گەرمانيادا گاز داعدارىسى

ەگەر بۇرىن رەسەيلىك گازدىڭ ۇلەسى %55 بولسا، قارۋلى قاقتىعىس باستالعاننان كەيىن ەكى اي وتىسىمەن ونىڭ ۇلەسى %35 كە تومەندەدى. گازپروم سولتۇستىك اعىن قۇبىرىن ءۇش رەت جوندەۋ جۇمىستارىنا جاپتى. ال تامىز ايىنىڭ سوڭىندا مۇلدەم گاز جەتكىزۋدى دوعاردى. بۇل نەمىس قاۋىمىن الاڭداتىپ وتىر. ويتكەنى گەرمانيادا ءۇي شارۋاشىلىقتارىنىڭ جارتىسى گاز قولدانادى.

دەگەنمەن كانسلەر قىستا ەشكىم توڭبايتىنىنا سەنىمدى. گاز قويمالارى %85 كە تولعان، ال قىسقا دايىندىق جۇمىستارى جوسپارلانعاننان دا تەز ءجۇرىپ جاتىر. بۇل گەرمانياعا عانا ەمەس، بۇكىل ەۋرووداققا دا قاتىستى ماسەلە.

كادري سيمسون، ەنەرگەتيكا بويىنشا ە و كوميسسارى:

- جەر استى قويمالارىمىز %83 كە تولعان. سونداي- اق ەۋرووداققا مۇشە ەلدەر گاز تۇتىنۋدى ازايتۋعا باعىتتالعان شارالار قابىلداپ جاتىر. ءبىز وسى ەكى باعىتتا دا جۇمىسىمىزدى جالعاستىرۋمىز قاجەت. شەشىمدەرىمىز ىنتىماق پەن ۇيلەسىمگە نەگىزدەلۋى ءتيىس.

گەرمانيا بيلىگى كەلەر جىلدىڭ اياعىنا دەيىن رەسەيلىك گازدان تاۋەلدىلىكتەن تولىق قۇتىلۋ ماقساتىن قويىپ تۇر. ەلدە سۇيىتىلعان گاز قابىلدايتىن تەرمينالدار سالىنا باستالدى. العاشىندا ۇكىمەت 4 تەرمينال سالۋدى كوزدەگەن، ال قازىر ونىڭ سانى التىعا دەيىن ارتاتىنى بەلگىلى بولدى. ولار تولىق كۇشپەن 2024 -جىلعا قاراي جۇمىس جاساي باستايدى، دەسە دە بيىلعى قىستان باستاپ- اق گاز قابىلداماق. سونداي- اق گەرمانيا جاسىل سۋتەكتى ءوندىرۋ جوبالارىنا ينۆەستيتسيا قۇيىپ جاتىر.

ولاف شولتس، گەرمانيا كانسلەرى:

- ۇزاق جىلدار بويى رەسەي گازدى جەتكىزۋ بويىنشا جاعدايدى انىقتاپ كەلدى. ءبىز تەز ارادا وسى تاۋەلدىلىگىمىزدەن قۇتىلۋىمىز كەرەك. سونىمەن قاتار، جاڭعىرتىلاتىن ەنەرگەتيكا مەن كليماتقا زيانسىز ەكونوميكاعا كوشۋدى تەزدەتۋىمىز قاجەت. تاعى ءبىر مىندەتىمىز، تابيعي گاز ورنىنا سۋتەكتى قولدانۋ.

ەنەرگيا تاپشىلىعىنا جول بەرمەس ءۇشىن، گەرمانيادا قايتا كومىر ەلەكتر ستانتسيالارىن پايدالانا باستادى. سونىمەن قاتار اتوم ستانتسيالارىنىڭ جۇمىسى توقتاتىلمايدى. ولار كەلەسى كوكتەمگە دەيىن قولدانىستا بولادى.

www.24.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى