جامبىلدىق شاباندوز اتىراۋ وبلىسىنداعى بايگەدەن ەكى كولىك ۇتىپ الدى

قىزىلقوعا اۋدانىندا العاش رەت «قازاقستاننىڭ قولتۋما التىن تايى - 2022» جانە «قازاقستاننىڭ قولتۋما التىن قۇنانى - 2022» ات بايگەسى ءوتتى. ەلىمىزدىڭ سەگىز وبلىسىنان قاتىسقان اتبەگىلەر 70-كە جۋىق تاي مەن قۇناندى بايگەگە قوستى.

قىزىلقوعا اۋدانى اكىمدىگىنىڭ باسپا ءسوز قىزمەتىنەن ءمالىم ەتكەندەي، تاي بايگەگە 32 جۇيرىك 6 شاقىرىمدىق قاشىقتىققا شاپتى. مارە سىزىعىن جۇيرىكتەردىڭ اراسىنان جامبىل وبلىسىنىڭ قورداي اۋدانىنان كەلگەن اتبەگى ايدار نۇرماعامبەتوۆتىڭ «ساكۋرا» اتتى سايگۇلىگى ءبىرىنشى بولىپ كەستى. جۇيرىكتىڭ يەسىنە «قازاقستاننىڭ التىن تايى - 2022» اتاعى مەن اۆتوكولىك كىلتى تاپسىرىلدى. ال، ەكىنشى كەلگەن جۇيرىكتىڭ يەسى اباي وبلىسىنىڭ اتبەگىسى دانا ءاليجانعا - 2 ميلليون تەڭگە، ءۇشىنشى ورىن العان «حانشايىم» اتالاتىن تايدى بايگەگە قوسقان قوردايلىق (جامبىل وبلىسى) ەرلان بايسەۋوۆ 1 ميلليون تەڭگە يەلەندى.

قۇنان بايگەنىڭ قاشىقتىعى - 12 شاقىرىم. اتبەگىلەر بۇل بايگەگە 27 قۇناندى قوستى. ونىڭ اراسىنان مارەگە «قامال» اتتى جۇيرىك وق بويى وزىپ كەلدى. بۇل جۇيرىكتى دە جامبىل وبلىسىنىڭ قورداي اۋدانىندا تۇراتىن اتبەگى ايدار نۇرماعامبەتوۆ قوسقان. ونىڭ ءۇمىتى اقتالىپ، «قازاقستاننىڭ التىن قۇنانى - 2022» بايگەسىنىڭ ءبىرىنشى جۇلدەسىنە تىگىلگەن كولىكتى ۇتىپ الدى. ءسويتىپ، بۇل اتبەگىنىڭ ەكى سايگۇلىگى ەكى كولىكتى يەلەندى. ەكى سايگۇلىكتىڭ دە شاباندوزى - قابىل ايتقابىل.

ال، ەكىنشى ورىننىڭ جۇلدەسى - 2 ميلليون تەڭگە «قازىنا» اتاۋىمەن سايگۇلىكتى قوسقان ەرلان بايسەۋوۆكە، ءۇشىنشى جۇلدەنىڭ 1 ميلليون تەڭگەسى «رامينا» جۇيرىگى ءۇشىن الماتى وبلىسىنىڭ وكىلى قايقاباي سەيىتجانعا بەرىلدى.

ەسكە سالا كەتەلىك، بۇدان بۇرىن اتىراۋ وبلىسىنداعى ات بايگەسىندە 13 جاسار شاباندوز باس جۇلدەگە يە بولعانىن جازعان ەدىك.

اۆتور

بەك مۇستافا

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى