ترانسكاسپي حالىقارالىق كولىك باعدارى ينفراقۇرىلىمىن جاڭعىرتۋ ءۇشىن تۇركيا كەلىسىمىن كۇتىپ وتىرمىز - مينيستر
بۇل تۋرالى ق ر يندۋستريا جانە ينفراقۇرىلىمدىق دامۋ ءمينيسترى قايىربەك وسكەنبايەۆ ايتتى، دەپ حابارلايدى قازاقپارات ءتىلشىسى.
«تۇركيا كومپانيالارىمەن بىرگە 9 زاۋىت سالىنىپ جاتىر. 3 زاۋىت وسى جىلدىڭ سوڭىنا دەيىن اشىلادى. تۇرىك كومپانيالارى جەر قويناۋىنا دا قىزىعۋشىلىق تانىتىپ وتىر. بۇل باعىتتا 7 كومپانيا جۇمىس ىستەپ تۇر. تاعى 3 ءىرى كومپانياسى نيكەل جانە باسقا دا كەن ورىندارىنا قىزىعۋشىلىق ءبىلدىردى. قازاقستاننان كاسپيدىڭ ۇستىمەن ازەربايجان، گرۋزيا ارقىلى وتەتىن ترانسكاسپي حالىقارالىق كولىك باعدارى بويىنشا جۇمىس ىستەپ جاتىرمىز. قانداي ينفراقۇرىلىمداردى جاڭعىرتۋىمىز كەرەك، قانداي جۇمىس اتقارۋىمىز قاجەت دەگەن باعىتتا كەلىسىمشارت دايىنداپ، تۇرىك ەلىن كۇتىپ وتىرمىز. قالعان ەلدەرمەن ينفراقۇرىلىم جاساۋعا كەلىستىك. وسىنداي ءىرى-ءىرى جوبالار ىسكە اسىرىلىپ جاتىر»، - دەدى مينيستر اقوردادا ب ا ق وكىلدەرىنىڭ ساۋالىنا وراي.
سونىمەن قاتار ول استانا ارنايى ەكونوميكالىق اۋماعىندا ءبىر زاۋىت سالىنىپ جاتقانىن، قۇرىلىسى وسى جىلدىڭ قاراشا ايىندا تولىعىمەن اياقتالاتىنىن ءسوز ەتتى.
«ءبىر زاۋىت دەپ ساناعانىمىزبەن ىشىندە ءتورت ءتۇرلى ءونىم شىعاراتىن ءوندىرىس وشاقتارى بار. مەديتسينالىق توسەك-ورىن، كرەسلو جانە باسقا دا زاتتار شىعارىلادى»، - دەدى ول.
قايىربەك وسكەنبايەۆ ءسوز سوڭىندا قازاقستان مەن تۇركيا پرەزيدەنتتەرىنىڭ بۇعان دەيىنگى كەزدەسۋىندە ءبىرقاتار تاپسىرما بولعانىن اتاپ ءوتتى.
ولاردىڭ ىسكە اسىرىلۋى بارىسى جايىندا قازاقستان مەن تۇركيا اراسىنداعى جوعارى دەڭگەيدەگى ستراتەگيالىق ىنتىماقتاستىق كەڭەسىنىڭ 4-وتىرىسىندا بايانداما جاسايتىنىن ايتتى.
بۇگىن مەملەكەت باسشىسى قاسىم-جومارت توقايەۆ قازاقستانعا مەملەكەتتىك ساپارمەن كەلگەن تۇركيا رەسپۋبليكاسىنىڭ پرەزيدەنتى رەجەپ تايپ ەردوعاندى ەلوردا اۋەجايىندا كۇتىپ العان ەدى.
قازىرگى ۋاقىتتا اقوردادا مەملەكەت باسشىلارىنىڭ كەزدەسۋى ءوتىپ جاتىر.
ەستەرىڭىزگە سالا كەتەيىك، رەجەپ تايپ ەردوعان ەلىمىزگە ەكى كۇندىك مەملەكەتتىك ساپارى اياسىندا قازاقستان پرەزيدەنتىمەن ەكىجاقتى كەزدەسۋ وتكىزىپ، قازاقستان مەن تۇركيا اراسىنداعى جوعارى دەڭگەيدەگى ستراتەگيالىق ىنتىماقتاستىق كەڭەسىنىڭ 4-وتىرىسىنا قاتىسادى.
كەلىسسوز بارىسىندا وزەكتى وڭىرلىك جانە حالىقارالىق ماسەلەلەر بويىنشا پىكىر الماسىپ، تاراپتار ەكىجاقتى ينۆەستيتسيالىق جانە ساۋدا-ەكونوميكالىق ىنتىماقتاستىقتىڭ پەرسپەكتيۆالارىن تالقىلايدى.
سونىمەن بىرگە، تۇركيا رەسپۋبليكاسىنىڭ باسشىسى ازياداعى ءوزارا ءىس-قيمىل جانە سەنىم شارالارى جونىندەگى كەڭەستىڭ VI سامميتىنە دە قاتىسادى.
