الماتى اۋەجايىنىڭ قىزمەتكەرلەرى جەلىدەگى ۆيدەودان كەيىن جازالاندى
بۇعان قاتىستى اۋەجايدىڭ باسپا ءسوز قىزمەتى تۇسىنىك بەردى، دەپ حابارلايدى قازاقپارات ءتىلشىسى.
الەۋمەتتىك جەلى پايدالانۋشىسى الماتى اۋەجايىندا جۇك تيەۋشىلەردىڭ جۇكتى لاقتىرعان ۆيدەوسىن جاريالادى.
اۋە ايلاعىنىڭ باسپا ءسوز قىزمەتى ۇشاتىن رەيستەردىڭ بىرىندە جۇكتى (جولاۋشىلار باگاجىن ەمەس) تيەۋ تالابى بۇزىلعانىن راستادى.
«جۇكتى ابايسىز تيەگەن قىزمەتكەرلەر تارتىپتىك ەسكەرتۋلەر الدى. مۇنداي قاتەگە جول بەرمەۋ ءۇشىن اۋەجايداعى بارلىق جۇك تيەۋ قىزمەتكەرىنە نۇسقاۋ جانە جۇكتى دۇرىس سۇرىپتاۋ بويىنشا جادىنامالار بەرىلدى. جۇكتى تيەۋ پروتسەدۋراسىنىڭ دۇرىستىعىن باقىلاۋ ءۇشىن قوسىمشا تەكسەرۋلەر جۇرگىزىلىپ جاتىر»، - دەپ حابارلادى اۋەجايدىڭ باسپا ءسوز قىزمەتىنەن.
