كۇلاش بايسەيىتوۆا كۇيشى دينامەن وتە جاقسى قارىم-قاتىناستا بولعان - ايتقالي جايىموۆ
24 جاسىندا ك س ر و حالىق ءارتىسى اتانعان كۇلاش بايسەيىتوۆانىڭ تۋعانىنا بيىل 110 جىل تولىپ وتىر. قازاق وپەراسىنىڭ نەگىزىن سالۋشىلاردىڭ ءبىرى، مەملەكەتتىك سىيلىقتىڭ لاۋرەاتى، كورنەكتى وپەرا ءانشىسى، دراما اكتريساسى، قوعام قايراتكەرى كۇلاش بايسەيىتوۆانىڭ ورنى تاريحتا التىن ارىپپەن ساقتالدى.
بۇلبۇل ءانشى بالا كەزىنەن حالىق اندەرىن تاماشا ورىنداۋىمەن، بويىنداعى ارتىستىك شەبەرلىگىمەن كوزگە تۇسە باستاعان. قىسقا عانا عۇمىرىندا «قازاقتىڭ بۇلبۇلى» اتانعان تالانتتى ءانشى - ەل اۋزىندا قالعان اڭىز تۇلعالاردىڭ ءبىرى. ول قازاقستاندىق جانە شەتەلدىك وپەرادا سان- قىرلى وبرازداردى سومدادى، ونىڭ ىشىندە ەۆگەنيي برۋسيلوۆسكييدىڭ «قىز جىبەك» وپەراسىندا جىبەكتىڭ، احمەت جۇبانوۆ پەن لاتيف حاميديدىڭ «اباي» وپەراسىندا اجار بەينەسىن، پەتر چايكوۆسكيدىڭ «ەۆگەني ونەگين»، دجاكوما پۋچچيندىڭ «چيو-چيو سان» وپەرالارىندا باستى رولدەردى وينادى. وسى رولدەر ارقىلى كورەرمەننىڭ ىستىق ىقىلاسىنا بولەندى.
«بۇلبۇل» كونسەرتى قارسانىڭدا قازاق وركەسترىنىڭ كوركەمدىك جەتەكشىسى جانە باس ديريجەرى - قازاقستان رەسپۋبليكاسىنىڭ ەڭبەك سىڭىرگەن قايراتكەرى، «پاراسات» وردەنىنىڭ يەگەرى، پروفەسسور ايتقالي جايىموۆ پىكىرىن ءبىلدىردى.
«كۇلاش اپا ەلىمىزدىڭ اتىن اسقاقتاتقان، حالىق ماقتانىشىنا اينالعان، قايتالانباس داۋىس يەسى. بۇلبۇل ءانشى 1936 -جىلى قازاق مادەنيەتىنىڭ ون كۇندىگىن وتكىزۋ ءۇشىن ەلىمىزدىڭ ونەرپازدارىمەن بىرگە ماسكەۋگە اتتانادى. ونىڭ ورىنداۋشىلىق شەبەرلىگى وتە جوعارى باعالانىپ، كوپتىڭ قوشەمەتىنە بولەنگەن بولاتىن. كونسەرتىمىزدى «بۇلبۇل» دەپ اتاۋىمىز بەكەر ەمەس، سەبەبى اسەم ءۇندى كۇلاش اپامىز قالىڭ جۇرتشىلىققا «بۇلبۇل» ەسىمىمەن تاڭىلعان ەدى. كەيىنگى ۇرپاق تالانتتى ونەر يەسى ەسىمىن ەشقاشان ۇمىتپايدى دەپ سەنەمىز.
كۇلاش اپانىڭ رەپەرتۋارى وتە كەڭ جانە باي. ءبىر كونسەرت باعدارلاماسىندا بارلىق رەپەرتۋاردى ورىنداۋ مۇمكىن ەمەس. كۇلاش اپامىز كۇي اناسى دينا شەشەيمەن وتە جاقسى قارىم- قاتىناستا بولعان، سول سەبەپتەن دينانىڭ «اسەم قوڭىر» كۇيىن ەنگىزىپ وتىرمىز. جامبىل اتانىڭ «كۇلاشقا» ءانى، ەۆگەنيي برۋسيلوۆسكييدىڭ «قىز جىبەك» وپەراسىنان «گاككۋ»، لاتيف حاميديدىڭ «قازاق ۆالسى» مەن «بۇلبۇل»، مۇقان تولەباۆەتىڭ «ءبىرجان مەن سارا» وپەرالارىنان ايتىس، «اباي» وپەراسىنان اجار ارياسى، «قىز جىبەك» وپەراسىنان «شەگەنىڭ تەرمەسى» ورىندالادى.
سونداي-اق، كۇلاش بايسەيىتوۆا قۇرمانعازى وركەسترىمەن تىعىز بايلانىستا ەدى. ولار العاشقى گاسترولدىك ساپارلارعا بىرگە بارعان. سونى ەسكەرە وتىرىپ، قۇرمانعازى بابامىزدىڭ «سارىارقا» كۇيىمەن كونسەرتىمىزدى اياقتايمىز»، دەپ اتاپ ءوتتى ايتقالي جايىموۆ.
كونسەرتتە قازاقستان رەسپۋبليكاسىنىڭ ەڭبەك سىڭىرگەن قايراتكەرلەرى: ارايلىم راحىم قىزى، سۆەتلانا ايتبايەۆا، سۇندەت بايعوجين، بيبىگۇل جانۇزاق، «دارىن» مەملەكەتتىك جاستار سىيلىعىنىڭ لاۋرەاتى التىنبەك ءابىلدا، حالىقارالىق جانە رەسپۋبليكالىق بايقاۋلاردىڭ لاۋرەاتتارى فەرۋزا راحمەتوۆا، ايگەرىم امانجولوۆا، ايگەرىم وراز، تالعات اللابيرينوۆ، بوتاگوز ءتاشىموۆا ونەر كورسەتتى.
قازاق وركەسترىنىڭ باس ديريجەرى - ايتقالي جايىموۆ. ديريجەر - مادەنيەت قايراتكەرى نۇرلان بەكەنوۆ.
