تۇركىستاندا انالوگى جوق «التىن دومبىرا» ساقتاۋلى تۇر - ۆيدەو

ورتالىقتىڭ عىلىمي قىزمەتكەرى ايمان ميرزابەكوۆانىڭ ايتۋىنشا، دومبىرانىڭ ءىشى اعاشتان جاسالعان. ال ءبىرىنشى قاباتى كۇمىسپەن قاپتالىپ، ۇستىڭگى جاعى التىن جانە بريلليانت تاستارمەن كومكەرىلگەن. شىنى ۆيترينا ىشىنە قويىلعان ۇلتتىق اسپاپتى مۋزەيگە كەلۋشىلەر ەركىن تاماشالاي الادى.

«التىن دومبىرانى» تۇركىستاندىق ايتىسكەر اقىن بەكارىس شويبەكوۆ 2021 -جىلى «تاۋەلسىزدىك قاسيەتىم، قاستەرلىم!» اتتى رەسپۋبليكالىق اقىندار ايتىسىندا جەڭىپ العان بولاتىن. سودان تۇركىستانعا كەلگەن سوڭ، «التىن دومبىرانى» «ۇلى دالا ەلى» ورتالىعىنا سالتاناتتى تۇردە تابىستادى. سالتاناتتى شاراعا حالىقارالىق ايتىس اقىندارى مەن جىرشى تەرمەشىلەر وداعىنىڭ ءتوراعاسى ءجۇرسىن ەرمان، ايتىستىڭ ءادىلقازى القالارى، قازاقستاننىڭ حالىق اقىنى ءاسيا بەركەنوۆا، «التىن دومبىرا» يەگەرى بەكارىس شويبەكوۆ جانە مينيسترلىكتىڭ وكىلدەرى قاتىستى» - دەيدى ول.

جالپى التىن دومبىرانىڭ سالماعى 4 كەلىگە جۋىق. سونداي-اق، ونى جاساۋ ءۇشىن 4,5 كەلى كۇمىس، 300 گرام التىن، 15 دانا بريلليانت، 300 گرام مىس جانە اعاش پايدالانىلعان. ۇزىندىعى 98 س م، ەنى 24 س م قۇرايدى. سىرتقى قورابىن جاساۋعا اعاش پەن قولا جانە التىن قولدانىلعان. قازاقستاندا انالوگى جوق ۇلتتىق اسپاپتاعى بارلىق جۇمىس زەرگەرلەردىڭ قولىمەن جاسالعان.

«دومبىرا تاۋلىك بويى باقىلاۋدا، وعان قول تيگىزۋگە بولمايدى. «التىن دومبىرا» اقىننىڭ تۋعان وڭىرىندە كەلەسى جىلعى جەڭىمپاز انىقتالعانشا ساقتالادى. سونداي-اق وڭىرىمىزدە ءتۇرلى مادەني- تانىمدىق ءىس-شارالار وتكىزىپ، بىرەگەي تاريحي جانە مادەني مۇرامىزدى دارىپتەۋ، قۇندىلىقتارىن ارتتىرۋ بويىنشا جۇمىستار جۇرگىزىلىپ كەلەدى»، - دەيدى ورتالىق باسشىسى گۇلجانات دۇيسەنبايەۆا.

بۇگىندە التىنمەن اپتالعان ۇلتتىق اسپاپتى كورۋ ءۇشىن ورتالىققا كەلۋشى تۇركىستاندىقتار كوبەيگەن. ءتىپتى، قالاعا كەلگەن تۋريستەردە ارنايى تاماشالاپ، تامسانىپ كەتەدى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى