قازاقستاندا بالالارعا ارنالعان پاسپورت قۇنى ارزانداي ما

ق ر ىشكى ىستەر مينيسترلىگى قازاقپارات ءتىلشىسىنىڭ ساۋالىنا جاۋاپ بەردى.

شەتەلگە ارنالعان ءتولقۇجات باعاسى قالاي بەلگىلەنەدى؟

قۇجاتتىڭ قۇنىن ەسەپتەۋ جەكە باستى كۋالاندىراتىن قۇجاتتاردى دايىنداۋعا جانە بەرۋگە كورسەتىلەتىن قىزمەتتەردى وتەۋ قاعيداتى بويىنشا جۇزەگە اسىرىلادى. قازاقستان رەسپۋبليكاسى ءتولقۇجاتىنىڭ وزىندىك قۇنى جەكە باستى كۋالاندىراتىن قۇجاتتاردىڭ بلانكىلەرىن دايىنداۋ ءۇشىن شيكىزات پەن ماتەريالداردى ساتىپ الۋدان، قۇجاتتاردى دايىنداۋدان، جاڭا جابدىقتاردان، جاڭا تەحنولوگيالاردى ەنگىزۋدەن، قورعانىس ەلەمەنتتەرىنەن جانە باسقا شىعىنداردان قۇرالادى. ءتولقۇجات ءۇشىن مەملەكەتتىك باج مولشەرلەمەسى «سالىق جانە بيۋجەتكە تولەنەتىن باسقا دا مىندەتتى تولەمدەر تۋرالى» قازاقستان رەسپۋبليكاسى كودەكسىنىڭ (سالىق كودەكسى) 615-بابىندا بەلگىلەنگەن.

سوڭعى 5 جىلدا ءتولقۇجات قۇنى قانشالىقتى وزگەردى؟

شەتەلدىك ءتولقۇجاتتىڭ قۇنى 8 ايلىق ەسەپتىك كورسەتكىشتى (24504 تەڭگە) قۇرايدى. 2017-جىلى ءتولقۇجات قۇنى 4 ا ە ك (1 ا ە ك 2269 تەڭگەنى قۇرادى) - 9076 تەڭگەنى قۇراعان بولاتىن. 2018-جىلدان باستاپ ءتولقۇجاتتىڭ باعاسى وزگەرىسسىز - 8 ا ە ك جانە ايلىق ەسەپتىك كورسەتكىشتىڭ وزگەرۋىنە بايلانىستى عانا قىمباتتاي تۇسەدى. جەكە كۋالىك ءۇشىن مەملەكەتتىك باج مولشەرلەمەسى الدەقايدا تومەن. سالىق كودەكسىنىڭ 615-بابىنا سايكەس، ونىڭ سوماسى ا ە ك- ءتىڭ 0,2 پايىزىن نەمەسە 612,60 تەڭگەنى قۇرايدى.

ت م د ەلدەرىندە ءتولقۇجات قانشا تۇرادى؟

تاۋەلسىز مەملەكەتتەر دوستاستىعى ەلدەرىندەگى ءتولقۇجاتتىڭ قۇنى كەلەسىدەي:

تاجىكستان - 10 ا ق ش دوللارى (4733 تەڭگە).

رەسەي - 5 مىڭ رۋبل (39200 تەڭگە)؛

قازاقستان - 24504 تەڭگە؛

ارمەنيا - 25 مىڭ دراما (29 مىڭ تەڭگە)؛

ازەربايجان - 40 مانات (11183 تەڭگە)؛

وزبەكستان - 245000 سۋم (10490 تەڭگە)

قىرعىزستاندا قۇجات «قىرعىزستان ازاماتىنىڭ جالپى ازاماتتىق ءتولقۇجاتى» دەپ اتالادى. 34 بەتتەن تۇراتىن ءتولقۇجات 885 سوم (5212 تەڭگە)، ال 50 بەتتىك قۇجات 945 سوم (5566 تەڭگە) تۇرادى.

جەڭىلدىكتەر

ق ر ىشكى ىستەر مينيسترلىگى ق ر ءتولقۇجاتى مەن جەكە كۋالىگىن بەرۋ كەزىندە مەملەكەتتىك باج سالىعىن تولەۋدەن مىنا ساناتقا كىرەتىن ازاماتتار بوساتىلادى:

- كەڭەس وداعىنىڭ باتىرلارى، سوتسياليستىك ەڭبەك ەرلەرى؛

- ءۇش دارەجەلى داڭق وردەنىنىڭ جانە ءۇش دارەجەلى ەڭبەك داڭقى، «التىن قىران»، «وتان» وردەندەرىمەن ناگرادتالعان، «حالىق قاھارمانى»، «قازاقستاننىڭ ەڭبەك ەرى» اتاقتارىنا يە بولعان؛

- «باتىر انا» اتاعىنا يە بولعان، «التىن القا»، «كۇمىس القا» القالارىمەن ناگرادتالعان كوپ بالالى انالار؛

