اقىلبەك كۇرىشبايەۆتىڭ دەپۋتاتتىق وكىلەتتىگى توقتاتىلىپ، جاڭا قىزمەتكە اۋىستى
سەنات ءتوراعاسى ماۋلەن اشىمبايەۆتىڭ ايتۋىنشا، ا. كۇرىشبايەۆ باسقا جۇمىسقا اۋىسۋىنا بايلانىستى دەپۋتاتتىق وكىلەتتىگىن توقتاتۋ جونىندە ءوزى ءوتىنىش جاساعان. ورتالىق سايلاۋ كوميسسياسى بۇل ءوتىنىشتى قاراپ، سەناتقا ءتيىستى ۇسىنىم ەنگىزدى.
«ق ر پارلامەنتى سەناتىنىڭ دەپۋتاتى اقىلبەك قاجىعۇل ۇلى كۇرىشبايەۆ مىندەتتەرىن اتقارۋدى ءوز ەركىمەن بوساتۋ تۋرالى ءوتىنىش بەردى. وسىعان وراي قازاقستاننىڭ ورتالىق سايلاۋ كوميسسياسى سىزدەردىڭ نازارلارىڭىزعا ق ر كونستيتۋتسياسىنىڭ 52-بابىنا ق ر پارلامەنتى جانە ونىڭ دەپۋتاتتارىنىڭ مارتەبەسى تۋرالى ق ر كونستيتۋتسيالىق زاڭىنىڭ 24-بابى 3 جانە 8-تارماقتارىنا سايكەس سەنات دەپۋتاتى اقىلبەك كۇرىشبايەۆتىڭ ءوتىنىش بەرۋىنە بايلانىستى ونىڭ وكىلەتتىگىن مەرزىمىنەن بۇرىن توقتاتۋ تۋرالى ماسەلەنى شەشۋ ءۇشىن ۇسىنىم ەنگىزدى»، - دەدى ق ر ورتالىق سايلاۋ كوميسسياسىنىڭ مۇشەسى شاۆكات وتەمىسوۆ.
دەپۋتاتتار اتالعان قاۋلىنى قابىلدادى.
«اقىلبەك قاجىعۇل ۇلى سەناتتىڭ زاڭ شىعارۋ جۇمىسىنا ءوزىنىڭ سۇبەلى ۇلەسىن قوستى. دەپۋتاتتىق ساۋالدار ارقىلى حالىقتى الاڭداتقان ماڭىزدى ماسەلەلەردى وڭ شەشۋگە دە بەلسەندى اتسالىستى. حاتشى رەتىندە كوميتەت جۇمىسىن ءتيىمدى ۇيىمداستىرۋعا دا زور ەڭبەك ءسىڭىردى. وسى اتقارعان بارلىق جۇمىستار ءۇشىن اقىلبەك قاجىعۇل ۇلىنا سەنات باسشىلىعى اتىنان ريزاشىلىعىمىزدى ءبىلدىرىپ، العىسىمىزدى ايتامىز. دەپۋتات رەتىندە اتقارعان قىزمەتىن جوعارى باعالاي وتىرىپ، پالاتا بيۋروسى اقىلبەك قاجىعۇل ۇلىن سەناتتىڭ قۇرمەت گراموتاسىمەن ماراپاتتادى. قۇرمەت گراموتاسىن تاپسىرۋعا رۇقسات ەتىڭىزدەر. جاڭا قىزمەتىڭىزگە تابىس پەن ساتتىلىك تىلەيمىز»، - دەدى م. اشىمبايەۆ.
سەنات دەپۋتاتى رەتىندەگى وكىلەتتىگى توقتاتىلعان اقىلبەك كۇرىشبايەۆ قاي سالادا جۇمىس ىستەيتىنىن ايتتى.
«وزدەرىڭىز جاقسى بىلەسىزدەر، ءبىزدىڭ ەلىمىز - اگرارلىق مەملەكەت. ءبىزدىڭ بولاشاعىمىز مۇنايعا ەمەس، اگرارلىق سالانىڭ دامۋىنا بايلانىستى. سوندىقتان، الداعى جىلدارى پرەزيدەنت ساياساتىنىڭ شەڭبەرىندە اۋىل شارۋشىلىعى سالاسىندا ۇلكەن سەرپىلىس بولادى. ونى ءبارىمىز بىلەمىز جانە تۇسىنەمىز. ونداي سەرپىلىس بولۋ ءۇشىن بىزگە جاڭا فورماتتاعى كادرلار كەرەك جاڭا تەحنولوگيالارعا اۋىسۋىمىز كەرەك. ول ءۇشىن مەملەكەتىمىزدە حالىقارالىق دەڭگەيدەگى بەلگىلى شەتەلدىڭ عالىمدارىمەن بىرگە زاماناۋي عىلىمي زەرتتەۋ ۋنيۆەرسيتەتى قۇرىلادى. وسى پرەزيدەنتتىڭ جوباسىن ىسكە اسىرۋعا سىزدەردەن رۇقسات سۇراپ، بارا جاتىرمىن»، - دەدى اقىلبەك كۇرىشبايەۆ بۇگىن سەناتتىڭ جالپى وتىرىسىندا.
ەسكە سالا كەتسەك، ق ر پارلامەنتى سەناتىنىڭ دەپۋتاتى اقىلبەك كۇرىشبايەۆتىڭ وكىلەتتىگى مەرزىمىنەن بۇرىن توقتاتىلدى. ا. كۇرىشبايەۆ باسقا جۇمىسقا اۋىسۋىنا بايلانىستى دەپۋتاتتىق وكىلەتتىگىن توقتاتۋ جونىندە ءوزى ءوتىنىش جاساعان.
