قازاقستاننىڭ سىرتقى ىستەر ءمينيسترى ىستانبۇل مەن دۋشانبەگە بارادى

بۇل تۋرالى ق ر سىرتقى ىستەر مينيسترلىگىنىڭ رەسمي وكىلى ايبەك سمادياروۆ ايتىپ بەردى.

«17- قازاندا ىستانبۇل قالاسىندا ق ر پرەمەر- ءمينيسترىنىڭ ورىنباسارى - سىرتقى ىستەر ءمينيسترى مۇحتار تىلەۋبەردى تۇركى مەملەكەتتەرى ۇيىمىنا مۇشە مەملەكەتتەردىڭ سىرتقى ىستەر مينيسترلەرى كەڭەسىنىڭ بەيرەسمي وتىرىسىنا قاتىسادى. شارا بارىسىندا بيىلعى قاراشا ايىندا سامارقاند قالاسىندا جوسپارلانعان ت م ۇ مەملەكەتتەرى باسشىلارىنىڭ سامميتىنە دايىندىق ماسەلەلەرىن قاراۋ جانە سامميت بارىسىندا قول قويىلاتىن قۇجاتتاردىڭ جوبالارىن تۇپكىلىكتى كەلىسۋ كۇتىلىپ وتىر»، - دەدى رەسمي وكىل مينيسترلىكتە وتكەن بريفينگتە.

تۇركى مەملەكەتتەرىنىڭ ۇيىمى قازاقستاننىڭ باستاماسىمەن 2009 -جىلى ازەربايجاننىڭ ناحچىۆان قالاسىندا قۇرىلعان. ت م ۇ حاتشىلىعى ىستانبۇل قالاسىندا ورنالاسقان.

قازىرگى ۋاقىتتا ۇيىمعا ازەربايجان، قازاقستان، قىرعىزستان، تۇركيا جانە وزبەكستان كىرەدى. ماجارستان مەن تۇرىكمەنستاننىڭ باقىلاۋشى مارتەبەسى بار.

سونىمەن بىرگە، مۇحتار تىلەۋبەردى 18-19- قازاندا دۋشانبە قالاسىندا «تەرروريزمگە قارسى كۇرەس جانە تەرروريستەردىڭ ترانسشەكارالىق قوزعالىسىن بولدىرماۋ ماقساتىندا شەكارا قاۋىپسىزدىگى جونىندەگى حالىقارالىق جانە وڭىرلىك ىنتىماقتاستىق» اتتى جوعارى دەڭگەيدەگى حالىقارالىق كونفەرەنسياعا بارادى.

«بۇل شارانىڭ نەگىزگى ماقساتى - شەكارا قاۋىپسىزدىگىن قامتاماسىز ەتۋ، تەرروريستەر مەن تەرروريستىك توپتاردىڭ قوزعالىسىنا جول بەرمەۋ، ماڭىزدى ماسەلەلەر بويىنشا ىنتىماقتاستىقتى دامىتۋ. ەكى كۇندىك كونفەرەنسيانى تاجىكستان ۇكىمەتى، ب ۇ ۇ- نىڭ كونترتەرروريستىك باسقارماسى (ب ۇ ۇ ك ت ب)، ب ۇ ۇ- نىڭ ورتالىق ازيا ءۇشىن پريەۆەنتيۆتىك ديپلوماتياسىنىڭ وڭىرلىك ورتالىعى، ەۋروپالىق وداق (ە و)، ەۋروپاداعى قاۋىپسىزدىك جانە ىنتىماقتاستىق ۇيىمى (ە ق ى ۇ)، سونداي- اق ساۋد ارابياسى كورولدىگى جانە قاتار مەملەكەتى بىرلەسىپ ۇيىمداستىرادى»، - دەدى ا. سمادياروۆ.

اۆتور

ايجان سەرىكجان قىزى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى