نەلىكتەن كەي ادامدار بور جەگەندى جاقسى كورەدى؟

سونداي-اق سوڭعى كەزدەرى جەلىدە بور جانە توپىراقتى قىتىرلاتىپ جەپ وتىرعانىن تۇسىرگەن ادامداردىڭ ۆيدەولارى كوبەيىپ كەتتى. نەلىكتەن كەي ادامدار بور جەگىسى كەلەدى جانە ونىڭ دەنساۋلىققا اسەرى قانداي؟

بور - ورگانيكالىق مينەرال. ونىڭ نەگىزگى كومپونەنتى - كالتسي كاربوناتى (شامامەن %98). سونداي-اق، ونىڭ قۇرامىندا ماگني كاربوناتى، تەمىر وكسيدتەرى جانە باسقا دا مەتالدار بار.

قاتتى بور جەگىڭىز كەلسە، ونى ارنايى دۇكەندەردەن العان ءجون. قۇرىلىستىق نەمەسە مەكتەپتەگى بوردى جەۋ ۇسىنىلمايدى: ولاردىڭ قۇرامىندا زياندى كومپونەنتتەر مەن بوياۋلار بولۋى مۇمكىن.

قاتتى بور جەگىڭىز كەلسە، مىندەتتى تۇردە ونىڭ سەبەبىن انىقتاۋ قاجەت. دارىگەرگە قارالىپ، قاجەتتى اناليزدەردى تاپسىرۋ قاجەت. ادامنىڭ بور جەگىسى كەلۋىنىڭ نەگىزگى سەبەپتەرىن ۇسىنامىز:

1. انەميا (اعزاعا تەمىر جەتىسپەيدى). قاتتى بور جەگىڭىز كەلە بەرسە، گەموگلابين دەڭگەيىن ءبىلۋ ءۇشىن قان اناليزىن تاپسىرعان ءجون. اعزاعا تەمىر جەتىسپەسە، گەموگلابين دەڭگەيى تومەندەيدى. بۇل كەزدە ادامنىڭ تەرىسى بوزارىپ كەتەدى، تەرىدە جىرىقتار پايدا بولادى، شىرىشتى قابىقتار ۇنەمى قۇرعاي بەرەدى. سونداي-اق ادامنىڭ تاماققا تابەتى بولمايدى، السىزدەنىپ، شارشاي بەرەدى. كەيدە ادام، ءتىپتى، اشۋلانشاق بولىپ كەتەدى.

2. اعزاعا كالتسي جەتىسپەيدى. كالتسي اعزاعا ەكى سەبەپپەن سىڭبەۋى مۇمكىن: باۋىردىڭ اۋىر پاتولوگياسى كەزىندە جانە C، D، E دارۋمەندەرىن جەتكىلىكسىز قولدانۋ كەزىندە. اعزاعا كالتسي جەتىسپەسە، شاش سىنعىش بولا تۇسەدى، تىرناق قابىرشاقتانا بەرەدى جانە ءتىس سىنۋى مۇمكىن.

3. قالقانشا بەز اۋرۋلارى. كەي ەندوكريندى بۇزىلىستار كالتسيدىڭ اعزادان جىلدام شىعىپ كەتۋىنە ىقپال ەتەدى، سوندىقتان ادام ونىڭ ورنىن تولىقتىرىپ، تابيعي مينەرال جەگىسى كەلەدى. بۇل جاعدايدا قالقانشا بەزدى ەمدەۋ كەرەك.

4. جۇكتىلىك. بۇل جاعدايدا ايەل اعزاسىنا كالتسي جەتىسپەۋى نەمەسە تاعامدىق تالعامىنىڭ وزگەرگەن بولۋى مۇمكىن. الدىمەن ءوز دارىگەرىڭىزبەن اقىلداسىڭىز. ەگەر ەشقانداي قارسى كورسەتىلىم (مىسالى، ءىش قاتۋعا بەيىمدىلىك) بولماسا، 1-2 بولىك بور جەۋگە بولادى. باستىسى، تەحنيكالىق ەمەس، اسپازدىق ءتۇرىن تاڭداڭىز.

5. پسيحولوگيالىق تاۋەلدىلىك. پسيحولوگيالىق پروبلەمالارى بار ادام كەيدە بىردەڭە قىتىرلاتىپ وتىرعىسى كەلەدى. ول ونى تىنىشتاندىرادى. مۇنداي ادام كۇنىنە، ءتىپتى، ونىڭ 1 كيلوگرامىن جەپ تاستاي الادى. ەگەر بۇل تاۋەلدىلىكتى وزدىگىنشە جەڭە الماساڭىز، پسيحولوگ كومەگىنە جۇگىنگەن ءجون.

بوردى نەمەن الماستىرۋعا بولادى؟

ەگەر بور جەۋىڭىزدىڭ سەبەبى باۋىر اۋرۋى بولسا، وندا راتسيونىڭىزداعى اششى، مايلى، تۇزدى جانە ءتاتتى تاعامداردى ازايتىڭىز.

ەگەر انەميا بولعاندىقتان، بور كوپ جەپ جۇرگەن بولساڭىز، قۇرامىندا تەمىرى بار ونىمدەر جەۋگە تىرىسىڭىز.

ولارعا مىنالار جاتادى:

- باۋىر؛

- كەپكەن جەمىستەر؛

- جەمىستەر، اسىرەسە، انار، ورىك، المۇرت، الحورى؛

- جۇمىرتقا؛

- ەت.

اعزاعا كالتسي جەتىسپەگەندىكتەن بور جەيتىن بولساڭىز، ونى بالىق، سۇزبە، تەڭىز قىرىققاباتى، جاڭعاقتار، ىرىمشىك جەۋ ارقىلى تولىقتىرا الاسىز.

بوردى كوپ جەۋ نەسىمەن قاۋىپتى؟

ەگەر بوردى از-ازدان جەسەڭىز، ول ادام دەنساۋلىعىنا زيان كەلتىرە قويمايدى. ءبىراق ونى كوپ جانە ءجيى جەۋ مىنا پروبلەمالارعا اكەلۋى مۇمكىن:

- اسقازان-ىشەك جولى جۇمىسىنىڭ بۇزىلۋى (ءىش قاتۋ، قىجىل جانە ت. ب)؛

- ورگاندارعا (وكپە، باۋىر، بۇيرەك) كالتسيناتتاردىڭ ءتۇزىلۋى؛

- قانت ديابەتىنىڭ دامۋى؛

- قان تامىرلار تەسىگىنىڭ تارىلۋى.

وزدەرىن بورجەگىشتەر دەپ اتايتىن ادامدار دا بار. ولار بىرىگىپ، بور تۇرلەرىنىڭ دامدەرىن تالقىلايدى جانە ولاردى كامەراعا قاراپ جەيدى. قىتىرلاتىپ داۋىسىن ەستىتۋگە تىرىسادى. مۇنداي ۆيدەولار ميلليونداعان كورىلىم مەن لايك جينايدى.

massaget.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى