قازاق ايەلىنەن شىققان العاشقى جۋرناليستى بىلەسىز بە؟
ىبىراي التىنسارين نەگىزىن قالاعان ورىس مەكتەبىندە وقىپ، كەيىن تورعايداعى ايەلدەر گيمنازياسىندا وقۋىن جالعاستىرادى. ۋاقىت وتە كەلە مۇعالىمنىڭ كومەكشىسى بولىپ جۇمىس ىستەگەن.
اتا-اناسى ەركىنەن تىس ونى وزگە ادامعا اتاستىرىپ قويادى. بۇل شەشىمگە كەلىسپەگەن نازيپا قۇلجانوۆا پەتەربۋرگ قالاسىنىڭ جوعارعى سوتىنا ارىز جازادى. بۇنىڭ ءوزى - نازيپا اپامىزدىڭ كوزى اشىق، كوكىرەگى وياۋ، ءبىلىمدى ءارى باتىل قىزدارىمىزدىڭ ءبىرى بولعانىنا تاعى دالەل.
سەبەبى ول زاماندا اتاستىرىپ قويسا، قارسىلىق ءبىلدىرۋ تۇگىلى، ارىز جازۋ ەشكىمنىڭ ويىنا كەلمەگەن. ال بۇل جاعدايدا ءتىپتى العاشقى رەت ايەل تەڭسىزدىگىنە بايلانىستى سوت جۇرگىزىلدى.
كەيىننەن قۇداي قوسقان جارى نۇرعالي قۇلجانوۆپەن تانىسىپ، ءبىرىن-ءبىرى ۇناتىپ، قوسىلادى. ەكەۋى بىرگە 1902 -جىلى سەمەي قالاسىنا كوشىپ كەلىپ، مۇعالىمدەر سەمينارياسىندا ۇستازدىقپەن اينالىسادى. نازيپا قۇلجانوۆانىڭ الدىنان مۇحتار اۋەزوۆ، قانىش ساتبايەۆ، جۇسىپبەك ايماۋىتوۆ جانە الكەي مارعۇلان سەكىلدى ۇلى تۇلعالارىمىز ءبىلىم نارىمەن سۋسىنداپ وتكەن. مەنىڭ ويىمشا، نازيپا سەگىزباي قىزىنىڭ نازيپا قۇلجانوۆا بولىپ قالىپتاسۋى وسى كەزدەن باستالادى.
ءتىپتى، سەمەيدە قۇرىلعان ورىس-گەوگرافيالىق قوعامىنا نۇرعالي قۇلجانوۆپەن بىرگە قاتىسۋشى بولىپ، الىندى. ايتا كەتەتىن جايت، 137 قاتىسۋشىنىڭ اراسىندا تەك جالعىز ايەل - وسى نازيپا قۇلجانوۆا بولعان.
1914 -جىلدىڭ قاڭتار ايىنىڭ 26-جۇلدىزىندا اباي قۇنانبايەۆتىڭ قايتۋىنا 10 جىل بولۋىنا وراي قوس تىلدە ادەبي كەش وتكىزەدى. نازيپا قۇلجانوۆا - ورىس حالقىنا ابايدىڭ ولەڭدەرىن اۋدارعان اباي تانۋشى. ول الاشتىڭ ارىستاندارىمەن ءجىتى ارالاسىپ وتىرعان. ءتىپتى احمەت بايتۇرسىن ۇلى، سۇلتانماحمۇت تورايعىروۆ نازيپا اپامىزعا ارناپ ولەڭ جولدارىن ارناعان.
قازاق حالقىنىڭ كوزى اشىق، ءبىلىمدى بولعانىن اڭساپ، انا مەن بالا اراسىنداعى قارىم-قاتىناس پەن بالا تاربيەسىنە اسا كوڭىل ءبولىپ، كىتاپ جازىپ قالدىرعان. قازاق جۋرناليستيكاسىنىڭ العاشقى قارلىعاشتارىنىڭ ءبىرى، مەكتەپكە دەيىنگى پەداگوگيكانىڭ نەگىزىن سالۋشى عالىم، كورنەكتى اعارتۋشى، قوعام قايراتكەرى نازيپا قۇلجانوۆا جايلى قازىرگى جاستارىمىزدىڭ بىلمەيتىندىگى كوڭىلگە قاياۋ تۇسىرەتىندىگى راس. نازيپا قۇلجانوۆا، الاشتىڭ ارىستاندارىنداي قازىرگى تاڭنىڭ وزىندە دە جاستارىمىز بولسا، قازاقستاننىڭ دامي بەرەتىندىگىنە كۇمانىم جوق!
