كولىكتى تەحنيكالىق تەكسەرۋ ورتالىقتارىنا تالاپ كۇشەيەدى

«2019 -جىلدان باستاپ اۆتوكولىك سانى 3,9 ميلليوننان 5 ميلليونعا دەيىن ءوستى. ونىڭ ىشىندە شەتەلدىك تىركەۋدەگى كولىكتەر دە بار. بۇعان قوسا، اۆتوپارك ەسكىرىپ جاتىر. ەلىمىزدەگى %50 پايىزدان استام كولىكتەردىڭ پايدالانۋ مەرزىمى 20 جىلدان اسىپ كەتكەن. ياعني، توزىعى جەتكەن»، - دەدى ىشكى ىستەر ءمينيسترى ۇكىمەتتىڭ بۇگىنگى وتىرىسىندا.

سونىمەن بىرگە، م. احمەتجانوۆ اۆتوكولىكتەردىڭ تەحنيكالىق جاعدايىنا ءتيىستى باقىلاۋ جۇرگىزىلمەيتىنىن ايتتى.

«وزدەرىڭىز بىلەسىزدەر، تەحنيكالىق تەكسەرۋ ورتالىقتارىن اشۋعا قويىلاتىن تالاپتار تومەندەتىلدى. 2016 -جىلى ولاردى اشۋ ءتارتىبى ليتسەنزيالاۋدان حابارلاما تۇرىنە وزگەردى. 2018 -جىلى بۇل قىزمەتكە رۇقسات بەرۋ باقىلاۋى جويىلدى. بۇل جاعداي كولىكتى تەحنيكالىق بايقاۋدان جالعان وتكىزىپ، تالوندار بەرۋ پراكتيكاسىنا اكەپ سوقتى. بىلتىر سىبايلاس جەمقورلىققا قارسى قىزمەت وسىنداي 350 مىڭ جالعان قۇجات جاساپ، 600 ميلليون تەڭگە زاڭسىز تابىس تاپقان ۇيىمداسقان قىلمىستىق توپتى ۇستادى»، - دەدى ۆەدومستۆو باسشىسى.

وعان قوسا، سوڭعى 4 جىلدا تەحنيكالىق جايدايعا بايلانىستى بايقاۋدان وتپەي قالعان كولىكتەردىڭ سانى ەكى ەسەگە ازايعان.

«بۇل ارينە، ۇلكەن كۇمان تۋدىرادى. ويتكەنى كولىكتەردىڭ تەحنيكالىق رەگلامەنت تالاپتارىنا ساي كەلمەۋىنە بايلانىستى 106 مىڭ جۇرگىزۋشى جاۋاپقا تارتىلعان. سونداي- اق، تەحنيكالىق بايقاۋدان وتپەگەن 80 مىڭ جۇرگىزۋشىگە ايىپپۇل سالىندى. كەزىندە بۇل فۋنكتسيا كاسىپكەرلىك سالاسىنا بەرىلگەن بولاتىن. ءبىراق، پروتسەدۋرانى جەڭىلدەتەمىز دەپ، كوپتەگەن تەرىس سالدارعا جول بەردىك. جول اپاتتارى كوبەيىپ، جەمقورلىق ارتتى. وسىعان بايلانىستى، يندۋستريا مينيسترلىگىنە اۆتوكولىكتى جالعان تەكسەرۋ فاكتىلەرى ءۇشىن تەحنيكالىق بايقاۋ وپەراتورلارىنىڭ جاۋاپكەرشىلىگىن كۇشەيتۋدى ۇسىنامىز» ، - دەدى مارات احمەتجانوۆ.

بۇعان دەيىن سپيكەر جىل سايىن ەلىمىزدە 13 مىڭ جول- كولىك وقيعاسى بولاتىنىن، 2 مىڭنان استام ادام قازا تاۋىپ، 18 مىڭ ادام جاراقات الاتىنىن ايتقان ەدى.

سونىمەن بىرگە مارات احمەتجانوۆ اۆتومەكتەپتەردىڭ وقىتۋ ساپاسىن سىنعا الدى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى