اتىراۋدى شاڭدى داۋىل باسىپ تۇر

وبلىستىق توتەنشە جاعدايلار دەپارتامەنتىنىڭ قوعاممەن بايلانىس توبى تۇرعىندارعا شاڭدى داۋىل بولاتىنى تۋرالى ەسكەرتۋ اقپاراتىن تاراتقان ەدى.

«14- قىركۇيەكتە اتىراۋ وبلىسىنىڭ باتىسىندا، سولتۇستىگىندە، وڭتۇستىگىندە نايزاعاي كۇتىلەدى. وڭتۇستىك-شىعىستان جەل سوعادى. تۇندە ءوڭىردىڭ باتىسىندا، وڭتۇستىگىندە، كۇندىز باسىم بولىگىندە جەل ەكپىنى 15-20 مەتر/سەكۋندقا جەتەدى. وبلىستىڭ باتىسىندا توتەنشە ءورت قاۋپى ساقتالادى»، - دەپ حابارلاعان ەدى دەپارتامەنتتىڭ قوعاممەن بايلانىس توبى.

بۇگىن، 14- قىركۇيەكتە تاڭەرتەڭنەن بەرى مۇنايلى شاھاردا شاڭدى داۋىل كوتەرىلدى. قازىر قالانى شاڭدى داۋىل باستى. قاتتى جەل سوعىپ تۇر.

تابيعاتتىڭ توسىن قۇبىلىسىنا بايلانىستى جەدەل ارەكەت ەتەتىن «112»، «101»، «103» قىزمەتتەرىنە وقىس وقيعالار، ءورت تۋرالى حابار تۇسپەگەن.

مامانداردىڭ بولجامىنا قاراعاندا، قالادا شاڭدى داۋىل كەشە، 13- قىركۇيەكتە ساعات 20:00 دە باستالعان. شاڭدى داۋىل بۇگىن، 14- قىركۇيەكتە ساعات 20:00 گە دەيىن جالعاسۋى مۇمكىن.

اتىراۋ وبلىسىندا مۇنداي شاڭدى داۋىل بۇعان دەيىن بىرنەشە رەت قايتالانعان. مۇنايلى ءوڭىر تۇرعىندارى تابيعاتتىڭ بۇل قۇبىلىسىن قالىپتى جاعداي رەتىندە قابىلدايدى.

ەسكە سالا كەتەلىك، بۇدان بۇرىن كاسپي جاعالاۋىندا كەفالدىڭ قىرىلۋى تەڭىز سۋىنىڭ جەلمەن جايىلۋىنان بولعانىن حابارلاعان ەدىك.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى