قىرعىزستان مەن تاجىكستان پرەزيدەنتتەرى شەكاراداعى قاقتىعىستى تالقىلادى
سادىر جاپاروۆ پەن ەمومالي راحمون ءتيىستى قۇرىلىمدارعا اتىستى توقتاتىپ، كۇشتەر مەن قۇرالداردى ۇرىس الاڭىنان شىعارۋ تۋرالى تاپسىرما بەرۋگە كەلىستى. ەكى ەلدىڭ ارنايى قىزمەتىنىڭ باسشىلارى وقيعا ورنىندا جۇمىس ىستەيتىن بولادى، وقيعانىڭ ءمان-جايى مەن سەبەپتەرىن انىقتاۋ ءۇشىن كوميسسيا قۇرىلدى.
قىرعىزستان مەن تاجىكستاننىڭ مەملەكەتتىك شەكاراسىن دەليميتاتسيالاۋ جانە دەماركاتسيالاۋ جونىندەگى ۇكىمەتارالىق كوميسسياسىنىڭ جۇمىسىن جەدەلدەتۋ تۋرالى كەلىسىمگە قول جەتكىزىلدى.
تاجىكستان مەن قىرعىزستان شەكاراسىنداعى قاقتىعىس سارسەنبى، 14- قىركۇيەكتە باستالدى. قىرعىزستان شەكارا قىزمەتى تاجىك اسكەريلەرىن ورتاق شەكارانىڭ بەلگىلەنبەگەن ۋچاسكەسىندە پوزيتسيا ۇستاندى دەپ ايىپتادى. تاجىك تاراپى ءوز ساربازدارىنا سەبەپسىز وق جاۋدىرعانىن العا تارتادى.
