دارىگەردىڭ كاسىپتىك جاۋاپكەرشىلىگىن ساقتاندىرۋعا قاتىستى ا ق ش پەن جاپونيا تاجىريبەسى پىسىقتالدى
«مينيسترلىك مەديتسينا قىزمەتكەرلەرىنىڭ كاسىپتىك جاۋاپكەرشىلىگىن ساقتاندىرۋدىڭ ءتۇرلى مودەلدەرىنە تالداۋ جۇرگىزدى. حالىقارالىق تاجىريبەدە مەديتسينا قىزمەتكەرلەرىن قورعاۋ ءۇشىن قورلار مەن قاۋىمداستىقتار (شۆەتسيا، كانادا، دانيا) قۇرۋ، سونداي-اق جەكە نارىقتار (ا ق ش، گەرمانيا، جاپونيا، تۇركيا) ارقىلى كاسىپتىك جاۋاپكەرشىلىكتى مىندەتتى ساقتاندىرۋ جۇيەسى قولدانىلادى»، - دەدى ا. عينيات ماجىلىستە «قازاقستان رەسپۋبليكاسىنىڭ كەيبىر زاڭنامالىق اكتىلەرىنە دەنساۋلىق ساقتاۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن تانىستىرۋ كەزىندە.
ونىڭ ايتۋىنشا، جوعارىدا ايتىلعان حالىقارالىق تاجىريبەنىڭ نەگىزىندە مەديتسينا قىزمەتكەرلەرىنىڭ كاسىپتىك جاۋاپكەرشىلىگىن ساقتاندىرۋدىڭ وڭتايلى تەتىگى رەتىندە شۆەتسيا، كانادا، اقش، جاپونيا جانە تۇركيا مودەلدەرى بويىنشا بەيىمدەلگەن نارىقتىق ساقتاندىرۋ مودەلىن قولدانۋ ۇسىنىلادى.
سونىمەن قاتار ول 2017 -جىلى مينيسترلىك مەملەكەت باسشىسىنىڭ تاپسىرماسى بويىنشا دەربەس كەپىلدىك بەرۋ قورىن قۇرۋ اياسىندا ىنتىماقتاستىق قاعيداتى بويىنشا ساقتاندىرۋدىڭ الەۋمەتتىك مودەلىن ۇسىنعانىن ەسكە سالدى (جارنا مولشەرىن مەديتسينالىق ۇيىم - %50، مەديتسينا قىزمەتكەرى - %50 دەپ ءبولۋ). الايدا زاڭ جوباسى قولداۋ تاپپاي، قابىلدانعان جوق.
«حالىقارالىق تاجىريبەنى تالداۋدىڭ نەگىزىندە، سونداي- اق جۇرتشىلىقتىڭ، مەملەكەتتىك ورگانداردىڭ جانە ساقتاندىرۋ كومپانيالارىنىڭ قاتىسۋىمەن جۇرگىزىلگەن تالقىلاۋلاردىڭ قورىتىندىسى بويىنشا جۇمىس ىستەپ تۇرعان ساقتاندىرۋ كومپانيالارى ارقىلى مەديتسينا قىزمەتكەرلەرى كاسىپتىك جاۋاپكەرشىلىگىنىڭ جۇكتەلگەن ساقتاندىرۋ مودەلى قابىلداندى. جۇمىس بەرۋشى - مەديتسينالىق ۇيىم ساقتانۋشى بولادى. ال مەديتسينا قىزمەتكەرلەرىن ليتسەنزيالاۋدى ەنگىزۋ بولاشاقتا مەديتسينا قىزمەتكەرلەرىنىڭ كاسىپتىك جاۋاپكەرشىلىگىن ساقتاندىرۋ جۇيەسىنە قاتىسۋشىلاردىڭ جاۋاپكەرشىلىگىن بولۋگە مۇمكىندىك بەرەدى»، - دەدى ۆەدومستۆو باسشىسى.
ونىڭ سوزىنە قاراعاندا، وسى مودەلگە سايكەس، شاعىمدى قاراۋدى مەديتسينالىق ۇيىم مەدياتسيا ەلەمەنتتەرىن قولدانىپ، سونداي- اق بەيىندى مەديتسينالىق قاۋىمداستىقتاردى تارتا وتىرىپ، ىشكى اۋديت قىزمەتىنىڭ دەڭگەيىندە جۇزەگە اسىراتىن بولادى. بۇل كەزەڭدە ماسەلە مەديتسينالىق ۇيىمنىڭ وزىندە رەتتەلۋى مۇمكىن.
«پاتسيەنت قىزمەتتىڭ شەشىمىمەن كەلىسپەگەن جاعدايدا، شاعىم ساراپتامالىق قورىتىندى بەرۋ ءۇشىن مەديتسينالىق جانە فارماتسيەۆتيكالىق باقىلاۋ كوميتەتىنىڭ اۋماقتىق بولىمشەسىنە تاپسىرىلاتىن بولادى. وڭ ناتيجە شىعارىلعان جاعدايدا، شاعىم بويىنشا ماتەريالدار، ونىڭ ىشىندە سوت- مەديتسينالىق ساراپتامانىڭ قورىتىندىسى مەديتسينالىق ۇيىم ساقتاندىرىلعان ساقتاندىرۋ كومپانياسىنا بەرىلەتىن بولادى»، - دەدى ا. عينيات.
«پاتسيەنتكە كەلتىرىلگەن زيان ءۇشىن وتەماقى تولەۋدى دەنساۋلىق ساقتاۋ مينيسترلىگى ايقىنداعان جاعدايلار بويىنشا ساقتاندىرۋ كومپانياسى جۇرگىزەدى. تولەمنەن باس تارتقان جانە شەشىممەن قاناعاتتانباعان جاعدايدا پاتسيەنت سوتقا جۇگىنۋگە قۇقىلى. سوتقا جۇگىنگەن كەزدە تولەم جۇرگىزىلمەيدى»، - دەدى مينيستر.
بۇدان بۇرىن حابارلانعانداي، مەديتسينا قىزمەتكەرلەرىنىڭ كاسىپتىك جاۋاپكەرشىلىگى بويىنشا مىندەتتى ساقتاندىرۋ جۇيەسى ەنگىزىلەدى.
