىستان كۇندە مىڭداعان اۆتوكولىك كەلەتىنىن، ولاردىڭ ءتىپتى ءۇيدىڭ اۋلاسىنا دەيىن كىرىپ، كولىك قوياتىنىن، ۇيلەردىڭ ماڭايىندا بوس ورىن قالماعانىن ايتتى.
«وسىعان بايلانىستى كولىك بازارى قالادان اكەتىلسە» دەگەن ءوتىنىشىن جەتكىزدى ول.
ەربولات دوسايەۆ اتالمىش ماسەلەنى شەشۋ ءۇشىن جۇمىس ءجۇرىپ جاتقانىن، دەگەنمەن، ول وڭاي شارۋا ەمەستىگىن العا تارتتى.
«بۇل ماسەلەدە ءبىز ەڭ الدىمەن مەنشىك قۇقىعىنا تاپ بولامىز. وكىنىشكە قاراي، جەردىڭ مەنشىك اكتىلەرى بۇرىن شىعىپ، بەرىلىپ كەتكەن. ەگەر بازاردى باسقا جەرگە كوشىرسەك، وعان جاڭا ورىن تابۋ كەرەك ءارى مەنشىك يەسىنە ونىڭ ورنىنا باسقا نارسەنى ۇسىنۋ كەرەك. الايدا، بۇل ءبىز ەشتەڭە ىستەي المايمىز دەگەن ءسوز ەمەس»، - دەدى قالا اكىمى.
ول قالادا جالعا بەرىلگەن ۋچاسكەلەردى ماقساتسىز پايدالانۋ فاكتىلەرى بار ەكەنىن مالىمدەدى.
«مىسالى، تەحنيكالىق قىزمەت كورسەتۋ ورتالىقتارى مەن ءتۇرلى قۇرىلىستار ەلەكتر جەلىلەرىنە زاڭسىز قوسىلعان. سوندىقتان بۇل نىسانداردى الىپ تاستاۋعا بولادى جانە ول قاجەت. ونىڭ ۇستىنە قىزمەت تۇرلەرى بويىنشا ءبىز نەنىڭ زاڭدى، نەنىڭ زاڭسىز، نە قاجەت، نە قاجەت ەمەس ەكەنىن انىقتاپ الۋىمىز كەرەك. ەندى ءبىز بىرتىندەپ ءبارىن رەتكە كەلتىرە باستايمىز. بۇل جۇمىستى اۋدان اكىمى مەن اۋداندىق پروكۋراتۋراعا تاپسىرامىن»، - دەدى ەربولات دوسايەۆ.
