قازاقستان كومىر ستانسيالارىن گازعا كوشىرۋگە مۇددەلى - ءاليحان سمايىلوۆ
كەزدەسۋدە تاراپتار قازاقستاننىڭ جاھاندىق ەنەرگەتيكالىق قاۋىمداستىقپەن ىنتىماقتاستىعىن نىعايتۋ ماسەلەلەرىن تالقىلادى.
ءاليحان سمايىلوۆ الەمدىك سالالىق قوعامداستىقتىڭ سەنىمدى جانە جاۋاپتى مۇشەسى رەتىندە قازاقستاننىڭ پوزيتسياسىن نىعايتۋ ءۇشىن ۇكىمەت بارلىق قاجەتتى شارالاردى قابىلداپ جاتقانىن اتاپ ءوتتى.
ماسەلەن، ەلىمىز كليماتتىڭ وزگەرۋى جونىندەگى پاريج كەلىسىمىن راتيفيكاتسيالادى جانە 2030-جىلعا قاراي پارنيكتىك گازدار شىعارىندىلارىن %15 عا قىسقارتۋ بويىنشا مىندەتتەمەلەردى موينىنا الدى، سونداي-اق قازىرگى ۋاقىتتا 2060-جىلعا دەيىن كومىرتەگى بەيتاراپتىعىنا قول جەتكىزۋ ستراتەگياسىن ازىرلەپ جاتىر.
«قازاقستان كومىر ستانتسيالارىن گازعا كوشىرۋ، مۇناي-گاز حيمياسى مەن سۋتەگى ەنەرگەتيكاسىن دامىتۋ بويىنشا ىنتىماقتاستىققا مۇددەلى. وسىعان بايلانىستى ءبىز دۇنيەجۇزىلىك مۇناي كەڭەسىنىڭ ساراپتامالىق باعالاۋىن قاراستىرۋعا ءارقاشان دايىنبىز»، - دەدى پرەمەر-مينيستر.
سونىمەن قاتار ۇكىمەت باسشىسى 2022-جىلعى 29- قىركۇيەك پەن 2- قازان ارالىعىندا الماتىدا د م ك VII جاستار فورۋمىن وتكىزۋدىڭ ماڭىزىن اتاپ ءوتتى، وندا جاھاندىق ەنەرگەتيكاعا كوشۋ، دەكاربونيزاتسيالاۋ جانە تومەن كومىرتەكتى دامۋ ماسەلەلەرى قارالادى. الەمنىڭ 29 ەلىنەن 700 دەن استام دەلەگات قاتىسادى. ءوز كەزەگىندە پەدرو ميراس قازاقستان ۇكىمەتىنە اتالعان ءىس-شارانى وتكىزۋگە جانە جالپى وڭىردەگى ۇيىمنىڭ جۇمىسىنا قولداۋ كورسەتكەنى ءۇشىن العىس ايتتى.
«بىزدە كوپتەگەن قىزىقتى جوبالار جۇزەگە اسىرىلىپ جاتىر. اتاپ ايتقاندا، ءبىز جاس ماماندارعا بۇكىل الەمدەگى بولاشاق ارىپتەستەرىمەن سالالىق بايلانىس ورناتۋعا كومەكتەسۋ ءۇشىن ۋنيۆەرسيتەتتەرمەن جۇمىس ىستەيمىز»، - دەدى پەدرو ميراس.
ايتا كەتسەك، دۇنيەجۇزىلىك مۇناي كەڭەسى – ب ۇ ۇ جانىندا اككرەديتتەلگەن كوممەرتسيالىق ەمەس ۇيىم، ونىڭ ماقساتى - مۇناي جانە گاز ونەركاسىبىنىڭ نەگىزگى ماسەلەلەرىن تالقىلاۋ ءۇشىن جاعداي جاساۋ. ۇيىمعا 59 ەل مۇشە، ولاردىڭ ۇلەسىنە الەمدىك مۇناي مەن گازدى ءوندىرۋ جانە تۇتىنۋدىڭ %95 دان استامى تيەسىلى. قازاقستان 2008-جىلى د م ك- نىڭ تولىق قۇقىقتى مۇشەسى بولدى.
