اتىراۋداعى قامىس ءورتىن سوندىرۋگە تەڭىز جاعالاۋىنداعى باتپاق كەدەرگى بولىپ تۇر – ت ج د

جاعالاۋداعى باتپاققا بايلانىستى ءورتتى ءسوندىرۋ مۇمكىن بولماي تۇر، دەپ حابارلايدى قازاقپارات ءتىلشىسى.

وبلىستىق توتەنشە جاعدايلار دەپارتامەنتى قوعاممەن بايلانىس توبىنىڭ اقپاراتىنا قاراعاندا، ءورتتىڭ اۋماعى - شامامەن 6 گەكتار.

اتىراۋ قالاسىنا قارايتىن كەڭوزەك اۋىلدىق وكرۋگىنەن 15 شاقىرىم كاشىقتىقتا 14 -قىركۇيەك كۇنى ساعات 20:40 تا باستالعان قامىس ءورتى ءالى بىقسىپ جاتىر. سول كۇنى ءورتتى سوندىرۋگە دەپارتامەنتتىڭ 8 قىزمەتكەرى مەن 2 تەحنيكاسى، «اقجايىق» مەملەكەتتىك تابيعي رەزەرۆاتىنان 3 قىزمەتكەر، 1 تەحنيكا، كەڭوزەك وكرۋگىندە تىركەلگەن شارۋا قوجالىعىنان 3 قىزمەتكەر مەن 3 تراكتور تارتىلعان.

«الايدا، 15-قىركۇيەك كۇنى كەڭوزەك اۋىلدىق وكرۋگىندەگى العاباس كەنتىنەن كاسپيي تەڭىزىنە قاراي 30 شاقىرىم جەرگە دەيىن قامىستىڭ بىقسۋى باستالدى. قامىس ءورتىنىڭ جالپى اۋماعى - 6 گەكتار. تەڭىز جاعالاۋىنا باراتىن جولدىڭ باتپاقتى بولۋىنا بايلانىستى ءورتتى ءسوندىرۋ مۇمكىن ەمەس»، - دەپ حابارلادى دەپارتامەنتتىڭ قوعاممەن بايلانىس توبى.

كەشە، 15-قىركۇيەكتە اتىراۋ وبلىستىق توتەنشە جاعدايلار دەپارتامەنتىنىڭ 2 قىزمەتكەرى 1 ترەكول تەحنيكاسىمەن، «اقجايىق» مەملەكەتتىك تابيعي رەزەرۆاتىنىڭ 30 قىزمەتكەرى 10 تەحنيكامەن قامىس ءورتىن باقىلاۋعا العان. ال، بۇگىن 16 -قىركۇيەكتە «اقجايىق» مەملەكەتتىك تابيعي رەزەرۆاتىنىڭ قىزمەتكەرلەرى قامىس ءورتىن قاراۋىلداۋ جۇمىستارىن جالعاستىردى.

قامىس ءورتى اتىراۋ وبلىستىق توتەنشە جاعدايلار دەپارتامەنتىنىڭ تۇراقتى باقىلاۋىنا الىنعان. ورتتەن ەلدى مەكەندەرگە قاۋىپ ءتونىپ تۇرعان جوق.

ەسكە سالا كەتەلىك، بۇعان دەيىناتىراۋ قالاسىنان 30 شاقىرىم جەردە 6 گەكتار قامىس جانىپ جاتقانىن حابارلاعان ەدىك.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى