پەتروپاۆلدا الىپ بالا دۇنيەگە كەلدى

سالماعى بەس كەلىدەن اساتىن نارەستەنى پەتروپاۆلدىق ايەل دۇنيەگە اكەلدى، دەپ حابارلايدى قازاقپارات ءتىلشىسى.

س ق و دەنساۋلىق ساقتاۋ باسقارماسى باسپا ءسوز قىزمەتىنىڭ مالىمەتىنشە، 7- قازان كۇنى وبلىستىق پەريناتالدى ورتالىقتا «الىپ» ءسابي تۋعان. ەر بالانىڭ سالماعى - 5100 گرام. ول پەتروپاۆل تۇرعىنىڭ ەكىنشى بالاسى، ايەل ءسابيدى كەسار تىلىگىنسىز ءوزى تۋعان. بۇل بيىلدىققا وڭىردە ومىرگە كەلگەن العاشقى الىپ بالا.

«ءبىزدىڭ دارىگەرلەردىڭ بىلىكتىلىگى مەن كاسىبيلىگى ارقاسىندا انانى امان-ەسەن بوساندىرىپ الدىق. قازىرگى ۋاقىتتا نارەستەنىڭ دە، ايەلدىڭ دە جاعدايى جاقسى، ۇيىنە جىبەرىلدى. مۇنداي شىمىر بالالار وتە سيرەك دۇنيەگە كەلەدى، ورتالىقتا جىلىنا ءبىر-ەكەۋى عانا تۋادى. جالپى 4 مىڭ گرامنان اسسا - ءىرى، ال 5 مىڭ گرامنان اسسا - الىپ بالا دەپ ەسەپتەلەدى»، - دەيدى س ق و كوپسالالى اۋرۋحاناسى پەريناتالدىق ورتالىقتىڭ ديرەكتورى ەلەنا كاليۋجنايا.

وتكەن اپتادا وبلىستىق پەريناتالدى ورتالىقتا 89 ءسابي دۇنيەگە كەلسە، سونىڭ 49 ى - ەر بالا.

جالپى بيىلعى توعىز ايدا 3415 نارەستە دۇنيە ەسىگىن اشتى، ونىڭ 54 ءى - ەگىزدەر.

ەكو ارقىلى 108 بالا تۋعان. سونداي-اق 10 ءسابيدىڭ سالماعى تۋعاندا 4 كەلىدەن جوعارى بولعان.

ەسكە سالا كەتەيىك، ءبىر جەتى بۇرىن الماتىدا سالماعى 5 كەلىدەن استام قىز بالا دۇنيەگە كەلگەن ەدى.

الماتىنىڭ 2№ پەرزەنتحاناسىندا 32 جاستاعى ايەل جۇكتىلىكتىڭ 39 اپتاسىندا پاتولوگيا بولىمىنە ءتۇسىپ، سالماعى 5328 گرام، بويى 60 سانتيمەتر ءسابيدى دۇنيەگە اكەلدى.

«مۇنداي جاعدايلار وتە سيرەك كەزدەسەدى. ايەل ەش قيىندىقسىز بوساندى. قازىر اناسى مەن نارەستەنىڭ جاعدايى جاقسى. ءۇش كۇن پەرزەنتحانادا جاتىپ، ۇيىنە شىعارىلدى»، - دەيدى باس دارىگەردىڭ ورىنباسارى مىندەتىن اتقارۋشى گۇلنار كۋرەنوۆا.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى