ريم پاپاسى بەيبىتشىلىك پەن ءوزارا تۇسىنىستىككە شاقىراتىن باستامالارعا سەبەپشى بولۋى مۇمكىن - توقايەۆ
كەزدەسۋ الدىندا پونتيفيكتى پرەزيدەنت سارايىندا رەسمي قارسى الۋ ءراسىمى بولدى. قۇرمەت قاراۋىلى روتاسىنىڭ باستىعى راپورت بەرگەننەن كەيىن ەكى ەلدىڭ مەملەكەتتىك ءانۇراندارى شىرقالدى. قاسىم-جومارت توقايەۆ پەن ريم پاپاسى قۇرمەت قاراۋىلىنىڭ الدىنان ءوتىپ، ەكىجاقتى كەلىسسوز جۇرگىزۋ ءۇشىن «شىعىس» زالىنا باردى.
قاسىم-جومارت توقايەۆ كاتوليك شىركەۋىنىڭ باسشىسىنا ءىلتيپات بىلدىرە وتىرىپ، قازاقستانعا كەلگەنى ءۇشىن ريزاشىلىعىن ءبىلدىردى.
- ءسىزدىڭ قازاقستانعا، جالپى ايتقاندا، ورتالىق ازيا ايماعىنا العاشقى اپوستولدىق ساپارىڭىز مەنىڭ وتانداستارىمدى قاي ءدىندى ۇستاناتىنىنا قاراماستان زور قۋانىشقا بولەدى. ءسىزدىڭ بۇل ساپارىڭىزدى قايىرىمدىلىق پەن ادىلدىك جولىنداعى رۋحاني كوشباسشىلىقتىڭ جارقىن ۇلگىسى رەتىندە باعالايمىن. قاسيەتتى يوانن پاۆەلدىڭ قازاقستانعا جاساعان تاريحي ساپارى 2001-جىلى قىركۇيەكتە، سول جىلعى 11 - قىركۇيەكتە بۇكىل الەمدى اۋىر كۇيزەلىسكە تۇسىرگەن ا ق ش- تاعى تەررورلىق اكتىدەن كەيىن بولدى. ونىڭ سيمۆولدىق ءمانى زور ەدى، - دەدى مەملەكەت باسشىسى.
پرەزيدەنت ريم پاپاسىنىڭ ساپارى حالىقارالىق ارەناداعى جاعدايدىڭ شيەلەنىسۋى مەن الەمدەگى اۋىر گەوساياسي احۋال اياسىندا ءوتىپ جاتقانىنا نازار اۋداردى.
قاسىم-جومارت توقايەۆ كاتوليك شىركەۋى باسشىسىنىڭ قازاقستانعا كەلۋى جانە ونىڭ الەمدىك جانە ءداستۇرلى دىندەر كوشباسشىلارىنىڭ سەزىنە قاتىسۋى وتە ماڭىزدى وقيعا ەكەنىن اتاپ ءوتتى. پرەزيدەنتتىڭ ايتۋىنشا، ريم پاپاسى بەيبىتشىلىك پەن ءوزارا تۇسىنىستىككە شاقىراتىن باستامالارعا سەبەپشى بولۋى مۇمكىن.
ءوزارا سەنىم مەن قۇرمەت كورسەتۋ جاعدايىندا وتكەن كەزدەسۋدە مەملەكەتىمىزدىڭ باسشىسى مەن ريم پاپاسى كونفەسسياارالىق كەلىسىم مەن ءدىنارالىق ديالوگتى، قازاقستان مەن ۆاتيكان اراسىنداعى ىنتىماقتاستىقتىڭ دامۋ پەرسپەكتيۆالارىن ىلگەرىلەتۋدىڭ وزەكتى ماسەلەلەرىن تالقىلادى، سونداي-اق قازىرگى زاماننىڭ سىن-قاتەرلەرى جونىندە پىكىر الماستى.
