بوكس الەمى گولوۆكين- كانەلو تريلوگياسى تۋرالى نە دەپ جاتىر؟
كەزدەسۋ اياقتالعان سوڭ دا ساراپشىلار، بوكسشىلار ءتۇرلى پىكىر ايتىپ جاتىر. ءبىرى كانەلونى سىناپ جاتسا، ەندى ءبىرى گولوۆكين قارتايدى دەيدى.
Massaget.kz ءتىلشىسى جەكپە-جەك تۋرالى قىزىق پىكىرلەردى جيناپ شىقتى.
«كارەراسى كەرەمەت بولدى»
امەريكالىق اتى اڭىزعا اينالعان كىشى روي دجونس گولوۆكيننىڭ كەرەمەت كارەراسى بولعانىن ايتىپ، وعان ساتتىلىك تىلەدى.
«گولوۆكين قولىنان كەلگەننىڭ ءبارىن كورسەتتى. دەسە دە، جاسى دا اسەر ەتەدى. ول قارسىلاسىن جەڭۋگە تىرىستى، ءبىراق قولىنان كەلمەدى. مەنىڭ ويىمشا، باستاپقىدا ول اندرە ۋوردپەن كەزدەسسە جاقسى بولار ەدى، ءبىراق ول كانەلونى تاڭدادى. سول ءۇشىن ونى قۇرمەتتەۋ كەرەك. ونىڭ كاسىپقوي بوكستاعى كارەراسى كەرەمەت بولدى، مەن وعان ءومىرىنىڭ كەلەسى كەزەڭىندە بارلىق جاقسىلىقتى تىلەيمىن»، - دەدى كىشى روي دجونس «ماتچ ت ۆ» ارناسىنا.
«اڭىزعا اينالدى»
الەمنىڭ ەكس-چەمپيونى، ۋكراينالىق بوكسشى ۆاسيلي لوماچەنكو دا گەنناديدىڭ جاسىن اتاپ ءوتتى.
«بۇل وتە قىزىق بولدى. تاريحي ءسات بولدى. تريلوگيا بولدى. كانەلو مىقتى بولدى، ءبىراق گەننادي تىم قارتايعان سياقتى. مەنىڭ ويىمشا، كانەلو بيۆولمەن ريەۆانش وتكىزۋى مۇمكىن. GGG- گە كەلسەك، بىلمەيمىن. بۇل - ونىڭ شەشىمى. ول قازىر اڭىزعا اينالدى. كارەراسىن اياقتاۋى مۇمكىن»، - دەدى لوماچەنكو FightSpace YouTube-ارناسىنا بەرگەن سۇحباتىندا.
«جەكپە-جەك ەمەس، قوقىس»
ەكىنشى ورتا سالماقتا الەمنىڭ ەكى دۇركىن چەمپيونى داۆيد بەناۆيدەس بولسا، بۇل جەكپە-جەك تۇككە تۇرعىسىز دەگەن ويدا. ول كەزىندە گولوۆكينمەن بىرگە جاتتىققان بولاتىن.
«جەكپە-جەك ەمەس، قوقىس. ءبىراق ءبارىڭىز وسىنى تاماشالاعىلارىڭىز كەلدى»، - دەپ جازىپتى بەناۆيدەس الەۋمەتتىك جەلىدە. 
«گولوۆكين ەگدە تارتىپ قالدى»
Delcotimes.com پورتالىنىڭ رەداكتورى دجەك ماككافەرري Vesti.kz تىلشىسىنە بەرگەن سۇحباتىندا گولوۆكين شاۋ تارتىپ قالعانىنا توقتالدى.
«گولوۆكين ەگدە تارتىپ قالدى. الدىڭعى ەكى ايقاستا جاستاۋ ەدى. بۇگىن ول كۇش ۇنەمدەپ ايقاسۋعا ءماجبۇر بولدى. جەكپە-جەكتىڭ باستاپقى بولىگىندە «كانەلو» باسىمدىق كورسەتتى. ءبىراق سوڭىنا تامان كۇشىن سارقىپ قالعان گولوۆكين جاقسى سوققىلار كورسەتتى. جالپى باسەكەلى كەزدەسۋ بولدى. الايدا بۇل الۆارەستىڭ لايىق جەڭىسى. الدىڭعى ەكەۋى داۋلى بولسا، وسى جولى مەكسيكالىق جەڭىس ءۇشىن كوبىرەك كۇش سالدى. گولوۆكينگە ۋاقىت پەن كۇش جەتپەدى»، - دەيدى ساراپشى.
«ۋاقىتتى جەڭۋ مۇمكىن ەمەس»
ال گەننادي گولوۆكيننىڭ بۇرىنعى باپكەرى ابەل سانچەس كانەلومەن ايقاستا قازاقستاندىقتىڭ جاسى ءوز اسەرىن بەردى دەگەن ويدا.
«شىنىن ايتسام، بۇل ايقاسقا قاتىستى ەشقانداي ەموتسيام جوق. گولوۆكيننىڭ جەڭىسىنە ۇمىتتەندىم، ءبىراق ۋاقىتتى جەڭۋ مۇمكىن ەمەس»، - دەپ كەلتىردى سانچەستىڭ ءسوزىن «ماتچ ت ۆ».
«مەكسيكا جۇرتى كانەلونى جاقسى كورمەيدى»
جەڭىل سالماقتاعى بۇرىنعى الەم چەمپيونى پانامالىق كارلوس مۋريلو بولسا، كانەلونى سىناپ تاستادى.
