سارى ارقا دالاسىنان تابىلعان ساقتاردىڭ ەجەلگى سايماندارىن رەسەيلىك عالىم زەرتتەپ جاتىر

ول ورتالىق قازاقستاندا ارحەولوگتار تاپقان ارتەفاكتىلەردى زەرتتەۋ ءۇشىن قاراعاندىعا ارنايى كەلگەن، دەپ حابارلايدى قازاقپارات ءتىلشىسى.

يگور گوراشۋك «سولتۇستىك كاسپي ماڭىنداعى مەزوليت - ەرتە نەوليت تاس قۇرالدارى» تاقىرىبىندا ديسسەرتاتسيا قورعادى.

ايتۋىنشا، بالا كەزىنەن ارحەولوگياعا قىزىعۋشىلىق تانىتقان. 12 جاسىنان باستاپ مامانداندىرىلعان ۇيىرمەگە بارعان. جانە ءومىرىن ەجەلگى زاماندى زەرتتەۋگە ارنادى.

ول تراسولوگيالىق تالداۋ ءادىسىن يگەردى، بۇل ەجەلگى ونىمدەردەگى ىزدەردى وقىپ، ولاردىڭ ماقساتىن تانۋعا مۇمكىندىك بەرەدى.

رەسەيلىك مامان وبلىستىق تاريحي- ولكەتانۋ مۇراجايىندا جانە ە. ا. بوكەتوۆ اتىنداعى قاراعاندى ۋنيۆەرسيتەتى جانىنداعى سارى ارقا ارحەولوگيا ينستيتۋتىندا جۇمىس ىستەدى.

ەكى اپتا ىشىندە 300-دەن استام ارتەفاكتىنى زەرتتەپ، ءوزىنىڭ عىلىمي تۇجىرىمىن جاسادى.

«ءبىز «بەعازى - تاسمولا» تاريح جانە ارحەولوگيا عىلىمي- زەرتتەۋ ورتالىعىن باسقاراتىن ارمان بەيسەنوۆپەن ىنتىماقتاسامىز. ول كوپتەگەن تاس قۇرالدارى تابىلعان ساق تايپالارىنىڭ قىستاۋىندا قازبا وتكىزدى. ءبىر قىزىعى، ولاردىڭ كوپشىلىگى - كەتپەن. ولاردىڭ ەكى ءتۇرى بار: كەيبىرەۋلەرى جەر قازۋ ءۇشىن، باسقالارىندا وتە جۇقا پىشاق بار، ياعني ولار ارامشوپتەردى ورۋعا پايدالانعان. بىزدە مۇنداي ءادىس بار: قابات جۋىلادى جانە ورگانيكالىق زاتتار انىقتالادى. سونىڭ ارقاسىندا تارى مەن ارپانىڭ تۇقىمدارى تابىلدى. ەگەر بۇرىن ساقتاردىڭ ەگىنشىلىك بولعانىنا كۇماندانسام، ەندى ناتيجەلەر كۇمانىمدى سەيىلتتى. ساقتار تەك كوشپەلى ءومىر ءسۇرىپ قانا قويماي، باۋ- باقشا وسىرۋمەن اينالىسقان»، - دەدى يگور گوراشۋك.

سارى ارقا ينستيتۋتىندا رەسەيلىك مامان مەتالدى وڭدەۋگە ارنالعان قۇرالداردى، سونداي- اق تاس جانە سۇيەك ۇشتىقتارىن زەرتتەدى.

سونىمەن قاتار، ول قورعانداردان تابىلعان جۇمباق تاس شارلاردى مۇقيات تەكسەردى. بۇل بولاس سياقتى اڭ اۋلاۋعا ارنالعان قۇرال بولۋى مۇمكىن دەگەن قورىتىندىعا كەلدى.

يگور گوراشۋك بولاشاق تاريحشىلار ءۇشىن پراكتيكالىق ساباق وتكىزدى. ول ستۋدەنتتەرگە جەبەلەر مەن قۇرالداردىڭ كرەمنيي ۇشى قالاي جاسالاتىنىن كورسەتتى.

ۋنيۆەرسيتەتپەن ىنتىماقتاستىق جالعاسادى. ال مۇراجاي رەسەيلىك ماماندى قاراعاندىلىقتار ءۇشىن ەجەلگى تەحنولوگيالار تاريحى بويىنشا ءدارىس وتكىزۋگە شاقىردى.

اۆتور

اگاتا مۋحامەدجانوۆا

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى