قورشاعان ورتاعا قامقورلىق تۋعان جەرگە دەگەن سۇيىسپەنشىلىكتى ارتتىرادى - توقايەۆ
بۇل تۋرالى مەملەكەت باسشىسى قاسىم-جومارت توقايەۆ پاۆلودار وبلىسى جۇرتشىلىعىمەن كەزدەسۋىندە ايتتى، دەپ حابارلايدى قازاقپارات اقورداعا سىلتەمە جاساپ.
«پاۆلودار مەن ەكىباستۇز جاستارى «ecoStudentKZ» رەسپۋبليكالىق ەكولوگيالىق چەللەندجىن قولداپ، ستۋدەنتتەردىڭ ساياباقتار مەن گۇلزارلاردى تازارتقانىنان حاباردارمىن. قورشاعان ورتاعا قامقورلىق تۋعان جەرگە دەگەن سۇيىسپەنشىلىكتى ارتتىراتىندىقتان، مۇنداي ءىس-شارالار كوبىرەك بولۋى ءتيىس دەپ ەسەپتەيمىن.
سوندىقتان، مەنىڭ ۇسىنىسىممەن استانا مەن الماتى قالالارىندا «قوقىسسىز تازا تابيعات» اتتى جالپىۇلتتىق اكسيا باستالدى. بۇل يگى ءىس تابيعاتقا نەمقۇرايلى قارامايتىن ازاماتتاردى بىرىكتىرۋگە ارنالعان. بۇل باستاماعا قوعامدىق ۇيىمدار، ازاماتتىق بەلسەندىلەر، ستۋدەنتتەر مەن ەرىكتىلەر قوسىلاتىنىنا سەنىمدىمىن»، - دەدى پرەزيدەنت.
