مەملەكەت باسشىسى الماتىدا ب ۇ ۇ- نىڭ ايماقتىق ورتالىعىن اشۋدى ۇسىندى

بۇل تۋرالى قازاقستان پرەزيدەنتى قاسىم- جومارت توقايەۆ بىرىككەن ۇلتتار ۇيىمى باس اسسامبلەياسى 77-سەسسياسىنىڭ جالپى دەباتىندا ايتتى، دەپ حابارلايدى قازاقپارات.

«ورتالىق ازيا تۋرالى ايتار بولساق، ءبىز ونىڭ قازىردىڭ وزىندە حالىقارالىق ىنتىماقتاستىق ءۇشىن مول مۇمكىندىكتەرى بار ايماق ەكەنىن ەستە ۇستاۋىمىز كەرەك. ورتالىق ازياداعى ارىپتەستەرىمىزبەن بىرگە ايماقتى ودان ءارى دامىتۋ ماقساتىندا ءوزارا ساياسي ءىس- ارەكەتتى نىعايتۋعا جانە ەكونوميكالىق بايلانىستاردى تەرەڭدەتۋگە نيەتتىمىز. ءبىز تاتۋ كورشىلىك قارىم- قاتىناستاردى ساقتاۋعا جانە ىنتىماقتاستىقتى ءارتاراپتاندىرۋعا بەيىلدىمىز»، - دەدى قاسىم- جومارت توقايەۆ.

مەملەكەت باسشىسى بۇل تۇرعىدا ماڭىزدى تابيعي جانە اۋىل شارۋاشىلىعى رەسۋرستار، ادامي كاپيتال جانە ترانزيتتىك الەۋەت ەسكەرىلگەنىن ايتتى.

«ءبىز - شىعىس پەن باتىستىڭ، وڭتۇستىك پەن سولتۇستىكتىڭ اراسىنداعى ارالىق نارىقپىز. ءبىز كليماتتىڭ وزگەرۋى، ارال تەڭىزى، سۋ رەسۋرستارىن ۇتىمدى پايدالانۋ، شەكارانى دەليميتاتسيالاۋ، ەكسترەميزمگە قارسى كۇرەس جانە ايماقىشىلىك ساۋدانى كەڭەيتۋ ماسەلەلەرىن قامتيتىن وڭىرلىك كۇن تارتىبىندەگى ماسەلەلەردى شەشۋ ءۇشىن بارلىق مۇددەلى تاراپتارمەن بىرلەسكەن جۇمىستاردى جالعاستىرۋعا نيەتتىمىز. سوندىقتان الماتى قالاسىندا ب ۇ ۇ- نىڭ ورتالىق ازيا مەن اۋعانستان ءۇشىن ورنىقتى دامۋ ماقساتى جونىندەگى ايماقتىق ورتالىعىن اشۋ ماڭىزدى دەپ ەسەپتەيمىز»، - دەدى پرەزيدەنت.

قاسىم- جومارت توقايەۆ قازاقستان اۋعانستاننىڭ بولاشاعىن كورشى ەلدەرمەن بەيبىت قارىم- قاتىناستا بولاتىن شىنايى تاۋەلسىز، بەيتاراپ، ءبىرتۇتاس، دامىعان مەملەكەت رەتىندە كورگىسى كەلەتەنىن اتاپ ءوتتى.

«سوندىقتان اسا ماڭىزدى گۋمانيتارلىق كومەك كورسەتە وتىرىپ، وسى ەلدە مەملەكەتتىلىك قالىپتاسۋىنىڭ كۇردەلى پروتسەسىن قولدايمىز»، - دەدى مەملەكەت باسشىسى.

ق ر پرەزيدەنتى قاسىم- جومارت توقايەۆ سويلەگەن سوزىندە ب ۇ ۇ- نى رەفورمالاۋ قاجەتتىگى تۋرالى پىكىر ءبىلدىردى.

«ءبىز تەك كۇش جۇمىلدىرا وتىرىپ قانا قازىرگى زاماننىڭ سىن- قاتەرلەرىنە توتەپ بەرە الاتىنىمىزعا سەنىمدىمىن.

ورتاق ماقساتىمىزعا قول جەتكىزۋ ءۇشىن ءبىز مىناداي باعىتتاردا ارەكەت ەتۋگە ءتيىسپىز.

وتكەن جىلدارداعى كوپتەگەن جانە كوبىنە ءوزارا بايلانىستى داعدارىستار جاھاندىق باسقارۋدا ايتارلىقتاي كەمشىلىكتەر بار ەكەنىن كورسەتتى. ولار ب ۇ ۇ- نى جاڭعىرتۋ جانە رەفورمالاۋ قاجەت ەكەنىن ايقىنداپ بەردى»، - دەدى پرەزيدەنت.

قاسىم- جومارت توقايەۆ ب ۇ ۇ الداعى سىن- قاتەرلەرگە جانە تۋىندايتىن مۇمكىندىكتەرگە دايىن بولۋعا ءتيىس دەپ ەسەپتەيدى.

«وسىعان بايلانىستى قازاقستان باس حاتشىنىڭ «ءبىزدىڭ ورتاق ماسەلەمىز» اتتى بايانداماسىندا ايتىلعان ۇسىنىستاردى قولدايدى.

بىزگە ب ۇ ۇ جارعىسىنىڭ ەرەجەلەرىن بەكىتۋگە، كوپجاقتىلىققا تىڭ سەرپىن بەرۋگە، قولدانىستاعى مىندەتتەمەلەردىڭ جۇزەگە اسىرىلۋىن كۇشەيتۋگە، جاڭا سىن- قاتەرلەرگە قاتىستى ناقتى شەشىمدەردى كەلىسۋگە جانە ۇيىمعا مۇشە مەملەكەتتەردىڭ ءوزارا سەنىمىن قالپىنا كەلتىرۋگە زور مۇمكىندىك تۋىپ تۇر.

ءبىز كەلەسى جىلى ۇيىمعا مۇشە مەملەكەتتەر مينيسترلەرىنىڭ كەزدەسۋى اياسىندا وتەتىن كونسۋلتاتسيالارعا قاتىسۋدى، سونداي- اق 2024 -جىلى بولاشاق سامميتىن اسىعا كۇتەمىز»، - دەدى مەملەكەت باسشىسى.

اۆتور

ەسىمجان ناقتىباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى