قىتايدان تاۋار جەتكىزۋ نارىعى مونوپوليالاندىرىلعان - باس پروكۋراتۋرا

بۇل تۋرالى اتالمىش ورگاننىڭ باسپا ءسوز قىزمەتىنەن ءمالىم بولدى، دەپ حابارلادى قازاقپارات.

ءباسپاسوز قىزمەتىنىڭ مالىمەتتەرىنە قاراعاندا، مەملەكەت باسشىسىنىڭ تاپسىرماسى بويىنشا بيىل جىل باسىندا پروكۋراتۋرا ورگاندارى كەدەن سالاسىنا تەكسەرۋ جۇرگىزدى. تەكسەرۋ سىرتقى ەكونوميكالىق قىزمەتتىڭ (بۇدان ءارى – س ە ق) جەكەلەگەن قاتىسۋشىلارى قىتاي حالىق رەسپۋبليكاسىنان تاۋارلاردى اكەلۋ نارىعىن مونوپوليالاندىرىپ العانىن كورسەتتى.

ولاردىڭ ءارقايسىسى بەلگىلى ءبىر تاۋارلارعا (اياق كيىم، كيىم، قوسالقى بولشەكتەر، تەحنيكا، جەمىستەر، كوكونىستەر جانە ت. ب. ) ماماندانىپ، ەلدىڭ ناقتى ايماقتارىن ءوز اراسىندا ءبولىسىپ العان.

كەدەندىك تولەمدەردى تولەۋدەن جالتارۋ ءۇشىن يمپورتتاۋشىلار توبى 2019-2021 -جىلدارى قازاقستان رەسپۋبليكاسىنداعى كەدەندىك رەتتەۋ تۋرالى كودەكستىڭ تالاپتارىن بۇزا وتىرىپ، اكەلىنەتىن تاۋارلاردىڭ قۇنىن جۇيەلى تۇردە تومەندەتىپ وتىرعان.

باس پروكۋراتۋرانىڭ ۇسىنۋى بويىنشا مەملەكەتتىك كىرىستەر كوميتەتى 10 كومپانياعا 107 ميلليارد تەڭگە سوماعا كەدەندىك تولەمدەر مەن سالىقتاردى قوسىمشا ەسەپتەۋ تۋرالى حابارلاما بەردى.

سونىمەن قاتار، انىقتالعان بۇزۋشىلىقتار بويىنشا قىلمىستىق كودەكستىڭ 236-بابى - كەدەندىك تولەمدەر مەن سالىقتاردى تولەۋدەن جالتارۋ بويىنشا سوتقا دەيىنگى تەرگەپ- تەكسەرۋ باستالدى.

بۇگىنگى تاڭدا س ە ق- تىڭ 7 قاتىسۋشىسى («Tex Alliance «، «Almobi Group»، «exspres كەدەن سەرۆيس» ، «Group of the companies TDA»، «Ai-To Progress» ، «Global Logistics Ved» جانە «TL NIKA كەدەن» ج ش س) قابىلدانعان شارالاردىڭ ناتيجەسىندە بيۋدجەتكە 21 ميلليارد تەڭگە قايتاردى.

«قالعان قوسا ەسەپتەلگەن سومالاردى ءوندىرىپ الۋ، ونىڭ ىشىندە اتالعان كومپانيالاردىڭ كەپىلدىك مۇلكى ەسەبى ارقىلى جالعاسۋدا»، - دەلىنگەن باس پروكۋراتۋرانىڭ باسپا ءسوز قىزمەتى تاراتقان اقپاراتتا.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى