تابيعاتى اسەم، تاماعى ءدامدى: ديماشتىڭ كونسەرتىنە كەلگەن شەتەلدىكتەردىڭ اسەرى

ولاردىڭ كوپشىلىگى قازاقستان تۋرالى اسەرلەرى تۋرالى ايتتى، دەپ حابارلايدى قازاقپارات ءتىلشىسى.

«ءبىز ديماشتىڭ كونسەرتىنە دۇيسەنبى كۇنى سلوۆاكيادان ارنايى ۇشىپ كەلدىك. بۇرىن ءساۋىر ايىندا پراگادا ونىڭ كونسەرتىندە بولعانبىز. بىزگە ونىڭ ونەرى قاتتى ۇنايدى. قازىر ءبىز 20 ادامبىز جانە ءبىز قازاقستانعا العاش رەت كەلىپ وتىرمىز. العان اسەرىمىز كەرەمەت. مۇنداعى تابيعات وتە ادەمى، تاماعى ءدامدى، ونىڭ ۇستىنە ءبىز جىلقى ەتىن جەپ كوردىك. ءبىز الماتىدا كوك بازار، كوكتوبە مەن كولسايعا باردىق، ەندى مەدەۋگە بارماقشىمىز»، - دەدى سلوۆاكيادان كەلگەن قوناقتار ياروسلاۆا مەن يننا.

فرانسيا مەن ا ق ش-تان كەلگەن قوناقتار دا قازاقستاننىڭ تابيعاتىنا ءتانتى بولدى. ولار دا ەلىمىزگە العاش كەلگەن. سۇيىكتى انشىلەرىنىڭ جەكە كونسەرتىنە بىرنەشە كۇن بۇرىن ۇشىپ كەلگەن.

ديماشتىڭ قازاقستاندىق جانكۇيەرلەرى از ەمەس. كەيبىرەۋلەر ونىمەن 10 جىلدان استام ۋاقىت تانىس. ءانشىنىڭ جانكۇيەرلەرى ساۋلە، شولپان جانە گۇلناردىڭ كوپ ادامنىڭ اراسىنان ەرەكشە كوزگە ءتۇستى. ولار ءانشىنىڭ پورترەتى بار بىردەي فۋتبولكالارمەن ءجۇردى جانە قولدارىندا شارف بولدى.

قىزداردىڭ ايتۋىنشا، ولار سۇيىكتى انشىلەرىنىڭ كونسەرتتەرى قاي جەردە وتسە دە، ولاردى جىبەرمەۋگە تىرىسادى.

«ءبىز بۇل كونسەرتتىڭ سۇيىكتى قالامىزدا ءوتۋىن ۇزاق كۇتتىك. بىزگە ديماشتىڭ بارلىق اندەرى ۇنايدى»، - دەدى ولار.

ەسكە سالايىق، الماتىدا ديماش قۇدايبەرگەننىڭ «STRANGER» اتتى جەكە كونسەرتى ءوتتى. بۇل ديماشتىڭ الماتىدا وتكىزگەن العاشقى كونسەرتى ءوتتى.

سونداي-اق ديماش قۇدايبەرگەننىڭ كونسەرتى كەزىندە الماتى پوليتسياسى كۇشەيتىلگەن رەجيمدە جۇمىس ىستەدى. ياعني، شوۋ كەزىندە قوعامدىق ءتارتىپ پەن جول قاۋىپسىزدىگىن قامتاماسىز ەتۋگە 2,5 مىڭنان استام ءتارتىپ ساقشىسى جۇمىلدىرىلدى.

اۆتور

دۋمان ارعىنگەلدى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى