اباي وبلىسىندا قازا بولعان ءورت ءسوندىرۋشىنىڭ وتباسىنا «ايبىن» وردەنى تابىستالدى
اباي وبلىسى اكىمدىگى باسپا ءسوز قىزمەتىنىڭ مالىمەتىنە سۇيەنسەك، ايماق باسشىسى نۇرلان ۇرانحايەۆ پەن ق ر توتەنشە جاعدايلار ۆيتسە-ءمينيسترى مارات كۇلدىكوۆ جارما اۋدانىنداعى دالا ءورتىن ءسوندىرۋ كەزىندە كۇيىك شالىپ، قازا بولعان ءورت ءسوندىرۋشىنىڭ وتباسىمەن كەزدەستى.
«ايدوس توعىزبايەۆتىڭ باتىلدىعى، قايسارلىعى مەن ءوز قىزمەتىنە ادالدىعى بارشامىزعا ۇلگى-ونەگە بولىپ قالا بەرمەك. اباي وبلىسى تۇرعىندارىنىڭ اتىنان مارقۇمنىڭ جولداسىنا، تۋعان تۋىستارىنا تاعى ءبىر مارتە قايعىرىپ كوڭىل ايتامىن»، - دەدى وبلىس اكىمى.
كەزدەسۋ بارىسىندا مارقۇمنىڭ وتباسىنا Ⅲ دارەجەلى «ايبىن» وردەنى مەن 3 بولمەلى پاتەردىڭ سەرتيفيكاتى تابىستالدى.
ەسكە سالساق، وسىعان دەيىن اباي وبلىسىندا جالىن شارپىعان اۋماق 5000 گەكتارعا جەتكەنىن حابارلاعان بولاتىنبىز.
اباي وبلىسىنىڭ جارما اۋدانىندا 3 ءورت ءسوندىرۋشىنى كۇيىك شالىپ، ونىڭ ءبىرى كوز جۇمعان ەدى.
ءورت سوندىرۋشىلەردىڭ ءبىرى اۋىر جاعدايدا اۋرۋحاناعا ءتۇستى.
اباي وبلىسىنىڭ اكىمى نۇرلان ۇرانحايەۆ قازا بولعان ءورت ءسوندىرۋشىنىڭ وتباسىنا قاجەتتى كومەك كورسەتىلەتىنىن ءمالىم ەتكەن بولاتىن.
وڭىردەگى دالا ورتتەرى 9- قىركۇيەك كۇنى تاڭەرتەڭ وقشاۋلانىپ، سول كۇنى تولىقتاي سوندىرىلگەن.
