ريم پاپاسىمەن كەزدەسۋىمىزگە تىيىم سالعاندار بولدى - شەيح مۇحاممەد احمەد ات-تايەب
ءوز سوزىندە شەيح مۇحاممەد احمەد ات-تايەب پرەزيدەنت قاسىم-جومارت توقايەۆ پەن قازاقستان حالقىنا جانە وسىنداي تابىستى فورۋمدى ۇيىمداستىرعاندارعا العىس ءبىلدىردى.
«وسى فورۋمنىڭ شەشىمى مەن ۇسىنىستارىن تىڭداعان سوڭ، وعان ءبىر نارسە قوسۋ قيىن. بۇل ۇسىنىستار حالىقارالىق قوعامداستىقتىڭ، ونىڭ ىشىندە بايلار مەن كەدەيلەردىڭ كوپتەگەن پروبلەمالارىن كوتەرەدى دەپ ەسەپتەيمىز. قورىتىندىلاي كەلە، ءدىننىڭ نەگىزگى ۇندەۋى ىسكە اسۋى ءۇشىن بارلىق ءدىن وكىلدەرى بىرىگۋى قاجەت جانە ەڭ الدىمەن ءدىني سەزىمدەردى جەككورۋشىلىك پەن زۇلىمدىقتان تازارتۋ ءۇشىن ارەكەت ەتەتىن كۇشكە اينالۋى ءتيىس. بۇعان مىناداي جولمەن قول جەتكىزۋگە بولادى: ءبىرىنشىسى - ءتۇرلى ءدىن قىزمەتىن دىندەر مەن ءدىندارلار اراسىنداعى قاقتىعىستارعا ەمەس، وسىنداي ادامي ارناعا باعىتتاۋ»، - دەدى مۇحاممەد احمەد ات-تايەب الەمدىك جانە ءداستۇرلى دىندەر كوشباسشىلارى سەزىنىڭ جابىلۋ سالتاناتىندا.
ەكىنشىدەن، ونىڭ ايتۋىنشا، ءاربىر دىندەگى جالپى جوعارى ادامي ماعىنانى، ونىڭ ىشىندە ادامدارعا دەگەن جاقسى قارىم-قاتىناستى جانە اراداعى ايىرماشىلىققا قاراماستان ولارعا دەگەن سۇيىسپەنشىلىكتى جيناپ، ءارتۇرلى جولمەن، ءارتۇرلى تىلدەردە تاراتۋ كەرەك.
«ءۇشىنشىسى - وسى جالپى ماعىنالاردى تاراتۋ كەزىندە تەك اقىلعا سۇيەنىپ، اقيقاتقا دەگەن سۇيىسپەنشىلىكتى باسشىلىققا الۋ كەرەك. بۇل ءدىندارلار مەن دىنسىزدەر اراسىنداعى جاھاندىق ديالوگقا قاتىستى يسلامنىڭ، سونىمەن قاتار بارلىق دىندەردىڭ ۇندەۋى. بۇل باعىت ادامنىڭ ماقساتتارى حالىقارالىق ءدىني فورۋمداردىڭ ماقساتتارىنا اينالعاندا، جالپى ءدىن ەرەجەلەرىنە قايشى كەلمەيتىندىگىنەن تۋىنداعان.
مەنىڭ تاجىريبەم باۋىرىم ريم پاپاسى فرانتسيسكپەن ءدىنىمىز، شىعۋ تەگىمىز، ءتىلىمىز، تاريحىمىز، سونداي-اق وتانىمىز باسقا ەكەنىنە قاراماستان، ادامداردىڭ بۇل باستامالاردى قۇپتايتىنىنا سەنۋىمە مۇمكىندىك بەرەدى. جانە بۇل ەكى تاراپتىڭ راديكالدى كوزقاراستارىنا قاراماستان دەپ ويلايمىن، ويتكەنى كەيبىرەۋلەر بۇل كەزدەسۋدىڭ بولعانىن قالامادى، تىيىم سالۋعا تىرىسقاندار دا بولدى»، - دەدى مۇحاممەد احمەد ات-تايەب.
ايتا كەتەيىك، الەمدىك جانە ءداستۇرلى دىندەر ليدەرلەرىنىڭ VII سەزى سالتاناتتى تۇردە جابىلدى. ەكى كۇنگە سوزىلعان سەزگە 50 ەلدەن 100 دەن استام دەلەگاتسيا، ونىڭ ىشىندە يسلام، حريستيان، بۋدديزم، يۋدايزم، يندۋيزم، داوسيزم، زورواستريزم، سينتويزم دىندەرىنىڭ وكىلدەرى، سونداي-اق ساياساتكەرلەر مەن قوعام قايراتكەرلەرى، حالىقارالىق ۇيىم مۇشەلەرى كەلگەن.
ءدىني فورۋمعا ارنايى قوناق ريم پاپاسى فرانتسيسكتەن بولەك ءال-ازحاردىڭ جوعارعى يمامى احمەد موحاممەد احمەد ات-تايەب، يەرۋساليم پاتريارحى III تەوفيل، اشكەنازدىڭ باس راۆۆينى داۆيد لاۋ، ءيزرايلدىڭ باس سەفارد راۆۆينى يتسحاك يوسيف جانە باسقا دا ءدىني جەتەكشىلەر، ءبىرقاتار حالىقارالىق ۇيىمنىڭ وكىلدەرى قاتىستى.
