پرەزيدەنت «ۇلى دالا جورىعى» مارافون- بايگەسىنىڭ قاتىسۋشىلارىن قۇتتىقتادى
مارافوننىڭ اشىلۋ سالتاناتىندا ق ر پارلامەنتى ءماجىلىسىنىڭ ءتوراعاسى ەرلان قوشانوۆ مەملەكەت باسشىسى قاسىم-جومارت توقايەۆتىڭ قۇتتىقتاۋ حاتىن وقىپ بەردى.
«قۇرمەتتى قاۋىم! سىزدەردى «ۇلى دالا جورىعى» مارافون- بايگەسىنىڭ باستالۋىمەن قۇتتىقتايمىن! ۇلتتىق سپورتتى دامىتۋعا جانە ءداستۇرىمىزدى دارىپتەۋگە ارنالعان الامان جارىس ەلىمىزدە تۇڭعىش رەت وتكىزىلىپ وتىر. ادامزات تاريحىندا جىلقى ەڭ العاش قازاق دالاسىندا قولعا ۇيرەتىلگەنى بەلگىلى. بۇل الەمدىك وركەنيەتكە تەڭدەسسىز بەتبۇرىس اكەلگەن جاڭالىق سانالادى. ءبىزدىڭ بابالارىمىز ۇلى دالا شەجىرەسىن تۇلپاردىڭ تۇياعىمەن جازعان، بۇگىنگى ۇرپاق - سول كوشپەندىلەر مادەنيەتىنىڭ زاڭدى مۇراگەرى»، - دەپ جازىلعان پرەزيدەنت قۇتتىقتاۋىندا.
مەملەكەت باسشىسى قازاق پەن جىلقى ەگىز ۇعىم ەكەنىن، ارعىماق اتتى حالقىمىزدىڭ سيمۆولى دەۋگە بولاتىنىن جەتكىزدى.
«ءبىز قازىرگى زاماننىڭ جاقسى قاسيەتتەرىن بويعا سىڭىرە وتىرىپ، ۇلتتىق بولمىسىمىزدى جاڭعىرتۋعا ءتيىسپىز. بۇگىنگى بايگەنىڭ باستى ماقساتى وسى. ءار وڭىردەن كەلگەن شاباندوزدار كەڭ بايتاق قازاق دالاسىن كوكتەي ءوتىپ، قاسيەتتى تۇركىستان قالاسىنا ات باسىن تىرەيدى. بۇل ناعىز ازاماتتار مەن قازاناتتار سىنالاتىن دودا. سونداي- اق ەلىمىزگە رۋحاني سەرپىلىس اكەلىپ، جاستاردى وتانشىلدىققا باۋليتىن بىرەگەي جوبا. الامان بايگە ۇلتىمىزدىڭ رۋحىن اسقاقتاتىپ، مەرەيىن اسىرا تۇسەدى دەپ سەنەمىن. بارشاڭىزعا ءسات- ساپار تىلەيمىن»، - دەيدى ق. توقايەۆ.
ايتا كەتەيىك، ەلىمىزدە العاش رەت 1200 شاقىرىمدىق «ۇلى دالا جورىعى» مارافون- بايگەسى وتەدى.
مارافونشىلار 18-قىركۇيەكتە نۇر-سۇلتان قالاسىنان اتتانىپ، ۇلى دالانىڭ بويىمەن 12 كۇندە 1200 شاقىرىمنان اسا قاشىقتىقتى باسىپ ءوتىپ، 29-قىركۇيەكتە تۇركى الەمىنىڭ رۋحاني استاناسى - تۇركىستان قالاسىنا ات باسىن تىرەۋى كەرەك. قاتىسۋشىلارعا تۇركىلەردىڭ كيەلى جەرلەرى - جوشى حان، الاشا حان كەسەنەلەرى، سونداي- اق قازاق حاندىعىنىڭ العاشقى استاناسى سوزاق قالاسى پەن تۇركى رۋحانياتىنىڭ بەسىگى تۇركىستان قالاسى سياقتى تاريحي ورىندارعا، ازىرەت- سۇلتان كەسەنەسىنە زيارات جاساۋعا مۇمكىندىك تۋادى.
بەلگىلەنگەن قاشىقتىقتى باستان- اياق ەڭ از ۋاقىتتا ءجۇرىپ وتكەن كوماندا مارافوننىڭ جەڭىمپازى دەپ تانىلادى. جەڭىمپازدارعا اقشالاي سىيلىقتار مەن «ۇلى دالا ساربازى» اتاعى بەرىلەدى.
1-ورىن ءۇشىن جۇلدە قورى - 30000000 تەڭگە مەن كۋبوك بولسا، 2-ورىنعا - 20000000 تەڭگە مەن كۋبوك جانە 3-ورىن ءۇشىن - 15000000 تەڭگە مەن كۋبوك بەرىلەدى.
اۆتور ايجان سەرىكجان قىزى
