الەمدە ادىلەتتى قوعام قۇرۋ بارىمىزگە ورتاق مىندەت - مەملەكەت باسشىسى
«حالىقتار اراسىنداعى كەلىسىمدى نىعايتىپ، پاندەميادان كەيىنگى الەمدە ادىلەتتى قوعام قۇرۋ بارىمىزگە ورتاق مىندەت. وسى ورايدا اشىق ديالوگ ورناتۋ وتە ماڭىزدى. ءدىن كوشباسشىلارىنىڭ VII سەزى تىڭ يدەيالارعا جول اشىپ، بارشامىزدى بيىك بەلەستەرگە جەتكىزەدى دەپ سەنەمىن. ءبىزدىڭ مۇددەمىز جانە نيەتىمىز ءبىر. ءبارىمىز دە بەيبىت ءارى بەرەكەلى بولاشاققا قادام باسۋدى قالايمىز. وسى يگى ماقساتقا بىرگە جەتەيىك. سەزد جۇمىسىنا تابىس تىلەيمىن. دۇعا تىلەكتەرىڭىز قابىل بولسىن»، - دەدى قازاقستان پرەزيدەنتى الەمدىك جانە ءداستۇرلى دىندەر ليدەرلەرى VII سەزىنىڭ اشىلۋىندا سويلەگەن سوزىندە.
«الەمدەگى ەڭ بەدەلدى رۋحاني كوشباسشىلاردىڭ باسىن قوسىپ، ديالوگ قۇرۋ ءبىز ءۇشىن زور مارتەبە. قازاقستانعا العاش رەت مەملەكەتتىك ساپارمەن كەلگەن ۆاتاكاننىڭ جانە كاتوليك شىركەۋىنىڭ باسشىسى، ريم پاپاسى فرانسيسكىگە ءىلتيپاتىمدى بىلدىرەمىن. ءسىز دىندەر جانە حالىقتار اراسىنداعى ءوزارا تۇسىنىستىكتى نىعايتۋعا زور ۇلەس قوستىڭىز. كونە «ءال- ازھار» يسلام ۋنيۆەرسيتەتىنىڭ باس يمامى، جوعارى مارتەبەلى دوكتور، شەيح احماد ات- تايەبتىڭ ەلىمىزگە ارنايى كەلگەنىنە قۋانىشتىمىن. قازاقستان حالقى ءوزىڭىزدى قازىرگى مۇسىلمان الەمىنىڭ كورنەكتى ويشىلى رەتىندە قۇرمەت تۇتادى. ءسىز ءدىن جولىندا ادال قىزمەت اتقارىپ، ادامگەرشىلىك قۇندىلىقتاردى دارىپتەۋگە ولشەۋسىز ەڭبەك ءسىڭىرىپ كەلەسىز»، - دەدى مەملەكەت باسشىسى.
اۆتور
مارلان جيەمباي