- ەكىنشى دۇنيەجۇزىلىك سوعىسىنىڭ ارداگەرلەرى، جەڭىلدىكتەر بويىنشا ەكىنشى دۇنيەجۇزىلىك سوعىسىنىڭ ارداگەرلەرىنە تەڭەستىرىلگەن ارداگەرلەر جانە باسقا مەملەكەتتەردىڭ اۋماعىنداعى ۇرىس قيمىلدارىنىڭ ارداگەرلەرى، ەكىنشى دۇنيەجۇزىلىك سوعىسى جىلدارىندا تىلداعى قاجىرلى ەڭبەگى مەن ءمىنسىز اسكەري قىزمەتى ءۇشىن بۇرىنعى ك س ر وداعىنىڭ وردەندەرىمەن جانە مەدالدارىمەن ناگرادتالعان ادامدار، 1941-جىلعى 22- ماۋسىم - 1945-جىلعى 9- مامىر ارالىعىندا كەمىندە التى اي جۇمىس ىستەگەن (قىزمەت وتكەرگەن) جانە ەكىنشى دۇنيەجۇزىلىك سوعىسى جىلدارىندا تىلداعى قاجىرلى ەڭبەگى مەن ءمىنسىز اسكەري قىزمەتى ءۇشىن بۇرىنعى ك س ر وداعىنىڭ وردەندەرىمەن جانە مەدالدارىمەن ناگرادتالماعان ادامدار، مۇگەدەكتىگى بار ادامدار، سونداي-اق بالا جاسىنان مۇگەدەكتىگى بار ادامنىڭ، مۇگەدەكتىگى بار بالانىڭ اتا-اناسىنىڭ ءبىرى؛

- قارتتار مەن مۇگەدەكتىگى بار ادامدارعا ارنالعان جالپى ۇلگىدەگى مەديتسينالىق-الەۋمەتتىك مەكەمەلەردە تۇراتىن قارتتار، بالالار ۇيلەرىندە جانە (نەمەسە) ينتەرناتتاردا تۇراتىن، مەملەكەتتىڭ تولىق قامسىزداندىرۋىنداعى جانە جەتىم بالالار مەن اتا-اناسىنىڭ قامقورلىعىنسىز قالعان بالالار؛

- چەرنوبىل اپاتىنىڭ سالدارىنان زارداپ شەككەن ازاماتتار.

ىشكى ىستەر مينيسترلىگى ءتولقۇجاتتىڭ قۇنىن قايتا قاراۋ ورىندى دەپ ساناي ما؟

ىشكى ىستەر مينيسترلىگى سالىق جانە بيۋجەت ساياساتىن قالىپتاستىرۋ سالىق كودەكسىنىڭ ازىرلەۋشىسى بولىپ تابىلاتىن ۇلتتىق ەكونوميكا مينيسترلىگىنىڭ قىزمەتىنە جاتاتىنىن اتاپ ءوتتى.

بۇل رەتتە، ۇلتتىق ەكونوميكا مينيسترلىگى «بيۋجەتكە سالىق جنە وزگە دە مىندەتتى تولەمدەر» تۋرالى ق ر كودەكسىنە وزگەرتۋلەر مەن تولىقتىرۋلار ەنگىزۋ تۋرالى» (سالىق كودەكسى) زاڭ جوباسىن جانە «بيۋجەتكە سالىق جانە وزگە دە مىندەتتى تولەمدەر تۋرالى (سالىق كودەكسى)» ق ر كودەكسىن ىسكە قوسۋ تۋرالى» ق ر زاڭىن ازىرلەدى.

وندا 16 جاسقا دەيىنگى بالالارعا ارنالعان ءتولقۇجات ءۇشىن مەملەكەتتىك باج سالىعىن 8 ايلىق ەسەپتىك كورسەتكىشتەن 4 ا ە ك- كە دەيىن تومەندەتۋ بولىگىندە تۇزەتۋ قاراستىرىلعان.

وسىعان بايلانىستى، زاڭ جوباسى اياسىندا كودەكستىڭ 615-بابىندا 16 جاسقا دەيىنگى بالالارعا ءتولقۇجات بەرگەن كەزدە 4 ا ە ك مولشەرىندە مەملەكەتتىك باج سالىعىن بەلگىلەۋ بولىگىندە تۇزەتۋلەر ەنگىزۋگە باستاما جاسالىپ وتىر. ەگەر زاڭ جوباسىنا تۇزەتۋلەر قابىلدانسا، وندا بالالارعا ارنالعان ءتولقۇجاتتىڭ قۇنى 12252 تەڭگە بولادى.

ق ر ۇلتتىق ەكونوميكا مينيسترلىگى اتالعان تۇزەتۋلەر ءبىرىنشى كەزەكتە بالالارعا قازاقستان رەسپۋبليكاسى ازاماتىنىڭ ءتولقۇجاتىن الۋ كەزىندە اتا-انالاردىڭ شىعىندارىن ازايتۋعا باعىتتالعانىن اتاپ وتەدى.

جوعارىدا اتالعان زاڭ قازىرگى ۋاقىتتا جوباسى پارلامەنت ءماجىلىسىنىڭ قاراۋىنا ەنگىزىلدى.

ۇلتتىق ەكونوميكا مينيسترلىگى زاڭ جوباسى جۇمىس توبىندا تالقىلانىپ جاتقانىن اتاپ وتەدى. ەنگىزۋ مەرزىمى 2024-جىلدان باستالۋى مۇمكىن.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى