تۇركىستاندىق تۇرعىن ەگىن شارۋاشىلىعىنا قولايلى قۇرال ويلاپ تاپتى
تۇركىستان وبلىسى، كەلەس اۋدانىنداعى جولباسشى ەلدى مەكەنىنىڭ تۇرعىنى ىرىسداۋلەت تاڭىربەرگەنوۆ قولمەن تۇقىم ەگۋ قۇرىلعىسىن ويلاپ تاپتى. قولدان قۇراستىرىلعان قۇرال ون ادامنىڭ جۇمىسىن اتقارۋعا قاۋقارلى. سوندىقتان، ديقانداردىڭ ۋاقىتى مەن شىعىنىن ۇنەمدەيدى.
«بۇل قۇرىلعى نەگىزىنەن قىرىققابات ۇرىعىن جىلىجايعا ەگۋگە ارنالعان. ءبىز جاقتا كوپشىلىك ەرتە كوكتەمنەن قىرىققابات ەگەدى. جۇمىسقا سۇرانىس قاراشا، جەلتوقسان ايلارىندا كوبەيەدى. قۇرىلعىمىز وتە ىڭعايلى. ءبىر داننەن ارتىق جىبەرمەيدى. قازىر قولدانىستا 4 ءتۇرى بار، اۋقىمىنا قاراي تاپسىرىس قابىلداي بەرەمىز»، - دەيدى ىرىسداۋلەت تاڭىربەرگەنوۆ.
شارۋا قۇرالدىڭ العاشقىسىن وسىدان 5 جىل بۇرىن جاساپ شىققان. جوباسى ناتيجە كورسەتكەن سوڭ جان-جاقتان سۇرانىس تۇسە باستاپتى. اسىرەسە، ەگىن شارۋاشىلىعىمەن اينالىساتىن سارىاعاش، ماقتاارال، جەتىساي اۋداندارىنان تاپسىرىس بەرىپ، جاساتاتىندار كوپ.
