باس پروكۋراتۋرا ديزەلدىڭ قىمباتتاۋىنىڭ سەبەبىن انىقتادى
«باعا وسىمىنە مۇناي بەرۋشىلەردىڭ ايلا-شارعىسىنىڭ سالدارىنان ونىڭ جاساندى كوتەرىلۋى ىقپال ەتكەن. ماسەلەن، ۇساق بەرۋشىلەر (جالپى نارىقتىڭ %25 ىن الادى) جاعدايدى پايدالانىپ، كوتەرمە باعانى ءوسىرىپ، مارجانى جاساندى تۇردە ارتتىرعان. ولاردىڭ قىزمەتى مونوپولياعا قارسى زاڭنامامەن رەتتەلمەيدى. ويتكەنى تاۋار نارىعىنداعى ۇلەسى تومەن جانە كوتەرمە باعا شەكتى باعامەن شەكتەلمەيدى»، - دەپ جازىلعان جاۋاپتا.
باس پروكۋروردىڭ مالىمەتى بويىنشا، جاساندى ارەكەتتەردىڭ كەسىرىنەن ءبىر ليتر ديزەلدىڭ باعاسى 500 تەڭگەگە دەيىن جەتكەن.
«قولدانىستاعى شەكتى بولشەك ساۋدا باعاسى 230-260 تەڭگە بولعان كەزدە كەيبىر بەرۋشىلەر ديزەل وتىنىن كوتەرمە باعامەن 260 تەڭگەدەن استام باعاعا، جەكە جاعدايلاردا - 360-413 تەڭگەگە ساتقان. جەكەلەگەن وڭىرلەردە ديزەل وتىنىنىڭ كوتەرمە باعاسى 1 ليتر ءۇشىن 450-500 تەڭگەگە جەتتى. بۇل شاعىن بولشەك جانار-جاعارماي قۇيۋ ستانسالارىنىڭ ساتىلىمنىڭ تيىمسىزدىگىنە بايلانىستى وتىن ساتۋىن توقتاتا تۇرۋعا جانە ناقتى وتىن تاپشىلىعىنا الىپ كەلدى»، - دەپ جازادى بەرىك اسىلوۆ.
ەنەرگەتيكا مينيسترلىگىنىڭ باس پروكۋراتۋراعا ۇسىنعان دەرەكتەرى بويىنشا تاپشىلىق ءورشىپ تۇرعاندا 633 جانارماي قۇيۋ ستانساسى باعا تەڭسىزدىگىنىڭ باسىلعانىن كۇتىپ، قولدا بار ديزەلدى ساتپاعان.
«بۇگىنگى كۇنى مۇنداي ج ق س سانى 267 گە دەيىن قىسقاردى. قازىرگى ۋاقىتتا قارجى مونيتورينگى اگەنتتىگىنىڭ اۋماقتىق بولىمشەلەرى تابيعي مونوپوليالاردى رەتتەۋ وڭىرلىك دەپارتامەنتتەرىنە جانار-جاعارمايعا شەكتى باعانى كوتەرۋدىڭ انىقتالعان فاكتىلەرى بويىنشا اكىمشىلىك قۇقىق بۇزۋ تۋرالى كودەكستىڭ 171-بابى بويىنشا كىنالى ادامداردى اكىمشىلىك جاۋاپقا تارتۋ ءۇشىن 43 ماتەريال جىبەردى (بۇگىنگى كۇنى جالپى سوماسى 1,4 ميلليون تەڭگەگە ايىپپۇل سالىنىپ، 17 ادام جاۋاپقا تارتىلدى)»، - دەلىنگەن باس پروكۋروردىڭ جاۋابىندا.
