بالاعا مەكتەپتەن شىققان سوڭ قانداي سۇراقتار قويعان دۇرىس؟
وكىنىشكە وراي، بۇل اتا- انا مەن بالانىڭ قاتىناسىنا جانە جاقىندىعىنا جاعىمسىز اسەر ەتەدى. سوندىقتان بالا سىزبەن اڭگىمە ايتقىسى كەلۋى ءۇشىن جانە ونىڭ مەكتەپتەگى جاعدايىن ءتۇسىنۋ ءۇشىن وعان مەكتەپتەن كەيىن قانداي سۇراقتار قويۋ كەرەگىن بىلگەن ءجون.
ءۇزىلىس كەزىندە سىنىپتاستارىڭمەن نە وينادىڭدار؟
بۇل سۇراق ارقىلى بالاڭىزدىڭ ۋاقىتتى قالاي وتكىزەتىنىن بىلەسىز جانە ونىڭ ەستە ساقتاۋ قابىلەتىن جاتتىقتىراسىز. سونداي-اق كىم جەڭگەنىن جانە قاي ويىن وعان قاتتىراق ۇناعانىن سۇراساڭىز بولادى.
قالاي ويلايسىڭ، سىنىپتاستارىڭنىڭ ىشىندە كىم دارىگەر بولا الادى؟
دارىگەر، مۇعالىم، ءورت ءسوندىرۋشى - بۇل سۇراققا ناقتى مىنەز بەن داعدىنى قاجەت ەتەتىن كەز كەلگەن ماماندىقتى قويا الاسىز. بۇل بالامەن بىرگە قيالداۋعا مۇمكىندىك بەرەدى جانە بالاڭىز اينالاسىنداعىلاردىڭ قانداي قابىلەتتەرىن جوعارى باعالايتىنىن بىلە الاسىز. سونداي-اق بۇل اڭگىمەدەن ونىڭ سىنىپتاستارىمەن قارىم-قاتىناسىن انىقتاۋعا بولادى.
مەكتەپتەگى ەڭ سۇيىكتى جەرىڭ؟
بالا بۇل سۇراققا سىنىپتىڭ ءىشى، ءدالىز، كىتاپحانا نەمەسە اس ءۇي دەپ جاۋاپ بەرۋى مۇمكىن. ءبىراق كەيدە بالا مەكتەپتەگى ادام كوپ جۇرمەيتىن جانە تىنىش بۇرىشتاردى تاڭدايدى. مىسالى، سىنىپتارى از ءدالىزدىڭ ءبىر شەتى. مۇنداي كەزدە بالا نە ءۇشىن ءدال سول جەردى ۇناتاتىنىن سۇراپ كورىڭىز. كەيدە بالا سىنىپتاستارىنان نەمەسە ولارمەن بولاتىن جانجالدان قاشىپ، وسىنداي جەرلەردە وتىرادى.
بۇگىن مەكتەپتە كۇلكىلى جاعداي بولدى ما؟
ساباق كەزىندە ونى نە كۇلدىرتكەنىن نەمەسە نە نارسە كوڭىلىن كوتەرگەنىن سۇراڭىز. بۇل مەكتەپكە بارۋ ونى قۋانتاما ما، جوق پا ەكەنىن انىقتاۋعا كومەكتەسەدى. ەگەر بىرنەشە كۇن قاتارىنان بالا پوزيتيۆتى جانە جاعىمدى ەشنارسە ەسكە تۇسىرە الماسا، نەگە ولاي ەكەنىن انىقتاعان ءجون.
تۇسكى اس كەزىندە سىنىپتاستارىڭمەن نە تۋرالى اڭگىمە ايتتىڭدار؟
بۇل سۇراق ارقىلى بالاڭىزدى دوستارىمەن نە ورتاقتاستىراتىنىن بىلە الاسىز. ەگەر ول جالعىز جانە ۇندەمەي تاماق ءىشۋدى قالاسا، ونىڭ سەبەپتەرىن انىقتايتىن ۋاقىتتىڭ كەلگەنى.
بۇگىن قانداي جاڭا نارسە (نەمەسە اقپارات) ءبىلدىڭ؟
بۇل سۇراقتى بالاعا اپتاسىنا ءبىر نەمەسە ەكى رەت قويۋعا بولادى. بۇل ارقىلى بالاڭىز ساباقتى قانشالىقتى جاقسى تىڭدايتىنىن جانە ەستە ساقتايتىنىن بىلەسىز. ءبىراق تەك مەكتەپ باعدارلاماسىنا نەگىزدەلۋدىڭ قاجەتى جوق. سىنىپتاستارىنان العان اقپارات تا ونىڭ قىزىعۋشىلىقتارى جايلى ايتا الادى.
مەكتەپتىڭ قانداي ەرەجەلەرىن بىلەسىڭ؟
بۇل ارقىلى بالانىڭ مەكتەپ ءتارتىبى جايلى قانشالىقتى بىلەتىنىن جانە ول ەرەجەلەرمەن كەلىسە مە، جوق پا ەكەنىن انىقتايسىز. ودان «نەنى وزگەرتەر ەدىڭ» دەپ تە سۇراۋعا بولادى.
