ريم پاپاسى: اباي حالىقتىڭ جان دۇنيەسىندەگى ەڭ ماڭىزدى قۇندىلىقتارعا ءمان بەردى
«كەشە قازاقتىڭ ۇلتتىق اسپابى دومبىرا تۋرالى كوپ مالىمەت الدىم. بۇگىن بۇل مۋزىكالىق اسپاپتى وسى جەردىڭ ۇلى اقىنى، كومپوزيتورى - ابايدىڭ ۇنىمەن بايلانىستىرعىم كەلەدى. ول وزىنەن كەيىن ءدىندارلىقتى سىڭىرگەن تۋىندىلار قالدىردى. وسى ورايدا حالىقتىڭ جان دۇنيەسىندەگى ەڭ ماڭىزدى قۇندىلىقتارعا باسا ءمان بەردى»، - دەدى ريم پاپاسى فرانسيسك.
سونداي-اق، ريم پاپاسى قازاقستان - ءبىر-بىرىنەن الشاق ورنالاسقانداردىڭ باسىن قوساتىن ماڭىزدى مەكەن ەكەنىن ايتتى.
«ءبىز عاسىرلار بويى ۇلكەن كەرۋەندەر وتكەن جەردە تۇرمىز. بۇل جەرلەردە جىبەك جولىنىڭ ارقاسىندا كوپتەگەن حيكايالار، يدەيالار، نانىمدار توعىسقان»، - دەدى ريم پاپاسى.
وسى ورايدا ول قازاقستانعا ارناپ ءوز تىلەگىن ايتتى.
«قازاقستان تاعى دا ءبىر-بىرىنەن الشاق ورنالاسقانداردىڭ باسىن قوساتىن، تاتۋلاستىراتىن مەكەنگە اينالسىن. قازاق جەرى ادامي قارىم-قاتىناستى باسشىلىققا الا وتىرىپ، ماڭىزدى كەزدەسۋلەر ءۇشىن جاڭا جولدار اشىلا بەرسىن. بۇل تۇرعىدا ءوزارا سىيلاستىق پەن شىنايىلىققا ەكپىن قويىلعان»، - دەدى پونتيفيك.