«بۇل اۋىر، ويتكەنى ول سپورتتاعى ءۇمىتتى سوندىرەدى. وسىنداي دۇنيەلەرگە بايلانىستى مەكسيكالىق كوپتەگەن جۇرت كانەلونى ۇناتپايدى، ويتكەنى ولار ونى اقشا ءۇشىن توبەلەسەدى دەپ ويلايدى. قازىر ءبارى بيزنەسكە بايلانىستى. بۇرىنعىداي ادامدار نامىسى، ەلى ءۇشىن جۇدىرىقتاسپايدى»، - دەپ كەلتىرەدى مۋريلونىڭ ءسوزىن prensa.com.
«تاۋەكەلسىز جەكپە-جەك كوردىك»
اۋىر سالماقتاعى رەسەيلىك بوكسشى دميتري كۋدرياشوۆ ءوزى كۇتكەن جەكپە-جەكتى كورە الماعانىن ايتادى.
«ءبىز ءبارىمىز گەننادي مالىمدەمەسىن اقتايتىن جەكپە-جەكتى كۇتتىك، ول وسى تريلوگيانى اقىرىندا اياقتاعىسى كەلەتىنىن ايتقان. الۆارەس تە بۇل تۋرالى ايتتى. ءبىراق، شىن مانىندە، ءبىز تاۋەكەلسىز جەكپە-جەك كوردىك. گەنا 40 جاستا بولسا دا، جەكپە-جەكتىڭ سوڭىندا شابۋىلداعانى قۋانتتى. ال الۆارەس ۆەگاندىق ديەتامەن تاعى دا شەكتەن شىعىپ كەتكەن سياقتى، بۇل وعان كۇش پەن قۋات قوسپايدى. جەكپە-جەككە دەيىن دە جاس اسەر ەتەتىنىن ايتقانمىن. گەنا ءوزىن جاقسى قىرىنان كورسەتتى، جەكپە-جەكتى سوڭىنا دەيىن جەتكىزدى، سوڭىندا، ءتىپتى، باسىمىراق بولدى. ءبىراق كانەلو قاۋىپتىرەك بولادى دەپ كۇتكەنمىن. ارەڭ جەڭدى»، - دەپ كەلتىردى كۋدرياشيەۆتىڭ ءسوزىن ريا نوۆوستي.
«كارەراسىن اياقتايتىن كەز كەلدى»
گولوۆكيننىڭ بۇرىنعى قارسىلاسى، امەريكالىق گابريەل روسادو قازاقستاندىق بوكسشىعا كارەراسىن اياقتاۋعا كەڭەس بەردى.
«بۇل جاقسى جەكپە-جەك بولدى، جىگىتتەر. مەن بۇل جاقىن جەكپە-جەك بولاتىنىن ايتتىم. جەكپە-جەكتى ستيلدەر جاسايدى جانە ولار كەزدەسۋلەرىن ءاردايىم وسىلاي وتكىزەدى. GGG ءالى دە اقىلدى بوكس كورسەتەدى، ءبىراق كانەلو مىقتىراق بولدى. كانەلو ەندى كىممەن جۇدىرىقتاسۋى كەرەك؟ بيۆولمەن. ال GGG گە كارەراسىن اياقتايتىن كەز كەلدى، ەندى وعان جۇدىرىقتاسۋدىڭ قاجەتى جوق»، - دەدى روسادو.
«قارتايعان گولوۆكيندى نوكاۋتقا تۇسىرەر ەدى»
امەريكالىق باپكەر ءارى ساراپشى تەددي اتلاستىڭ پىكىرىنشە، گولوۆكين مەن الۆارەستىڭ ءۇشىنشى جەكپە-جەگى تىم كەش ءوتتى.
«كانەلونىڭ ەڭبەگىن جوققا شىعارمايمىن، ول - ناعىز جاۋىنگەر. ءبىراق ول ۇلى بولسا، قارتايعان گولوۆكيندى نوكاۋتقا تۇسىرەر ەدى. ەكەۋى دە جوعارى دەڭگەيىن، ءبىر-بىرىنە قۇرمەتىن كورسەتتى. ءبىراق سپورتتاعى كوپتەگەن جەكپە-جەك سياقتى بۇل كەزدەسۋ دە بىرنەشە جىلعا كەشىكتىرىلىپ ءوتتى»، - دەدى اتلاس.
تريلوگيا 18- قىركۇيەكتە لاس-ۆەگاستا ءوتىپ، الۆارەس تورەشىلەردىڭ ءبىراۋىزدان شەشىمىمەن جەڭگەن بولاتىن.
ودان كەيىن ساۋل كانەلو الۆارەس گولوۆكينگە العىس ايتقان ەدى. گولوۆكين دە مەكسيكالىقتىڭ كومانداسىن قۇتتىقتاپ، كارەراسى تۋرالى سۇراققا جاۋاپ بەرگەن.
توقايەۆ گولوۆكينگە تەلەفون شالدى
ارتىنشا گولوۆكين كانەلودان جەڭىلىسىنىڭ سەبەبىن تۇسىندىرگەن بولاتىن.
بۇعان دەيىن GGG جەڭىلىسىنەن كەيىن قازاقستاندىقتاردىڭ ەموتسياسى ۆيدەوعا تۇسىرىلگەنىن جازعان ەدىك.
