قوجانى «حاسەن-ءجاميلا» فيلمىندە باستى رولدە ويناعان اكتريسا دىبىستاعان

ءبىر قىزىعى فيلمدەگى داۋىس باستى ءرولدى سومداعان نۇرلان سەگىزبايەۆتىڭ ءوز داۋىسى ەمەس. قوجا داۋىسىن كىم دىبىستاعانىن، وعان قاتىستى قانداي قىزىق دەرەكتەر بارىنا شولۋ جاسايىق.

«27 جاستاعى ايەلدىڭ داۋىسى»

«قىزدارعا ايناعا قاراپ سىلانعان سايىن وزدەرىنە-ءوزى سۇلۋ كورىنىپ ءماز بولادى دەيدى. ال مەن شە» دەگەن سوزدەردى ايتقان ايەل ادام ەكەنىنە ءبىرى سەنسە، ءبىرى سەنبەس. «مەنىڭ اتىم قوجا» فيلمىنىڭ قازاق جانە ورىس تىلىندەگى نۇسقاسى بار. الايدا ەكى نۇسقادا دا نۇرلان سەگىزبايەۆتىڭ ءوز داۋىسى ەمەس. اشىق دەرەككوز مالىمەتتەرىندە، اكتەر 8-سىنىپقا دەيىن «ر»، «ل» دىبىسىنا ءتىلى كەلمەگەنى ايتىلادى. سوندىقتان ورىسشا نۇسقاسىن ماسكەۋلىك اكتريسا مارينا ۆينوگرادوۆا، ال قازاق تىلىندە فاريدا ءشارىپوۆا دىبىستاعان ەكەن.

فاريدا ءشارىپوۆا 1936 -جىلى 16-جەلتوقساندا شىڭجاڭ ولكەسى، شاۋەشەك قالاسىندا دۇنيەگە كەلگەن. ال فيلم 1963 -جىلى تۇسىرىلگەن. دەمەك ايگىلى قوجاداعى بالانىڭ داۋىسى ەمەس 27 جاستاعى ايەلدىڭ داۋىسى.

فاريدا ءشارىپوۆا تۋرالى نە بەلگىلى؟

قازاقستاننىڭ ەڭبەك سىڭىرگەن ءارتىسى عازيزا ابدىنابيەۆا سۇحباتتارىنىڭ بىرىندە فاريدا ءشارىپوۆانىڭ داۋىسىن «التىن داۋىسقا» بالاعان.

«وكىنىشتىسى، فاريدا اپايدى قازىرگى جاستار بىلمەۋى مۇمكىن. التىن داۋىس يەسى ەدى عوي! رەجيسسەر ابدوللا قارساقبايەۆتىڭ «مەنىڭ اتىم قوجا« اتتى كينوسىن بارشامىز جاقسى بىلەمىز. وسى فيلمدەگى قوجانىڭ داۋىسىن فاريدا اپاي ورىندايدى. مىنە، قاراڭىز، سودان- اق ونىڭ قانداي تالانتتى اكتريسا بولعانىن باعامداۋعا بولادى»، - دەگەن ەكەن عازيزا ابدىنابيەۆا.

اكتريسا قىتايدا دۇنيەگە كەلسە دە، قىتاي كينوستۋدياسى تۇسىرگەن «حاسەن-ءجاميلا» كوركەم فيلمىندە باستى رولدە ويناپ، ونەرىمەن تانىلعان. وسىلايشا، 1955 -جىلى قازاقستانعا ورالعان. 1959 -جىلى قۇرمانعازى اتىنداعى الماتى مەملەكەتتىك كونسەرۆاتورياسىن ءبىتىرىپ، م. اۋەزوۆ اتىنداعى قازاق اكادەميالىق دراما تەاترىنا قابىلدانعان. جارتى عاسىردان اسا ۋاقىت بويى وسى تەاتردا ونەر كورسەتكەن. ول دۋبلياج سالاسىنا دا قاجىرلى ەڭبەك سىڭىرگەن. سونىڭ ايقىن دالەلى - وسى «مەنىڭ اتىم قوجا» فيلمى.

نۇكەتاي مىشبايەۆانىڭ ايتۋىنشا، احمەت جۇبانوۆ قىتايعا ساپارىندا «حاسان- ءجاميلا» فيلمىن كورىپ، «مىنا قىزدى قازاقستانعا الۋ كەرەك» دەگەن ەكەن. وسىلايشا، قازاقستانعا كەلۋگە ىقپال ەتكەن.

فاريدا ءشارىپوۆا ەل اراسىندا «دۋبلياج پاتشايىمى» دەگەن اتاۋعا يە بولعان. ءبىر قىزىعى ول قىتايدان كەلگەندە، ورىس ءتىلىن جاقسى مەڭگەرمەگەن ەكەن. كىتاپتاردى جيناپ، جاتتاعان ەكەن. ول قازاقشا سويلەۋ مانەرىن، ينتوناتسياسىن، اۋەزىن قاراپ جاتتاعان. وسى قابىلەتىن دامىتۋ ءۇشىن دۋبلياجعا بارعان. ءسويتىپ، قازاق كينودۋبلياجىنىڭ حاس شەبەرىنە اينالعان.

Massaget.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى